మతం వారిగా మడతపేచీలు పెట్టి ప్రాంతాల వారిగా పాడెలు కట్టి శవాల మీద ఓట్ల చిల్లర వేరుకొంటాము.

తెలుగు తల్లి ఒడిలో
బురద పద్మాన్ని
పెట్టనివ్వని
తెలుగోడు
మొట్ట మొదట
అదే పద్మాన్ని
హస్తిన కుర్చీ ఎక్కించి
ఏమి కావాలన్నది
ఇక్కడ నుండే
శాసించి మరీ రాబట్టుకొన్నాడు

అటువంటి ఆంద్ర ప్రదేశ్ లో
ఎన్నేళ్ళు పడిగాపులు గాసినా
పార్టీ పరిస్థితి ఎక్కడ వేసిన గొంగళి
అక్కడే ఉన్నట్టు వుంది

అందుకే ఆంగ్లేయులకు మల్లే
ఆంధ్రులను విడదీసి
సందులో దూరి సడేమియా అంటాము
తరువాత పాగా వేసి పాలిస్తాము

అలనాడు ఆంగ్లే యులను
ఆదరించిన దేశ ద్రోహులకు మల్లే
ఆంధ్రా లో ఉన్న అంధులు కొందరు
దగ్గరికి రానిస్తున్నారు

హస్తిన కుర్చీ ఎక్కిన క్షణం
చీల్చడానికి వెరవం
మీరు ఛీ కొట్టినా సరే

మతం వారిగా మడతపేచీలు పెట్టి
ప్రాంతాల వారిగా పాడెలు కట్టి
శవాల మీద ఓట్ల చిల్లర వేరుకొంటాము.

అన్నను చూసి తనే దేవుడని డప్పేసుకొన్నాయనను

గజన్ పై ఆరోపణల గురించి
గంటల కొద్దీ సోదించి
రక్షించినానన్న కిరణ్
కుర్చీ ఎక్కినప్పటి నుండి
ఎవరూ పట్టించుకోవడం లేదు
దించేస్తామనే గజన్ తప్ప.

సభాద్యక్షుడుగా
పాలకుల పాపాలను
కడగనీకుండా
కష్టపడ్డ వ్యక్తి
కొత్తగా మనకు
ఏమి ఒరగబెడుతాడులే అని
నిరూపితమైన నిజం చవిచూసిన
జనం ఒకింత నిరుత్సాహం చూపారు.

పాడెక్కిన పావలాను మరిచిన జనాలకు
పావలా వడ్డీకి కోట్ల కేటాయింపు అన్నాడు
చీమ కుట్టినట్టు కూడా లేదు

లక్షల కొలువులన్నాడు
కొంపదీసి ఇచ్చేస్తాడా ఏమిటి అని
వ్యంగంగా అన్నోడు కూడా
ఆంధ్రా లో కనిపించలేదు

ఆరు నెలలకో పధకం అన్నాడు
ఆరు నెలలైనా కుర్చీలో
ప్రశాంతంగా కూర్చోలేని వాడనుకొని
ప్రజలు పట్టించుకోలేదు

అన్నను చూసి
తనే దేవుడని కొడికి చేత
డప్పేసుకొన్నాయనను
అధిగమించేద్దామని
ఏకంగా
పాడెక్కిన పావలా
అర ప్రాణంతో ఉన్న అర్ధ రూపాయి ని విడిచి
కొనడానికి చెల్లుబాటు కాక
కోమాలో ఉన్న రూపాయికి
కిలో బియ్యం ఇస్తామని
తన ఓట్ల బొచ్చతో
తన బుద్ది చూపాడు.

చరిత్రను పునరావృత్తం చేయవచ్చు

చైతన్యం వస్తోంది
చదువు సంధ్యలు ఎక్కువ అయ్యాయి
కలిసి ఉంటే కష్టం
మిగిలిన ప్రదేశాల్లో లా
మన దగ్గర ఎందుకు అభివృద్ధి జరగలేదని
నిలదీస్తారు

విడదీస్తే
మళ్ళీ మనమే బాంచన్ దొర అని చెప్పించుకొంటూ క్రింది చరిత్రను పునరావృత్తం చేయవచ్చు.

“చెరువుల్లో నీరు మొదట భూస్వాముల పొలాలు సాగు అయిన తరువాతనే ఇతర రైతులు తీసుకోవాలి. వ్యవసాయ కూలీలు మొదట భూ స్వాముల నాట్లు వేసిన తరువాతే ఇతరులవి వేయాలి. విసునూరు దేశ్‌ముఖ్‌ రామచంద్రారెడ్డి గడీ ముందు చాకలి వారు నిత్యం నూరు బిందెల సానిపి చల్లాలి. వారి దున్నపోతులకు క్షురకులు క్షవరాలు చేయాలి. కచ్చడాల ముందు ఉరకాలి. మూటలు మోయాలి. పక్కలు వేయాలి. పచ్చి బాలింతలను కూడా పాలు పిండి చూపితే తప్ప పనుల నుండి వదిలేవారు కాదు. గ్రామాలకు ప్రభుత్వ ఉద్యోగులు, జాగీరు ఉద్యోగులు వచ్చినప్పుడు ఆ గ్రామంలోని చిల్లర దుకాణదారులు అధికారులకు కావలిసిన సన్న బియ్యం, మాలు, మసాలా, నెయ్యి, నూనె, పప్పు, చింతపండు, బీడీలు, సిగరెట్లు, సబ్బులు తదితర వస్తు సామాగ్రినంతా ఉచితంగా సరఫరా చేయాలి. గొర్రెలు, మేకలు, కల్లు, కోళ్ళు, పందులు, చేతివృత్తుల ఉత్పత్తులతో సహా బలవంతంగా అధికారులు గుంజుకునేవాళ్ళు. ఈ విధంగా జనాన్ని బానిసల కన్నా హీనంగా చూసేవారు. ఈ బాధలు భరించలేక ఎవరైనా ఎదిరించినా, నిలదీసినా సహించేవారు కాదు. వారిని నిర్బంధించి క్రూరంగా హింసించేవారు. హత్య చేసి తమ గడీలలోనే పాతిపెట్టేసేవారు”.

చచ్చే వరకు ఎదురు చూస్తున్నా కొడుకు

చచ్చే వరకు
సంపాదనపై చర్చ పెట్టక
ఎదుటోళ్ళ పై రచ్చ చేస్తూ
కొడుక్కోసం మడమ తిప్పలేదు
నాన్న

ప్రతిపక్షానికి ప్రతిపక్షమై
నాన్న కోసం బొంతపడిన వారంటూ
అంతులేని ఓదార్పు
మడమ తిప్పకుండా చేస్తూ
‘చెయ్యి’ ఎప్పుడు కలుగులోకి తోసి
బొచ్చ చేతికి ఇస్తుందో నని
ఎదురు చూస్తున్నాడు
కొడుకు

ఈ రోజు దొడ్డి దారిలో సాక్షిగా ఎందుకు పోవాల్సి వచ్చింది?

నాన్న జమానాలో
వాయు వేగంతో వ్యాపారవేత్త అయిపోయి
నాన్న పోతూనే
అదే వేగంతో పాలక పగ్గాలు కావాలని
వేసిన పాచికలు పారక
తిరగబడితే

పరిస్థితులు ఎదురు తిరగబడి
వాయు వేగపు సంపాదనలో
ముద్దాయిగా ఆరోపణలు ముసురుకొని
దానిపై విచారణ ఒకింత నెమ్మదిగా పోతోంది

ఇంకో ఘనుల గాలి వాటపు సంపాదనలోని
వాటా లు
ఈ వాయు వేగపు సంపాదనకు
తోడయ్యాయేమో
అనే అనుమానంతో పిలిపిస్తే
లేదు నన్ను పిలిచింది సాక్షిగా నే
అని సంబరపడిపోవడం చూస్తుంటే
చిన్నపిల్లాడి మనస్తత్వం గోచరిస్తోంది

అక్కడ అడిగిన ప్రశ్నలు ఏవో చెప్పక
నాన్న ఇచ్చిన సహకారంతో
రెచ్చిపోయి మరో కేసు విషయమై బోనులో ఉన్న
కోనేరు కు మొదటి స్నేహితుడు
బాబే ఆయననూ పిలవండి పేరంటానికి అని
పెంకి దాడులు మొదలెట్టడం విచిత్రమే

ఒక వేళ బాబు తన జమానాలో పిలిచినా
తరువాత ప్రభువుగా ఉన్న నాన్న
నానా గడ్డి కరుస్తున్న కోనేరు ను ఆపక
ఆయన వేసిన గడ్డిని తిన్నాడా?
అనే విషయం పై సాక్షికి నోరు పెగలదు ఎందుకో?
ఎదుటోడికి నైతిక విలువలు చెప్పే ముందు
తను ఏ తానులో ఉన్నాడో రుజువు చేసుకోవాలి కదా?

మాట్టాడితే మడమ తిప్పను అని
మతిలేని మాటలు చెబుతారు
ఈ రోజు దొడ్డి దారిలో
సాక్షిగా ఎందుకు పోవాల్సి వచ్చింది?

కాంగ్రెసు నిరీక్షణలో ప్రజారాజ్యం పార్టీని స్థాపించిన చిరంజీవి

కాంగ్రెసు పార్టీలో చేరిన తర్వాత ఏం చేయాలో తెలియక చిరంజీవి దిగి వస్తున్నారా అనే అనుమానాలు కలుగుతున్నాయి. తిరుపతిలో ఆయన బుధవారం మాట్లాడిన మాటలు ఆ అనుమానాలకు తావిస్తున్నాయి. తనకు ఎప్పుడు పదవి ఇస్తారో, ఎంత వరకు తాను వేచి ఉండాలో తెలియక చిరంజీవి సతమతమవుతున్నట్లు తెలుస్తోంది. తనకు కేంద్రంలో గానీ రాష్ట్రంలో గానీ మంత్రి పదవి ఇస్తే చాలునని, పదవి ఏదైనా ఉంటే సేవ చేయడానికి ఓ ఆదరవు దొరుకుతుందని ఆయన అన్నారు. దీన్ని బట్టి తనను ఇలా నిరీక్షణలో పెట్టకుండా ఏదైనా పదవి ఇవ్వాలనే విజ్ఞప్తి ఆ ప్రకటనలో ఉందని భావిస్తున్నారు. ముఖ్యమంత్రి పదవిని ఆశించి రాజకీయాల్లోకి దిగి ప్రజారాజ్యం పార్టీని స్థాపించిన చిరంజీవి కాంగ్రెసులో చేరిన తర్వాత రాష్ట్రంలో మంత్రి పదవి ఇచ్చినా సంతృప్తి పడే స్థితికి వచ్చారని అంటున్నారు.

కాగా, అనూహ్యంగా పిసిసి మాజీ అధ్యక్షుడు డి. శ్రీనివాస్‌ను కాంగ్రెసు అధిష్టానం తెర మీదికి తేవడంతో చిరంజీవిలో ఆందోళన ప్రారంభమైనట్లు చెబుతున్నారు. తనకు దక్కాల్సిన హోదా, పదవి శ్రీనివాస్ ఎగరేసుకు పోతారని చిరంజీవి ఆందోళనకు గురవుతున్నట్లు చెబుతున్నారు. దీంతో తనకు ఏ పదవి ఇచ్చిన ప్రస్తుతానికి సంతృప్తి చెందాలనే స్థితికి వచ్చినట్లు చెబుతున్నారు. రాష్ట్ర రాజకీయ పరిస్థితులు తీవ్రమైన అనిశ్చితికి చేరుకోవడంతో కూడా చిరంజీవికి బాధ్యతలు అప్పగించే విషయంలో అధిష్టానం జాప్యం చేస్తోందనే మాట వినిపిస్తోంది.

అగ్ర సింహాసనం వేసేది.

తెరమీద మీసం మెలిపెట్టేసి
నిజ జీవితం లో
మీడియా తో లౌక్యంగా మాట్టాడ్డం
పౌరుషం కాదు
తెలుగు వాడిని కించ పరిచి మాట్టాడితే
పళ్ళు రాల గొడతాననడం
పౌరషం అంటే
అందుకే తానా లాంటి సంఘాలు
ఈ తెలుగు సింహానికి
ఆహ్వానితుల జాబితాలో
అగ్ర సింహాసనం వేసేది.

అన్నదాతల గుండెకోత ఎవరికి తెలుసు ????

ప్రపంచీకరణ, ఆర్థిక సరళీకృత విధానాల ప్రభావాన్ని మన రైతు చవిచూస్తున్నాడు. వీటివల్ల దేశంలో సంపద అనూహ్యంగా పెరిగింది. ఉత్పత్తులు కూడా పెరిగాయి. వాటికి మార్కెటింగ్‌ సౌలభ్యం వృద్ధిచెందింది. అదే సమయంలో ఈ దేశంలో రైతు మాత్రం నీరుగారిపోయాడు. వ్యవసాయాన్ని నమ్ముకున్న రైతాంగం అప్పులపాలైంది. వ్యవసాయం నష్టదాయకంగా మారింది. అప్పులు తీర్చలేక ఆర్థిక ఇబ్బందులకు గురైన రైతులు ఆత్మహత్యలకు పాల్పడుతున్నారు. దీనంతటికీ కారణం ప్రపంచ బ్యాంక్‌, అంతర్జాతీయ ద్రవ్యనిధి సంస్థల ఆదేశాలే. వీటిమేరకు భారత ప్రభుత్వం వ్యవసాయ రంగంలో సబ్సిడీల్ని తగ్గించింది. అంచెలంచెలుగా మొత్తం తొలగిస్తోంది

ఒక్క మాటలో చెప్పగలనా !!!!!

విల్లు పట్టి నిలుచున్నది
అన్నా
లేక
రాముడు గా మారిన బాల కృష్ణుడా
అని అందరూ ఆశ్చర్యంగా చూస్తుంటే

నందమూరి నుండి
మరొకరు రాముడు గా
వచ్చి
విల్లు పట్టిన విధం చూసి
నిలువెల్లా పులకరిస్తూ

ఆ రౌద్రం చూసి
రోమాంచిత ఉద్వేగం కలగగా

అన్నగారి తరం లో
తెలుగు వాడిగా పుట్టినందుకు
మరో సారి వారి వారసుల తరంలో
రాముడిని చూసి తరిస్తున్నందుకు
నా జన్మే అదృష్టం
అని ఒక్క మాటలో చెప్పగలను

అరకొర జ్ఞానంతో

అరకొర జ్ఞానంతో
తెలుగు గడ్డపై
దర్శకుల కొదవ అన్న వారు
అప్పుడప్పుడూ తాము
మద్రాసులో ఉండగా
అబ్భిన అరవ పాండిత్యాన్ని కూడా
పదే పదే చెప్పుకొనే వారు
తాము పుట్టక ముందు
అదే అరవ మద్రాసులో
తెలుగు శంకరాభరణం
సంవత్సరం పైగా ఆడింది అని తెలుసుకోవాలి
ప్రేమాభిషేకం కూడా
సంవత్సరం పైగా ఆడింది అని తెలుసుకోవాలి
వాటి దర్శకులు కూడా
మన తెలుగు వారే అని గర్వపడండి
జాతి ని తక్కువ చేసి మాట్టాడే ముందు
ముందూ వెనుకా చూసుకొని మాట్టాడండి

స్వాతి ముత్యం అనుకొని ఇన్నాల్లో మురిసిన వారు

ఇడుపలేసుని పైన
ఈగ వాలినా
వారసుల గురించి
వివాదస్పద వాక్యాలు
ఎక్కడ వినిపించినా
ఇడుపలేసుని ఇచ్చ బంటులా
తక్షణం అక్కడ వాలి
అలా మాట్టాడే వారిని
బంతాడుతుంటే
ఇడుపలేసుని భక్తుల ఆనందం
అంబరాన్ని అంటేది.

ఇడుపలేసుని బంటుగా
భరితెగించి ప్రజల ఆస్తులు
స్వామికి సమర్పిస్తున్నా
ఎదురు దాడితో
అదే బంటుతో
దడ దడ లాడించే వారు.

ఓ ప్రక్క ఇడుపలేసుని వారసుడు
అక్కా చెల్లీ తల్లీ అంటూ
చెంతకు వచ్చిన వారి
చెక్కిళ్ళు నిమిరి
ఓదార్చుతుంటే
ఇక్కడ బంటు
“చెప్పు సంజనా టెల్ మీ ” అంటూ
ఆడవారి వారి పైన చూపిన
గౌరవ మర్యాదల
గుట్టు రట్టు అయిన వేళ
ఇడుపలేసుని భక్తుల గొంతులో
పచ్చి వెలక్కాయ పడింది.

బంటు గారి బరితెగింపు
హాస్కీ వాయిస్ తో
అలరిస్తుంటే అవాక్కాయి
ఎలా ఎదురు దాడి చేస్తారా అనే
ఆసక్తి అందరిలోనూ ప్రభలుతోంది.

ఇడుపలేసుని వారసుని
స్వాతి ముత్యం అనుకొని
ఇన్నాల్లో మురిసిన వారు
ఆ ముత్యం పై ముసురుకొంటున్న
ఆస్తుల కేసులతో
అసలు రంగు ఇప్పుడిప్పుడే అవగతం చేసుకొంటుంటే
ఇన్నాళ్ళూ ఆణిముత్యం లాంటి వాడనుకొన్న
బంటు లీలలు బయటపడడం
తప్పక మరింత బాధిస్తాయి.

ప్రక్కనోడిని ఎప్పుడు తినేద్దామా అని ఎదురు చూసే సముద్ర నాయకులకు అర్థం అవుతుందంటారా?

చేతిలో సెయ్యిట్టిన సన్నివేష సంబడాన్ని
అంబరాన్ని అంటేలా చేద్దామనుకొంటే
సముద్రం లోని నాయక తిమింగలాలు తీరనివ్వలేదు
సరే సర్దుకు పోదాం అని
దిగమింగుకొని సర్దుకు పోతున్నా
కరేపాకుకు ఇచ్చిన విలువ కూడా ఇవ్వకుండా
ఆటలో అరటిపండు అనే మాటలకు తెరదించకుండా
ఇంకో సినిమాకు కథలు వింటూ భారంగా కాలం వెళ్లదీసే వేళ
అవిశ్వాస తీర్మానం అనే పదం
‘ఆటలో అరటిపండు’లో ఆశను రేపింది

అరటిపండు అవసరం వచ్చే రోజు
ఆసన్నమయ్యింది అని గుర్తుకు తెచ్చేలా
సముద్రం లోని తిమింగల నాయకులకు
ఓ విందు పెట్టి గుర్తు పెట్టుకోమనింది

ప్రక్కనోడిని ఎప్పుడు తినేద్దామా అని
ఎదురు చూసే సముద్ర నాయకులకు
ఈ అరటి పండు పడే ఆరాటం
అర్థం అవుతుందంటారా?
లేదా ఇదీ ఒక ‘ఆటలో అరటిపండు’ ఆర్భాటమే అని
అపార్థం చేసుకొంటారా?

ప్రచార కర్త వారసులు (రక్త & రాజకీయ వారసులు)

వ్యవసాయం దండగని అని
అన్నావో లేదో తెలియదు కాని
తేల్చమని నువ్వు చెప్పినా
ఎవరూ రాకున్నా

ప్రచార కర్త వారసులు (రక్త & రాజకీయ వారసులు)
మాత్రం నిన్ను వదలడం లేదు
వారి పెద్ద వ్యవసాయానికి చేసిన పండగ గురించి
నోరు పెగల్చడం లేదు

అయినా వ్యవసాయం పండగో దండగో
అది ప్రక్కన బెడితే
మీ వృత్తి
అదే రాజకీయాలు
భ్రస్టుపట్టి పోతూ
దండగ అయిపోయే సమయం
ఆసన్నమయ్యిందని
వేర్పాటు వాదులు
ఓదార్పు వీరులు
ఒకింత ముందుగానే గ్రహించినట్టు ఉంది

అందుకే రాజకీయాలు పండగ చెయ్యాలని
ప్రబుత్వాన్ని పడగొట్టండి
అవిశ్వాసం పెట్టండి అని
ఆత్రం గా అడుగుతున్నారు

ఆలకించండి మరి
ప్రభుత్వం పడినా పడక పోయినా
పాలకుల బేరసారాలతో
రాజకీయాలు పండగ చెయ్యాలని
ఉవ్వీళ్ళూరే వీరి
బేరసారాలకు
బేషజాలకు పోకుండా
బేరాలు చేసుకోనివ్వండి.

గో ధూళిని లేపే వారు లేరు

వృద్దుల చే సుద్దులు చెప్పించుకోవాల్సిన
భావి తరం ఎండమావుల వెంట వెళ్ళిపోగా
పండిన వృద్దులే ఇప్పుడు దాని సంతోషం

గో ధూళిని లేపే వారు లేరు
పాలిచ్చే ఆవులను మాత్రం ఆశగా చూసుకొనే వారు మాత్రం
అక్కడక్కడా అగుపిస్తుంటే

కూలీలు దొరక్క
కరెంటు తో దాగుడు మూతలు ఆడలేక
గిట్టు బాటు గాక
ప్రతిసారి అదృష్టం పరీక్షించుకోలేక
సరైన పోషకాహారం దొరక్క
నీరసపడి
బీడుల చూస్తూ

అందులో పూర్వం పండించిన బంగారాన్ని తలచుకొని
నెమరేసుకొంటూ
ఇవి ఇలాగే ఉంటే
భావి తరాలు ఏమి తిని బతుకుతారో
అని బాధ పడుతూ

ఆశలు రేపిన
జల యజ్ఞం
జనాల స్వేదం
ధనంగా
పాలకుల పంటలు పండిస్తుంటే
పల్లె లో మొలకెత్తే ఆశలు కూడా
అక్కడే అడుగంటి పోతున్నాయి.

కాకి పిల్ల కాకికి ముద్దు

అవినీతో
అధికార దుర్వినియోగామో
నాన్న అన్నీ ఇచ్చి వెళ్ళాడు
కూర్చునే కుర్చీ తప్ప

ఆ కుర్చీ వుంటే తప్ప
వెనకేసిన కుప్పను కప్పలేము

దానికి దిష్టిబొమ్మ లా కుర్చీ కావాల్సిందే
నలుగురి దిష్టి పడితే కుప్ప వెనకాల ఉన్న
అవినీతి కృషి బయటపడుతుంది

ఇప్పుడు అదే జరిగింది
కుర్చీ లేని సమయం చూసి
ఆ అవినీతి కుప్ప రగులుకుంది
చూస్తుంటే ఆ కుప్ప బొచ్చె ఇచ్చి కారాగారంలో గాలితో కూడా కూర్చోపెట్టేట్టు వుంది

అందుకే అమ్మా
గుడ్డు మీద నాన్న పీకలేని ఈకలు
నీ బాబు కోసం
బాబు జుట్టు మళ్ళీ పట్టుకో

జుట్టు రాకపోయినా పరవాలేదు పాత జట్టు నాయకురాలిని ప్రాధేయపడి
మన పట్టు గురించి పసందుగా చెప్పి
జైలులో మంచి భోజనాలు పెట్టించమని చెప్పొచ్చు
అలాగే బరితెగించిన మన బంటు నిర్వాకం బూడిద అవుతుంది

కాకి పిల్ల కాకికి ముద్దు అనే సామెత ఒకటి మరో సారి సమైక్యాంధ్రకు సాటి
ఎట్టన్నా నాన్న మంత్రదండంతో మదించి వచ్చిన
అవినీతి సాక్షులతో సహా అన్నీ
పదికాలాల పాటు
పదిలంగా వుండేలా చూడమ్మా
అత్యవసరంగా ఆ అవినీతి కుప్పను ఆర్పమ్మా.

ఆ సంపాదన సాక్షిగా చెరపట్టే దుశ్శాసనులు

ప్రకృతికి చెందిన పంచభూతాలను వంచనతో ద్రుతరాస్ట్రుడికి మల్లే దురాశపడిన కొడిక్కి దోచి ఇచ్చిన దొర పై ఓపిక నశించిన ప్రకృతే పగబట్టి విజయం సాధిస్తే ఇంకా ఆ సంపాదన సాక్షిగా చెరపట్టే దుశ్శాసనులు వీక్షకుల ముందు వచ్చి విశ్లేషణలు గావిస్తుంటే శకుని శత్రు శిబిరం నుండి సంకేతాలు పంపుతుంటే సమరంలో నిలిచిన కొడికి పక్షాన ప్రజల కళ్లకు గంతలు గడుతూ స్వయంగా తల్లే తలపడుతోంది పంచభూతాల పగకు పతి ప్రాణాలు పణంగా పెట్టినా పసి వాడి పాడు బుద్ధికి సుద్దులు చెప్పడం మరిచి మళ్ళీ తలపడడం మనందరికీ ఆశ్చర్యం కలిగించి నాది అక్షర సత్యం మహా భారతం మళ్ళీ నడుస్తోంది

ఆ పిల్లోడోల అమ్మ ఊరుకోదు

ఆ పిల్లోడిని చూడు
వాడికి ఏం కావాలన్నా ఇవ్వడానికి
వాళ్ళ అమ్మ దగ్గర అన్నీ వున్నాయి
అయినా వాడు నీలా
యాగీ చెయ్యడు చూసి నేర్చుకో
వాళ్ళ అమ్మ మన తాతకు ఇచ్చిన
కుర్చీనే కావాలని
ఏడుస్తావెందుకు
మాటి మాటికీ
వాళ్ళ అమ్మ దగ్గరికి వెళ్లి
మన తాత కుర్చీలో కూర్చుంటానని
మారాం చేస్తున్నావంట
నీకు బుద్ది రావాలనే
ఆ పిల్లోడిని వాళ్ళ అమ్మ
మన ఇంటికో సారి పంపి
నన్ను ఎక్కువ మర్యాద చెయ్యకండి
నేను మా ఇంట్లో గెడ్డం తాత కూర్చొనే కుర్చీ అడగడం లేదు
అని సెప్పి పంపింది వాడు అలాగే సేత్తున్నాడు
ఇంకైనా కొంచెం ఇజ్జత్ తెచ్చుకో
భాగ్యనగర పండక్కు
నువ్వేమీ ఎగేసుకొని ఎల్లకున్నా
ఎదురుచూసే వాళ్ళు లేరు
వెళ్లాలనుకొంటే వెళ్లి ఏడువు
నువ్వు అడిగే కుర్చీలో నుండి తాత లేవలేదని
తాతను ఎవన్నా అన్నావో
ఆ పిల్లోడోల అమ్మ ఊరుకోదు
నీకు నీ డోలుకు వీపు విమానం మోతే
దాంతో పాటు నిన్ను పాలేరు చేసి
సిన్మాల్లో నటించే ఆ మొద్దబ్బాయిని
దత్తత చేసుకోమంటోంది, జాగ్రత్త.

ప్రతీ భావోద్వేగమూ తాత్కాలికమే.

ఓ శుభవార్త తెలియగానే ఆనందం, ఆలోచనలు భవిష్యత్ వైపు సాగినప్పుడు తెలీని దిగులూ, మనసు గాయపడిన క్షణం ఆక్రోషం.. ఇలా ప్రతీ భావోద్వేగమూ మనసులోనే సిద్ధంగా ఉంటుంది. తటస్థించే అనుభవానికి తగ్గ భావోద్వేగం మనలో వెన్వెంటనే పెల్లుబుకుతూ కొంతసేపు ఉక్కిరిబిక్కిరి చేసి గమ్మున సర్దుకుంటుంది. మంచిదైనా, చెడ్డదైనా ఓ సంఘటన జరిగిన వెంటనే మదిలొ వేగంగా జరిగే సంఘర్షణ తాలూకు వ్యక్తీకరణలే మన భావోద్వేగాలు. ప్రతీ భావోద్వేగమూ దాని తీవ్రత కొనసాగినంత సేపూ ఉక్కిరిబిక్కిరి చేస్తుంది. పనిలో పనిగా మనసులో ఏ మూలనో ఆ సంఘటన తాలూకు గాఢతని మరువలేని జ్ఞాపకంగా నమోదు చేసి.. తీవ్రత తగ్గిన వెంటనే దూదిపింజెలా ఎగిరిపోతుంది. భావోద్వేగాల మర్మాన్ని గ్రహిస్తే అవి మనపై స్వారీ చేసే ముందే వాటి తీవ్రతని కట్టడి చేసుకోగల విజ్ఞత అలవడుతుంది. ఏ ఆనందానికైనా, ఆవేశానికైనా, విచారానికైనా కల్లోలితం అయ్యే ఆలొచనా ప్రవాహమే మూలం. వాటిని వీలైనంత వేగంగా స్థిరత్వం వైపు మళ్లిస్తే ఆ భావోద్వేగపు గాఢత క్షీణించిపోతుంది. మిన్ను విరిగి మీదపడ్డా మౌన ప్రేక్షకుల్లా చూస్తుండిపోయే నైపుణ్యత అలవడుతుంది. మన ఆలోచనలు నిరంతరం జరిగిపోయిన జీవితాన్నీ, ముందు భవిష్యత్తునీ, వర్తమానపు అనుభవాలనూ, బలంగా నాటుకుపోయిన జ్ఞాపకాలనూ మనసు పొరల్లోంచి వెలికి తీసి వాటిని చిక్కుముళ్ల్లుగా పెనవేసి కుదురుగా ఉన్న మనసుని కూడా ఆందోళనపరుస్తుంటాయి.
ప్రతీ భావోద్వేగమూ తాత్కాలికమే. అవసరం అయిన దానికన్నా దాన్ని మరింత విశ్లేషించి, సంఘటనలు, ఆలోచనల్ని క్లిష్టతరం చేసుకుని ఆ ఉద్వేగాన్ని సులభంగా వదిలిపెట్టకుండా మనసుని కుళ్లబెట్టుకుంటూ ఉంటాం. ఈ క్షణం మన మానసిక స్థితి అస్థిరంగా ఉంటే దాన్ని స్థిరపరుచుకోవడం మన చేతుల్లో ఉన్న పని. కానీ ఆ కిటుకుని గ్రహించలేక పాటించలేకపోతున్నాం. సమస్యల్లో ఉన్న స్థితిలో మనమూ సమస్యలో కూరుకుపోయి బయటపడే మార్గాన్ని ఆలోచించడం మనేసి సమస్యని పెద్దది చేసుకుంటూ ఉంటాం. అలాగే ఆవేశం కట్టలు తెంచుకుంటే దానికి దారి తీసిన పరిస్థితులను విశ్లేషించి, మరోసారి ఆ పరిస్థితి తలెత్తకుండా తీసుకోవలసిన జాగ్రత్తల వైపు దృష్టిని నిమగ్నం చేయకుండా వీలైనంత ఆవేశాన్ని వెళ్లగక్కుతుంటాం. ఇలా భావోద్వేగం యొక్క మూలాల్ని గుర్తించి వాటిని సరిచేసుకునే మార్గం ఒకటుంటే.. ఏకంగా భావోద్వేగం మనపై స్వారీ చేస్తున్నప్పుడు దాని నుండి బయటపడడానికి మరెన్నో మార్గాలున్నాయి.
ఒక భావోద్వేగాన్ని పరిసరాలపై వెదజల్లడం మన ఉనికిని, మనం ఆశిస్తున్న గమనింపుని పొందడానికి సులువైన మార్గం అనే దురభిప్రాయం బాల్యం నుండి మనకు ఉగ్గుపాలతో అలవర్చబడింది. ఉదా. కు.. మనం ప్రదర్శించిన ఆవేశానికి ఆశించిన స్థాయి స్పందన దాన్ని ఎవరిపై ప్రదర్శించామో వారి నుండి లభిస్తే మన అహం సంతృప్తిపడుతుంది. ఎంత ఆవేశపడినా దాన్ని పట్టించుకునేవారు లేనప్పుడు కాసేపు మనసు రగిలిపోతుంది. మెల్లగా నిస్సహాయత ఆవరిస్తుంది. దిగులు మొదలవుతుంది. చివరకు బేలగా మారిపోతాం. ఇది ఒక ఆవేశమనే భావోద్వేగపు పరిణామక్రమమే. ఇలా ప్రతీ భావోద్వేగానికీ కొన్ని బలమైన కారణాలు, అంచనాలూ, పర్యవసనాలూ ఉంటాయి. వాటన్నింటినీ విశ్లేషించి మన చిత్తం చేసే చిత్రాల్లో ఎంత విచిత్రం దాగుందో అర్ధం చేసుకోగలిగితే ఆ మాయ నుండి అవలీలగా బయటపడగలం !

అమ్మ నాదే...

అంబరాన పూసిన తారలు కోసి
మాలచేసి నీ జడలొ తురుముతానంటే
మురిసిపోయింది అమ్మ ముసిముసి నవ్వులతో

హరివిల్లుని పట్టి తెచ్చి నీకు ఊయలకట్టి ఊపుతానంటే
చిరునవ్వుతో నా తల్లీ అంటూ ముద్దులాడింది

సఖులతో చేరి ఆటలాడగా
బుజ్జగించి, ఊసులెన్నో చెప్పి బొజ్జ నింపింది

నిదురమ్మ రానని మొరాయిస్తుంటే
చందమామని చూపి లాలిపాడి జోకొట్టింది

సూరీడు తాపం చురుక్కుమంటూ బాధిస్తుంటే
తన కొంగునే గొడుగుగా కప్పి పొదుముకుంది

వానజల్లులో తడిసి, మెరుపు గర్జనలకు ఉలిక్కిపడితే
నేనున్నానురా అంటూ వెన్ను తట్టింది లాలనగా

ఆటలలో చిన్ని గాయమై కంటతడిపెడితే
తన గుండెల్లో దిగిన బాకులా విలవిలలాడింది

అమ్మ ఆప్యాయతను ఆలంబనగా చేసుకొని
అందరికంటే ఉన్నతంగా ఎదిగినప్పుడు
అక్కున చేర్చుకుంది అశ్రునయనాలతో...

మరచిపోగలమా? తీర్చుకోగలమా?
అమ్మను. ఆమె ప్రేమని.. నేర్పిన పాఠాలను
అందుకే అమ్మ నాదే...

అంత వీజీగా పక్కన పెట్టే డయిలాగు కాదు....

అసలు టైటిల్ విషయానికొస్తే, పాండవ వనవాసం సినిమా చూసినప్పుడు విన్న డవిలాగు అది. సావిత్రి బాగా బాధ పడుతూ చెప్పిన డయిలాగు. ద్రౌపదిని( అదే సావిత్రే లెండి) తీసుకురమ్మని ప్రాతిగామిని పంపిస్తాడు రారాజు. అప్పుడు ఈ విషయం కనుక్కురమ్మని సావిత్రమ్మ చెప్పే డయిలాగు ఇది.
" నా స్వామి తన్నోడి నన్నోడెనా లేక నన్నోడి తన్నోడెనా,".
ఈ డయిలాగు విన్నప్పుడు నేను, ధుర్యోధనుడు( అదే మన ఎస్ వీ ఆర్) ఒకలాగే ఆలోచించాము. ఎలా అయితే ఎంటి మొత్తానికి ఓడారా లేదా. అంతా టైం వేస్టింగ్ టాక్టిక్స్.
కాని రెండిటికి ఏంత తెడా ఉందో ఇప్పుడు అర్థం అవుతుంది. అంటె ధర్మరాజు తను ఓడిపోవడం వల్ల ద్రౌపది ఆటోమేటిక్ గా రారాజుది అవుతుంది. అలాంటప్పుడు ధర్మవిధిత(lawful bid). కాని, ధర్మరాజు ద్రౌపదిని జూదంలో పెట్టి ఓడిపోతే, అసలు ధర్మ రాజుకు ద్రౌపదిని పెట్టే హక్కు ఎక్కడిది. ద్రౌపది తన ఒక్కడికే భార్య కాదే, కాబట్టి తను అధర్మవిధిత( unlawful bid). ఇది వికర్ణుడు చెప్పే వాదం. ఏదేమయితేనేం ఇందులో పెద్ద ధర్మ సూక్ష్మం ఉంది. అంత వీజీగా పక్కన పెట్టే డయిలాగు కాదు

మరుసటి ఉదయం కోసం ఎదురుచూస్తున్న ఈ మనసు ఏమిటో...

అప్పట్లొ కళ్ళ్లోలో స్వప్న మాలికలు,
ఈ గుప్పెడు మనసులో భావకత్వపు డోలికలు,
బ్రతుకొక పాటగా,క్షణమొక కవితగా సాగిపోయేది.....
ఎన్ని కోరికలు,ఎన్ని కలలు,
ఎన్నెన్ని ఆశయాలు, ఎన్నొ ఎన్నొ ఆదర్శాలు....
ఆదర్శాల,ఆశయాల,కోరికల వేటలో
ఇహం కోసం,అహం కోసం అస్తిత్వాన్ని కోల్పోతున్నాను,
అందమైన,నిర్మలమైన ఆ నవ్వుల్ని కొల్పోతున్నాను,
స్వేచ్హ సౌఖ్యం మరచి భాగ్యాన్వేశనలో పడ్డాను,
ఉషోదయం తో ప్రారంభం అయ్యే ఉరుకుల్ని,
నిశార్దం దాకా కొనసాగిస్తున్నాను।
తియ్యనైన ఈ భాదకు, ఉప్పు నీరు ఈ కంట ఎందుకో...
గుప్పడంత ఈ మనసుకు ఇన్ని శిక్షలెందుకో....
చెప్పలేని ఈ భాదకు గుప్పెడంత ఈ గుండె ఏమిటో...
భవ,భావాలు లేని ఈ భాష ఏమిటో....
మది తలుపులకు తాళం వేసి,
మరుసటి ఉదయం కోసం ఎదురుచూస్తున్న ఈ మనసు ఏమిటో...

మెనూ ఇలా ఉంటే...!

హెల్తీఫుడ్ అంటే ఏది? ఈ సందేహం చాలా మందికి ఉంటుంది. రోజూ ఏ డైట్ తీసుకోవాలి? వారంలో ఎన్ని రోజులు మాంసాహారం తీసుకోవచ్చు? ఇలాంటి సందేహాలను తీర్చడానికే హార్వర్డ్ యూనివర్సిటీకి చెందిన శాస్త్రవేత్తలు పరిశోధనలు నిర్వహించి ఏమేం తినాలో వెల్లడించారు.

* తాజా కూరగాయల్లోనూ, పండ్లలోనూ యాంటీ అక్సిడెంట్లు పుష్కలంగా ఉంటాయి. కాబట్టి వారంలో ఐదు రోజులు పండ్లు, కూరగాయలు తీసుకోండి. ముఖ్యంగా పళ్లలో మెదడును రక్షించే యాంటీఅక్సిడెంట్లు పుష్కలంగా ఉంటాయి. బ్రొక్కోలి, క్యాలీఫ్లవర్‌లలో ఎక్కువ శక్తి ఉంటుంది. కాబట్టి వీటిని ఎక్కువగా తీసుకోవాలి. వీటిని తీసుకోవడానికి అంతగా ఇష్టపడని మహిళల్లో మెదడు వారి వయస్సుకంటే ఒకటి రెండెళ్లు తక్కువగా ఉంటుంది. యాపిల్స్, గ్రేప్స్, ఆనియన్స్, వైన్, టీ, డార్క్ చాక్‌లెట్‌లలో కూడా యాంటీఅక్సిడెంటు ్ల ఉంటాయి. వారంలో ఐదు రోజులు వీటిని తీసుకుంటే యాంటీ అక్సిడెంట్లకు కొదవే ఉండదు.

* ఆలివ్ఆయిల్, నట్స్, సన్‌ఫ్లవర్‌సీడ్స్, అవొకొడస్‌లో యాంటీ అక్సిడెంట్‌గా పనిచేసే ఇ-విటమిన్ పుష్కలంగా ఉంటుంది. ఇది అల్జీమర్స్ వ్యాధికి బాగా పనిచేస్తుంది. తరచుగా వీటిని తీసుకునేవారిలో అల్జీమర్ వ్యాధి బారిన పడే అవకాశం 67శాతానికి తగ్గిపోతుంది. కాబట్టి వీటిని వారంలో ఒకరోజైనా మీ మెనూలో ఉండేలా చూసుకోండి.

*వారానికి రెండుసార్లు చేపలు తీసుకుంటే రక్తంలో ఒమెగా-3 ఫ్యాటీ యాసిడ్ డీహెచ్ఏ లెవల్స్ అత్యధిక స్థాయిలో ఉంటాయి. దీంతో మెదడులోని కణాలు సమర్థంగా పనిచేస్తాయి. కాబట్టి వారంలో రెండు రోజులు చేపలు తినండి.

నీవొస్తావని... నా కలలను నిజం చేస్తావని ఎదురు చూస్తూ ఉండే నీ

ఏ జన్మ బంధమో తెలియదుగానీ నిను చూచిన ఆ మొదటి క్షణం పోగొట్టుకున్న నిధిని మళ్లీ
సొంతం చేసుకున్నట్టు నా మనసు పొంగిపోయింది. నా మనసెందుకు నిను మెచ్చిందో
తెలియదుగానీ మంత్రం వేసినట్టు నా మది నీ తలపులతో నిండిపోయింది. కలనైనా నిను
ఎరగని నేను ఆశ్చర్యంగా నీవే నా ఆశ, శ్వాస అనేంతగా మారిపోయానంటే ఆశ్చర్యంకాక
మరేమిటి.

ప్రేమంటే అర్థమైనా తెలియని నేను ఇప్పుడు నీపేరే జపిస్తున్నానంటే నాకు సైతం
వింతగానే అనిపిస్తుంది. ఇన్నాళ్లూ ఒంటరిగా గడిచిపోయిన నాలోకంలోకి నీవొచ్చావని
కాబోలు అప్పుడప్పుడూ మాత్రమే అందంగా కనిపించే ఈ లోకం నాకిప్పుడు నిత్య
శోభాయమానంగా గోచరిస్తోంది.

చెట్టు, పుట్ట, రాయి, రప్ప ఒకటేమిటి ప్రతీదానిలో నీవే కనిపిస్తుంటే ఇన్నాళ్లూ
నేను కోల్పోయిందేమిటో కొంచెం కొంచెంగా తెలిసొస్తోంది. నాకూ మనసుందని, దానిలోనూ
స్పందనుందని నాకు తెలిసిందంటే అది నిను చూశాకే అని నే చెప్పే మాటలు పొగడ్తలుగా
నీకు అనిపించినా అవి నిజంగా నిజాలే సుమా.


స్త్రీలో ఆకర్షణ మాత్రమే ఉంటుందనుకున్న నాకు ఆ ఆకర్షణకు మించిందేదో ఉందని
తెలిసిందంటే దానికి కారణం నీవే. కట్టిపడేసే నీ చూపులు చాలు నా జీవితాంతం నీ
బంధీగానైనా ఉండిపోవాలనిపిస్తుంది. స్వర్గతుల్యమైన నీ సానిహిత్యం చాలు యుగాలు
సైతం గడిపేయొచ్చనిపిస్తుంది. అమృతమై వర్షించే నీ మాటలు చాలు సప్త స్వరాలూ
వద్దనిపిస్తుంది.

పండు వెన్నెలలాంటి నీ నీడలో నేనూ నా జీవితం గడిచిపోతే చాలనిపిస్తుంది....
ఇవన్నీ ప్రేమ లక్షణాలైతే నేస్తం నీ మీద నాకున్నది తప్పకుండా ప్రేమే...... కానీ
నా ప్రేమను అంగీకరించి నీవొస్తావన్న ఆశతో నీకోసం ఎంత కాలమైనా ఎదురు
చూస్తుంటాను... కరుణించి వరమిచ్చినా... కాదంటూ నన్ను శపించినా నీపై నాలో మొగ్గ
తొడిగిన ప్రేమ నిత్యం పెరిగి వికసిస్తుందే తప్ప అది ఎప్పటికీ వాడిపోదు.

నీవొస్తావని... నా కలలను నిజం చేస్తావని ఎదురు చూస్తూ ఉండే నీ

ప్రతిరోజూ ఒక మంచి మాట

రాజకీయాలు అంత అప్రతిష్టపాలైన వ్యాపారం కానే కాదు. కానీ ప్రతిష్టలేని వ్యక్తులే దాన్ని అలా తయారు చేస్తారు.

ఏమీ తెలియనప్పుడు మౌనంగా ఉండాలి. అలాగే అన్నీ తెలిసినప్పుడు కూడా.


మీకు కాలం అనుకూలంగా లేనప్పుడు, మీరే కాలానికి అనుకూలంగా మెలగండి.

కాఫీ మేలు కూడా చేస్తుంది..!

కాఫీ ప్రియులకు ఓ శుభవార్త. కాఫీతో కొన్ని ఆరోగ్యకరమైన లాభాలు కూడా ఉన్నాయని ఓ అధ్యయనంలో తేలడం విశేషం. ఇప్పటివరకు కాఫీ సేవనం అనారోగ్య వ్యసనంగా భావిస్తుండగా ఈ వార్త కాఫీ ప్రియులను మరింత ఉత్సాహపరుస్తుంది. ప్రతిరోజు నాలుగు, అయిదు సార్లయినా కాఫీ తాగనిదే ఉండలేరు కొందరు కాఫీ ప్రియులు. కాఫీ తాగకుంటే నీరసంగా అనిపిస్తోందని భావిస్తూ దీన్ని సేవిస్తారు. చివరికి కాఫీ వారికి వ్యసనంగా మారుతుంది. ఈ వ్యసనం నుంచి ఎలా బయటపడాలా అని కొందరు ఆలోచిస్తుం టారు. కానీ కాఫీ మరీ అనారోగ్యకరమైన వ్యసనమేమి కాదని ఇటీవల ఓ అధ్యయనంలో తేలింది. కాఉత్సాహపరుస్తుంది. ఫీతో కొన్ని ఆరోగ్యకరమైన లాభాలు కూడా ఉన్నాయని ఈ అధ్యయనంలో తేలింది.

టైప్‌ 2 డయాబెటిస్‌, గుండె సంబంధింత వ్యాధులు, సమస్యలతో బాధపడేవారికి కాఫీ మేలు చేస్తుందని తెలిసింది. కానీ దీంఓ కొన్ని సైడ్‌ ఎఫెక్ట్‌లు కూడా ఉన్నాయని తేలింది. కాఫీలోని కెఫీన్‌ మూలంగా శరీరంలో ఒకరకమైన వ్యాధి నిరోధక శక్తి అనూహ్యంగా పెరుగుతుంది. ఫలితంగా ఈ శక్తి కార్డియోవాస్క్యులర్‌ వ్యాధులు, క్యాన్సర్‌, టైప్‌2 డయాబెటిస్‌ సమస్యలను నివారిస్తుంది. కాఫీలో కేలరీలు కూడా తక్కువగా ఉంటాయి. కప్పు కాఫీలో 6 కేలరీలు ఉంటే అందులో కలిపే చక్కెరలో 23 నుంచి 27 కేలరీలు ఉంటాయి. కాఫీలో చక్కెర కలపకుంటే కేలరీలు పెరిగే సమస్యే ఉండదు.

లో బ్లడ్‌ ప్రెషర్‌తో బాధపడే వారికి కాఫీ ఎంతో మేలు చేస్తుంది. దీన్ని సేవిస్తే బ్లడ్‌ ప్రెషర్‌ లెవెల్స్‌ క్రమ,క్రమంగా పెరుగుతాయి. కానీ ఎక్కువగా కాఫీ తీసుకుంటే శరీరంలో యాంటిఆక్సిడెంట్స్‌ పెరుగుతాయి. ఫలితంగా గుండెలో మండినట్టవుతుంది. జీర్ణ సంబంధిత సమస్యలు కూడా ఏర్పడతాయి. కాఫీ ఎక్కువగా తీసుకుంటే ‘కాఫీ జిట్టర్స్‌’ అనే స్థితికి చేరుకుంటారు. కెఫీన్‌ ఎక్కువగా శరీరంలో చేరడం వల్ల యాంగ్టిటీతో పాటు నిద్రలేమి సమస్యలు కూడా ఏర్పడతాయి. ఎక్కువగా దీన్ని సేవిస్తే ఎసిడిటీ వంటి సమస్యలతో బాధపడాల్సి వస్తుంది. వీటన్నింటినీ దృష్టిలో పెట్టుకొని కాఫీని అవసరమైన మేరకు సేవిస్తేనే మేలు జరుగుతుందని వైద్య నిపుణులు చెబుతున్నారు.

ఎంఎస్ రెడ్డి జూనియర్ ఎన్టీఆర్‌నే కాదు, సీనియర్ ఎన్టీఆర్‌ను కూడా ఉతికి ఆరేశారు.

సహజ కవి, నిర్మాత మల్లెమాల అలియాస్ ఎంఎస్ రెడ్డి జూనియర్ ఎన్టీఆర్‌నే కాదు, సీనియర్ ఎన్టీఆర్‌ను కూడా ఉతికి ఆరేశారు. టాలీవుడ్ సినీ ప్రముఖులపై తన వ్యాఖ్యలతో దుమ్మురేపాడు. ఇదీ నా కథ పేర ఆయన తన అనుభవాలను పుస్తక రూపంలో తెచ్చారు. ఈ పుస్తకంలో సినీ ప్రముఖలతో తన అనుభవాలను రాశారు. జూనియర్ ఎన్టీఆర్ తీరుపై తీవ్ర ఆగ్రహం వ్యక్తం చేశారు. బాలరామాయణం సినిమాలో దర్శకుడు గుణశేఖర్ వద్దంటున్నా జూనియర్ ఎన్టీఆర్‌కు రాముడి పాత్ర ఇచ్చానని, తాను ఓసారి వెళ్తే తనను బయట నిలబెట్టారని, దాంతో తాను వెనక్కి తిరిగి వచ్చానని ఆయన చెప్పుకున్నారు. గుణశేఖర్‌పై కూడా ఆయన తీవ్ర వ్యాఖ్యలు చేశారు. ఆ సినిమాలో తాను రాసిన పాటను తీసేసి, తల పొగురు సమాధానం ఇచ్చారని, బడ్జెట్ పెంచేసి తనను కష్టాల పాలు చేశారని ఆయన అన్నారు.

శ్రీకృష్ణ విజయం సినిమాలో సీనియర్ ఎన్టీ రామారావు తాను వేసిన కృష్ణుడి వేషంలో పౌండ్రక వాసుదేవుడిగా నాగభూషణం గెటప్ చూసి తీవ్ర ఆగ్రహం వ్యక్తం చేశారని, ఆ పాత్ర అలాగే ఉంటుందని - సినిమాలో నటిస్తే నటించండి, లేకుంటే మానుకోండి అని చెప్పానని, దాంతో ఆయన మారు మాట్లాడకుండా నటించారని ఆయన చెప్పుకున్నారు. చంద్రబాబునాయుడితో తన కూతురు భువనేశ్వరి పెళ్లి సందర్భంలో తనను గదులు బుక్ చేయాలని ఎన్టీఆర్ అడిగారని, వాటిని బుక్ చేసి బిల్లులు పంపితే ఆ డబ్బులు ఇవ్వలేదని ఆయన చెప్పారు. అలాంటిదే మరో సంఘటనను కూడా ఆయన వివరించారు. ఈ చేదు అనుభవాలతో తాను ఎన్టీ రామారావుతో సినిమాలు తీయడమే మానేశానని ఆయన చెప్పుకున్నారు.

ప్రజారాజ్యం పార్టీ నేత, చిరంజీవిపై కూడా ఆయన తన చేదు అనుభవాన్ని రాశారు. ప్రముఖ సినీ నటుడు స్వర్గీయ అల్లు రామలింగయ్య తన అభిప్రాయం తీసుకున్న తర్వాతనే సురేఖను చిరంజీవికిచ్చి పెళ్లి చేశారని ఆయన చెప్పారు. తాతయ్య ప్రేమలీలలు సినిమాతో తాను నష్టపోయానని, ఆ సమయంలో చిరంజీవితో సినిమా తీసి నష్టం పూడ్చుకోవాలని అల్లు రామలింగయ్య సూచించారని, చిరంజీవికి అల్లు రామలింగయ్య చెప్పారని, అయినా చిరంజీవి తనకు సమయం కేటాయించలేదని, ఆ విషయం అడగడానికి వెళ్తే మొహం చాటేశారని ఆయన రాసుకున్నారు. శోభన్‌బాబుకు, జమునకు తాను షాక్ ఇచ్చిన విషయాలను కూడా ఆయన రాశారు. రాజశేఖర్‌తో సినిమా తీస్తే అడుక్కు తినాల్సిందేనని ఆయన వ్యాఖ్యానించారు.

ఇలా మల్లెమాల సినీ ప్రముఖులతో తనకు సంబంధాలపై ఆ పుస్తకంలో రాశారు. జయసుధను మాత్రం ఆయన మెచ్చుకున్నారు. ఈ పుస్తకంలోని రాతలపై సినీ ప్రముఖులు ఎవరు కూడా నోరు మెదపడం లేదు. కొన్ని విషయాలపై మౌనం వహించడమే మంచిదని, దానివల్ల విషయాలు మరుగున పడిపోతాయని మన పెద్దలకు తెలిసినంతగా మరెవరికీ తెలియకపోవచ్చు.

ఈ జోడీ చాలా హాట్‌ గురూ !

రాష్ర్టంలో కాంగ్రెస్‌ ప్రభుత్వానికి, కాంగ్రెస్‌ పార్టీకి మధ్య ప్రచ్ఛన్న యుద్ధ మేఘాలు కమ్ముకుంటున్నాయా..! ముఖ్యమంత్రి కిరణ్‌ కుమార్‌కు, పీసీసీ కొత్త నేత బొత్స సత్యనారాయణకు మధ్య రాజకీయ కురుక్షేత్రానికి బీజాలు పడ్డాయా..! విరుద్ధ వాతావరణాన్ని కాంగ్రెస్‌ అధిష్ఠానమే ఏరి కోరి వాంఛిస్తున్నదా..! అందులో భాగంగానే ఈ సర...ికొత్త సమీకరణాలకు తెర తీసిందా..! ఇప్పటిేక వైరంతో... రాజకీయ విభేదాలతో... అంటీ ముట్టనట్టున్న ఇద్దరు నేతలను కీలక పదవులతో దరి చేర్చే వ్యూహంలోని పరమార్థం అర్థంకాక కాంగ్రెస్‌ శ్రేణులు తలలు పట్టుకుంటున్నారుు. మెుత్తం మీద ఇది కాంగ్రెస్‌లో రెండు ప్రధాన కులాల మధ్య సం‘కుల’ సమరంగా మారబోతు న్నదా అనే సందేహాలు వ్యక్తమవుతున్నారుు..!

రాష్ట్ర కాంగ్రెస్‌లో నెలకొన్న అస్తవ్యస్థ పరిస్థితిని యుద్ధప్రాతిపదికన చ క్కదిద్ది, అన్ని ఖాళీలూ భర్తీ చేసిన పార్టీ నాయకత్వం ఇద్దరు ప్రముఖుల మధ్య పెట్టిన పోటీ ఆసక్తి కలిగిస్తోంది. సీఎం కిరణ్‌ వ్యతిరేకించే బొత్స సత్యనారాయణకు పీసీసీ అధ్యక్ష పదవి ఇవ్వడంతో మళ్లీ చాలా ఏళ్ల తర్వాత విభజించిపాలించే రాజనీతికి తెర లేచిన ట్టయింది. వైఎస్‌ అనుభవాన్ని దృష్టిలో ఉంచు కున్న నాయకత్వం ఆంధ్రలో మళ్లీ అలాంటి చేదు ఫలితాలు ఎదురుకాకుండా ఇప్పటినుంచే విభ జించి పాలించే సూత్రాన్ని అమలుచేస్తుండటం చర్చనీ యాంశమయింది. సుదీర్ఘకాలం నుంచి పెండింగ్‌లో ఉన్న స్పీకర్‌-డిప్యూటీ స్పీకర్‌- మండలి చైర్మన్‌-వైస్‌ చైర్మన్‌ పదవులను చకచకా భర్తీ చేసిన నాయకత్వం అదే ఊపులో పీసీసీ అధ్యక్ష పదవి కూడా భర్తీ చేసి, పార్టీకి సంబంధించిన అనిశ్చితిని పూర్తిగా తొలగిం చింది.

అయి తే... ఎవరూ ఊహించని విధంగా ఉత్త రాంధ్రకు చెందిన బొత్సకు పీసీసీ అధ్యక్ష పదవి ఇవ్వడం పార్టీలో చర్చనీయాంశమయింది. ఎవరూ ఊ హించని విధంగా తెలంగాణ కోటా కాదని, ఆ స్థానంలో పీసీసీ పగ్గాలు అందు కున్న బొత్స, సీఎం కిరణ్‌కు చెక్‌ పెడతారన్న ప్రచారం పార్టీ వర్గాల్లో బాహాటంగానే జరుగుతోంది. కిరణ్‌పై ఎలాంటి అవినీతి ఆరోపణలు లేనప్పటికీ... సీని యర్‌ అయినా ఆయనకు ఇతరులతో చొరవ తీసుకునే లక్షణం గానీ, అందరినీ సమన్వయం చేసుకునే శైలిగానీ లేవు. ఫలితంగా పార్టీకి- ప్రభుత్వానికి దూరం పెరుగు తోంది.

సీనియర్‌ మంత్రులు కిరణ్‌ను మానసికంగా సీఎంగా అంగీకరించడం లేదు. అసలు బొత్సకు పీసీసీ ఇవ్వడం సీఎంకు సుతరాము ఇష్టం లేదన్నది బహిరంగ రహస్యం. దూకుడుగా వెళ్లడం, చొర వ తీసుకుని అన్ని వర్గాలను దగ్గరకు తీసే నైజం ఉన్న బొత్సకు పీసీసీ పగ్గాలు ఇస్తే తనకు ఏకుమేకవుతారన్న భయం కిరణ్‌లో లేకపోలేదంటున్నారు. అందుకే బొత్సకు అవకాశాలు రాకుండా అడ్డుపడుతూ వస్తున్నారు. మొన్నటి వరకూ పీసీసీ చీఫ్‌గా పనిచేసిన డీఎస్‌కు మండలి సభ్యత్వం దక్కకుండా చూడటంలో విజయం సాధించిన కిరణ్‌, ఈసారి బొత్స విషయంలో మాత్రం సఫలం కాలేకపోయారు.

స్పీకర్‌గా నాదెండ్ల మనోహర్‌, మండలి చైర్మన్‌ చక్రపాణికి ఆ పదవులు రాకుండా కిరణ్‌ అడ్డుపడినప్పటికీ మాజీ ముఖ్యమంత్రి కొణిజేటి రోశయ్య చక్రం తిప్పడంతో వారిద్దరికీ ఆ పదవులు దక్కాయన్నది బహిరంగ రహస్యం. అదే సమయంలో బొత్స విషయంలో కూడా రోశయ్య సిఫారసు పనిచేసిందని పార్టీ వర్గాలు బాహాటంగానే చెబుతున్నాయి. అసలు రాష్ట్రంలో పార్టీ-ప్రభుత్వానికి సంబంధించి ఇటీవల జరిగిన ఏ ఒక్క నియామకం కూడా కిరణ్‌కు ముందస్తు సమాచారం కూడా లేదన్న ప్రచారం జరుగుతోంది.
బొత్స పీసీసీ సారథిగా రావడంతో కిరణ్‌కు కష్టాలు తప్పవంటున్నారు.

అన్ని వర్గాలతో సన్నిహితంగా వ్యవహరించే బొత్స పార్టీ నేతలందరినీ ఒక్కతాటిపైకి తీసుకువచ్చి, సమాంతర పాలన సాగిస్తే కొత్త సమస్యలొస్తాయన్న ఆందోళన కూడా లేకపోలేదంటున్నారు. మంత్రులు-ఎమ్మెల్యేలను సమన్వయం చేసుకుంటే భవిష్యత్తులో తనకు ప్రమాదమేనన్న ఆందోళన కూడా కిరణ్‌కు ఉందని చెబుతున్నారు.ప్రభుత్వంతో పార్టీని సమాంతరంగా నడిపిస్తే కిరణ్‌ ఇమేజ్‌ కంటే, బొత్స ఇమేజే సహజంగా ఎక్కువ పెరుగుతుందని పార్టీ వర్గాలు విశ్లేషిస్తున్నాయి. గతంలో వైఎస్‌ ఉన్నప్పుడు డీఎస్‌ పీసీసీ చీఫ్‌గా ఉన్నప్పటికీ, ఆయన డీఎస్‌ను ఏ విషయంలోనూ జోక్యం చేసుకునే అవకాశం ఇచ్చేవారు కాదు. అధిష్ఠానం వద్ద వైఎస్‌కు ఉన్న పలుకుబడి గ్రహించిన డీఎస్‌ మౌనంగానే ఉండేవారు. దానితో పార్టీ వైఎస్‌ చుట్టూ తిరిగి, చివరకు కాంగ్రెస్‌ను ఓ ప్రాంతీయపార్టీగా మారింది. వైఎస్‌ మృతి చెందిన తర్వాత రాష్ట్ర కాంగ్రెస్‌ ముక్కలయిపోవడంతో పార్టీకి తాను చేసిన తప్పేమిటో తెలిసొచ్చింది.

బొత్స నియామకం బట్టి... వైఎస్‌ మాదిరిగా కిరణ్‌ ఎదగకుండా, ఆయనకు చెక్‌ పెట్టి రాష్ట్రంలో పార్టీని కాపాడుకోవాలన్న వ్యూహమే నాయకత్వ నిర్ణయాన్ని చాటుతో ంది. బొత్స సహజ మనస్తత్వ ప్రకారం.. డీఎస్‌లా మౌనంగా, అన్నిటికీ సర్దుకుని పోయే నైజం కాదు. పీసీసీ అధ్యక్షుడిగా పార్టీని పటిష్టం చేసే క్రమంలో కార్పొరేషన్‌ చైర్మన్‌ నుంచి ఇతర నామినేటెడ్‌ పదవుల పంపిణీ వరకూ పార్టీ నేతలకు వాటా కల్పించాలని బొత్స పట్టుపట్టే అవకాశాలే ఎక్కువగా ఉంటాయి.పీసీసీ అధ్యక్షుడిగా తనను తాను నిరూపించుకున్న తర్వాత ముఖ్యమంత్రి పీఠంపై కూర్చోవాలన్నది బొత్స అసలు లక్ష్యం. ఆ లక్ష్యసాధన కోసమయినా బొత్స అహర్నిశలు పార్టీ కోసం కష్టపడటం ఖాయం. ఈ క్రమంలో కిరణ్‌-బొత్స మధ్య దూరం పెరగడం అనివార్యమని పార్టీ వర్గాలు స్పష్టం చేస్తున్నాయి.

ఈ సీజన్‌లో బెస్ట్

ఎండలు తగ్గాయ్. చిరుజల్లులు మొదలయ్యాయి. ఒక్కసారిగా సీజన్ మారేసరికి మన శరీరం వెంటనే అడ్జస్ట్ కాలేదు. అందుకే జలుబు, తలనొప్పి, దగ్గు లాంటి ఇబ్బందులు ఎదురవుతాయి. ఇలా సీజన్ మారినప్పుడల్లా ఇబ్బంది పెట్టే ఇలాంటి సమస్యల నుంచి తప్పించుకోవాలంటే ఏం చేయాలో సూచిస్తున్నారు నిపుణులు.

* శరీరం ఫిట్‌గా ఉండాలంటే వ్యాధినిరోధక సామర్థ్యం బావుండాలి. ఇది మనం తీసుకునే ఆహారం నుంచే డెవలప్ అవుతుంది.
* ఆకుకూరలు, పండ్లు, డ్రైఫ్రూట్స్ మంచి పోషకాలను అందించడమే కాదు.. వ్యాధినిరోధక శక్తిని కూడా పెంచుతాయని అధ్యయనాలు తెలుపుతున్నాయి.
* ఎండాకాలంలో చల్లదనాన్ని పెంచే నిమ్మ చల్లని వాతవరణంలో తీసుకోవద్దని అనుకుంటారు. దానివల్ల జలుబు చేస్తుందన్న అపోహ కూడా చాలామందిలో ఉంది.

నిజానికి నిమ్మ వల్ల శరీరం చైతన్యవంతం అవుతుంది. వ్యాధి నిరోధక వ్యవస్థ పునరుత్తేజితం అవుతుంది. ఇమ్యూనిటీ పెరుగుతుంది. కాబట్టి తరచుగా నిమ్మరసం తీసుకుంటే జలుబు లాంటి ఇబ్బందులు తగ్గుతాయి కూడా.

నెమ్మదినెమ్మదిగా ఉప్పు వాడకాన్ని తగ్గించండి.

వండుకుని తినేందుకు టైం ఉండడం లేదంటూ ఫాస్ట్‌ఫుడ్ మీద ఆధారపడుతున్నారు ఎక్కువమంది. టైం వృథా కాకుండా ఉంటుంది. అంతవరకు ఒకె. కాని ఆరోగ్యం గురించి ఆలోచిస్తున్నారా? ఎందుకంటే ఫాస్ట్‌ఫుడ్‌ను రోజూ తింటే ఎముకల పైన ఉండే త్వచం పలుచబడడమే కాకుండా ఎముకల సాంద్రత కూడా తగ్గిపోతుంది. మొత్తం మీద ఎముకలు బలహీనంగా తయారవుతాయన్నమాట. అది సరే కాని ఫాస్ట్‌ఫుడ్‌కి దీనికి సంబంధం ఏముందనిపిస్తోందా? ఫాస్ట్‌ఫుడ్ నిల్వ ఉండడం కోసం ఎక్కువ ఉప్పు వినియోగిస్తుంటారు. దాంతో శరీరంలోకి ఎక్కువ ఉప్పు చేరిపోయి కాల్షియం బయటకు పంపబడుతుంది. అందుకనే ఉప్పు తక్కువగా తినమనేది. ముఖ్యంగా ఆడవాళ్లు తక్కువ ఉప్పు తీసుకోవాలి. లేకపోతే నెలసరికి వారం ముందు శరీరంలోకి నీరు చేరి ఉబ్బినట్టు తయారవుతారు. అందుకే ఆహారంలో ఉప్పు మోతాదును తగ్గించాలి.

- ప్యాకేజి ఆహారాన్ని కొనేప్పుడు ప్యాకెట్ పైన రాసి ఉన్న పోషకవిలువల సమాచారాన్ని చదవాలి. తక్కువ ఉప్పు ఉన్న పదార్ధాలనే కొనాలి.

-వంటల్లో ఉప్పు తగ్గించేయాలి. తినేటప్పుడు ఉప్పును ఆహారపదార్ధాలపైన చల్లుకునే అలవాటును మానుకోవాలి.

-బంగాళాదుంపల చిప్స్ వంటి స్నాక్స్ మానేయాలి. అలాగే చీజ్, ప్రాసెస్డ్ ఫుడ్స్, రెడీ ఈట్ ఫుడ్‌కు దూరంగా ఉండాలి.

-వంట సాస్ వాడకం తగ్గించాలి. సీజనింగ్ కోసం వాడే సాయ్, చిల్లీ, సలాడ్ డ్రస్సింగ్, మస్టర్డ్ సాస్ వంటి వాటిలో ఉప్పు చాలా ఎక్కువగా ఉంటుంది. అందుకని వాటిని వంట గదికి దూరంగా ఉంచాలి.

-పళ్లు, కాయగూరలు వంటి పొటాషియం ఎక్కువగా ఉన్న ఆహారాన్ని తినాలి. అరటిపండ్లు, పాలకూర, గెనుసుగడ్డ (స్వీట్ పొటాటో), పప్పు ధాన్యాలు, సోయా, చిక్కుడు గింజలు, రాజ్మా వంటివి ఆహారంలో చేర్చితే సోడియం వల్ల కలిగే రక్తపీడన లోపాన్ని అధిగమించవచ్చు.

ఏమీ తినకుండా మూతికట్టుకు కూర్చుంటే ఎలా? బతికిన కొన్నాళ్లు జిహ్వ చాపల్యాన్ని చంపుకోలేం దొరికిందంతా తింటాం. మాకివన్నీ చెప్పొద్దు అనే వాళ్లు కూడా శరీరంలోకి అధికంగా చేరే సోడియంను తగ్గించుకోవచ్చు. పచ్చళ్లు, పాపడ్లు, చట్నీలు తినకుండా ఉండలేం అనే వాళ్లు కూడా ఉప్పును దూరంగా ఉంచొచ్చు. అందుకు ఏం చేయాలంటే...

- ఒక్కో మీల్‌కి నాలుగు నుంచి ఆరు గంటల ఖాళీ ఉండాలి.

- ఆ ఖాళీ సమయంలో నాలుగు నుంచి ఆరు గ్లాసుల నీళ్లు, రెండు గ్లాసుల కొబ్బరి నీళ్లు లేదా ఒక గ్లాసు టొమాటో రసం తాగాలి. టొమాటో రసంలో ఉప్పు వేయకూడదు. ఇలా చేస్తే శరీరంలోకి చేరిన అదనపు సోడియంను వేరు చేసే అవకాశం ఉంటుంది.

-రోజూ 30 నిమిషాల బ్రిస్క్ వాక్ చేయాలి. ఇలాచేస్తే శరీరంలో అదనంగా ఉన్న సోడియం స్వేదం రూపంలో బయటకుపోతుంది.

- ఉప్పు ఎక్కువగా ఉన్న ఒక మీల్ తరువాత తీసుకునే రెండవ మీల్‌లో కీరదోసకాయ ముక్కలు, టొమాటోలు, అర చెక్క యాపిల్, కారెట్ తురుము, దానిమ్మ గింజలు సగం వేసిన సలాడ్‌ను లాగించండి. గుర్తుంచుకోవాల్సిన విషయం ఏమిటంటే ఈ సలాడ్‌లో కూడా ఉప్పు కలపొద్దు.

- ఒక్కసారిగా కాకపోయినా నెమ్మదినెమ్మదిగా ఉప్పు వాడకాన్ని తగ్గించండి. ఉప్పు తగ్గించిన పదార్ధాలను తినేందుకు రెండు నుంచి మూడు వారాలు రుచిమొగ్గలు అలవాటుపడేందుకు టైం పడుతుంది. ఆ తరువాత నుంచి తక్కువ ఉప్పు ఉన్న ఆహారపు రుచిని ఎంజాయ్ చేయడం మొదలుపెడతారు.

ఇప్పుడు పరీక్ష వైయస్ జగన్‌కే

తెలుగుదేశం పార్టీ అధ్యక్షుడు నారా చంద్రబాబు నాయుడికి గురి చూసి కొట్టిన బంతి తిరిగి వైయస్సార్ కాంగ్రెసు పార్టీ అధ్యక్షుడు వైయస్ జగన్ కోర్టులోనే పడింది. ఇప్పుడు పరీక్ష వైయస్ జగన్‌కే గానీ, చంద్రబాబు నాయుడికో, ముఖ్యమంత్రి కిరణ్ కుమార్ రెడ్డికో కాదు. కాంగ్రెసుతో కుమ్మక్కు కావడం వల్లనే చంద్రబాబు ప్రభుత్వంపై అవిశ్వాసం ప్రతిపాదించడం లేదని వైయస్ జగన్ పదే పదే వ్యాఖ్యానిస్తూ వచ్చారు. చంద్రబాబు అవిశ్వాసం ప్రతిపాదిస్తే తమ సత్తా ఏమిటో చూపిస్తామని సవాల్ చేశారు. ప్రధాన ప్రతిపక్షంగా అవిశ్వాసం ప్రతిపాదించాల్సిన బాధ్యత తెలుగుదేశం పార్టీదేనని చెబుతూ వచ్చారు. మధ్యంతర ఎన్నికలకు భయపడి చంద్రబాబు అవిశ్వాస తీర్మానం ప్రతిపాదించబోరని ఆయన అనుకుని ఆ రకంగా మాట్లాడుతూ వచ్చి ఉంటారు. కానీ, చంద్రబాబు కర్రు కాల్చి వాత పెట్టినంత పని చేశారు.

అనూహ్యంగా అవిశ్వాస తీర్మానం ప్రతిపాదనను ముందుకు తెచ్చి వైయస్ జగన్‌కు పరీక్ష పెట్టారు. ఇప్పుడు జగన్ తన బలాన్ని నిరూపించుకోవాల్సిన అనివార్యతలో పడ్డారు. తమకు మ్యాజిక్ ఫిగర్ కన్నా ఒక ఎమ్మెల్యే ఎక్కువే ఉన్నారని అంటూ వచ్చిన వైయస్సార్ కాంగ్రెసు పార్టీకి అసలు పరీక్ష ఎదురవుతోంది. చంద్రబాబు అవిశ్వాస తీర్మాన అస్త్రాన్ని వెలికి తీయడంతో జగన్ తన జెరూసలేం పర్యటనను రద్దు చేసుకున్నారు. తమ పార్టీ ముఖ్య నేతలతో నిరంతరం చర్చలు జరుపుతున్నారు. అవిశ్వాస తీర్మానంపై అనుసరించాల్సిన వ్యూహాన్ని ఖరారు చేసుకోవడంలో ఆయన మల్లగుల్లాలు పడుతున్నారు. ప్రభుత్వాన్ని పడగొట్టాలంటే జగన్‌కు కనీసం 40 మంది కాంగ్రెసు శాసనసభ్యుల మద్దతు కావాల్సి ఉంటుంది. అంత మంది శాసనసభ్యులను జగన్ చీల్చగలుగుతారా అనేది అనుమానమే.

పార్టీ నిర్మాణంపై, సంస్థాగత వ్యవహారాలపై జగన్ దృష్టి పెట్టిన సందర్భంలో చంద్రబాబు అవిశ్వాస తీర్మానం ప్రతిపాదించి దృష్టి మళ్లించారు. వైయస్ జగన్ వెంట 27 మంది శానససభ్యుల దాకా ఉన్నట్లు ఇప్పటి వరకు అంచనాలు సాగుతూ వచ్చాయి. వీరిలో 25 మంది దాకా కాంగ్రెసు ఎమ్మెలున్నారని చెబుతూ వచ్చారు. కానీ, ఆ బలం కూడా ఉంటుందా, ఉండదా అనేది ఇప్పుడు అనుమానంగా మారింది. శాసనసభ్యురాలిగా వైయస్ విజయమ్మ చేసిన ప్రమాణ స్వీకార కార్యక్రమానికి 10 మది శాసనసభ్యులు హాజరయ్యారు. ఈ పది మంది కచ్చితంగా జగన్ వైపు ఉండే అవకాశాలున్నాయని అనుకోవచ్చు.

తమకు సరైన బలం లేదని గ్రహించిన వైయస్సార్ కాంగ్రెసు పార్టీ నాయకులు ఇప్పుడు ఆత్మప్రబోధానుసారం ఓటేయాలనే అంశాన్ని ముందుకు తెచ్చారు. ఆత్మప్రబోధానుసారం ఓటు చేసి ప్రభుత్వాన్ని కూల్చాలని వారు కాంగ్రెసు శాసనసభ్యులకు పిలుపునిస్తున్నారు. ఇంకా మూడేళ్ల కాలవ్యవధి ఉన్న నేపథ్యంలో ప్రభుత్వాన్ని కూల్చడానికి ముందుకు వస్తారా అనేది అనుమానమే. తన దయాదాక్షిణ్యాల మీద ప్రభుత్వం మనుగడ సాగిస్తోందని, తాను కన్నెర్ర చేస్తే ప్రభుత్వం పడిపోతుందని చెబుతూ వచ్చిన వైయస్ జగన్‌కు ఇది అసలు సిసలైన పరీక్ష అనడంలో సందేహం లేదు.

వైయస్ జగన్ వెంట 34 మంది శానససభ్యులు

వైయస్సార్ కాంగ్రెసు పార్టీ అధ్యక్షుడు వైయస్ జగన్ వెంట 34 మంది శానససభ్యులున్నారనే ప్రచారం జరుగుతోంది. మరో ఆరుగురిని కూడగడితే ప్రభుత్వాన్ని కూల్చడం సాధ్యమవుతుందనే ప్రచారం జరుగుతోంది. అయితే, వైయస్ జగన్ శుక్రవారం సాయంత్రం ముఖ్య నేతలతో ఏర్పాటు చేసిన సమావేశానికి వైయస్సార్ కాంగ్రెసు పార్టీ శానససభ్యురాలు వైయస్ విజయమ్మ కాకుండా 22 మంది శాసనసభ్యులు హాజరయ్యారు. కుంజా సత్యవతి, నల్లపురెడ్డి ప్రసన్నకుమార్ రెడ్డి, రామకృష్ణా రెడ్డి, సుచరిత, రామచంద్రా రెడ్డి, రవి, ఆదినారాయణ రెడ్డి, మేకపాటి చంద్రశేఖర రెడ్డి, కొండా సురేఖ, శేషారెడ్డి, ద్వారంపూడి చంద్రశేఖర రెడ్డి, ప్రసాద రాజు, బాలరాజు, కొర్ల భారతి, ధర్మాన కృష్ణదాస్, బాబూరావు, శ్రీనివాసులు, శివప్రసాద్ రెడ్డి, శ్రీకాంత్ రెడ్డి, జయసుధ, శోభానాగి రెడ్డి, అమర్నాథ్ రెడ్డి శుక్రవారంనాటి సమావేశానికి హాజరయ్యారు.

నిక్కచ్చిగా జగన్ వెంట నడిచే బాలినేని శ్రీనివాస రెడ్డి, పిల్లి సుభాష్ చంద్రబోస్ సమావేశానికి రాలేదు. వీరిద్దరు జగన్ వెంటే ఉంటారని కచ్చితంగా చెప్పవచ్చు. ఆళ్ల నాని, జోగి రమేష్ వంటి శాసనసభ్యులు కూడా జగన్ వెంట ఉంటారని భావిస్తున్నారు. పలువురు శాసనసభ్యులతో జగన్ ఫోన్‌లో మాట్లాడినట్లు చెబుతున్నారు. శాసనసభ్యురాలిగా వైయస్ విజయమ్మ ప్రమాణ స్వీకారానికి శుక్రవారం ఉదయం 13 మంది శాసనసభ్యులు వచ్చారు. సాయంత్రానికి ఆ సంఖ్య 22కి పెరిగింది. స్పీకర్ ఎన్నిక విషయంలో, అవిశ్వాస తీర్మానం విషయంలో అనుసరించాల్సిన వ్యూహంపై జగన్ శానససభ్యులతో విడివిడిగా మాట్లాడుతున్నట్లు సమాచారం. ప్రభుత్వాన్ని కూల్చడానికి అవసరమైన సంఖ్యను కూడగట్టేందుకు జగన్ తీవ్రంగా ప్రయత్నాలు సాగిస్తున్నట్లు చెబుతున్నారు.

ముఖ్యనేతల సమావేశానికి కాంగ్రెసు పార్లమెంటు సభ్యుడు మేకపాటి రాజమోహన్ రెడ్డి, ఎమ్మెల్సీలు కొండా మురళి, జూపూడి ప్రభాకర రావు, పుల్లా పద్మావతి కూడా హాజరయ్యారు. ప్రస్తుత స్థితిని బట్టి అవిశ్వాస తీర్మానం రాజకీయం రసకందాయంలో పడిందనే చెప్పాలి.

బలం లేక పోయినా బాబుగారు బకరా అవడానికా

మేడం చెప్పిన సభాపతుల ను
ఎన్నుకొనే సంబరానికి పాలకులు
సన్నద్దమవుతుంటే
సందట్లో సడేమియాలా
బాబు గారు తన పార్టీ నుండి
పోటీకి పెడుతున్నాడు.

బలం లేక పోయినా
బకరా అవడానికా అనే సందేహం
అందరికీ వస్తుంది.

ఇటీవల ఏ పార్టీని కదిపినా
ఎదుటి పార్టీలు రెండూ
మ్యాచ్ ఫిక్సింగు చేసుకొన్నాయి అని
మాటల తూటాలు పేల్చుతున్నారు.

బాబు గారు తమ్ముళ్ళ తరుపున పోటీ తో
తుపాకీ పేల్చుతున్నారు.

ఇక్కడ జగన్ గ్యాంగు సాహసం చేస్తే
అనర్హత వేటు పడుతుంది.

సాహసం చేయక పొతే
గురి తప్పి తుస్స్ మంటుంది అని అనుకొంటే పొరబాటే.

తూచ్ మీరిద్దరే మ్యాచ్ ఫిక్సింగు చేసుకొన్నారు అని
అనడానికి పనికి వస్తుంది.

పనిలో పనిగా తెలుగు తమ్ముల్లలో తెలంగాణా వారిని పెడితే
మొత్తం తెలంగాణా ప్రజా ప్రతినిధులు
నానా పాట్లు పడి గింజుకొంటారు.

తిరుపతి ప్రజాపతినిది పత్తాలేడు

రాజ్యం నేత
తమ ప్రజా ప్రతినిధి
కనిపించడం లేదని
తిరుపతి వెటర్నరీ విద్యార్థులు
వాల్ పోస్టర్లు వేసి నిరసన తెలుపుతున్నారు
పోలీస్ స్టేషన్ లో కూడా కంప్లైంట్ చేసారు.

సినిమాల్లో నటించక తన బొమ్మ ఉన్న పోస్టర్ ను
చూసుకోక చాన్నాల్లైందని
ఇలాగైనా నా బొమ్మ కనిపించదని మురుసిపోతాడో
లేక సామాజిక న్యాయం పై
సోనియా ఇంట్లో జరగబోయే చర్చల్లో
మునిగి తేలుతున్నానని
బదులు ఇచ్చి బడాయి పోతాడో చూడాలి.

ఆ అరవోడు ఎవరు

ఆ అరవోడు ఎవరు మాకు చెప్పడానికి
అని మన రాష్ట్ర పార్టీలు అరిచి చెప్పినా
అన్నీ తెలిసిన ఆయన గారు మాత్రం
తెలంగాణా పై తన గానాన్ని వినిపిస్తూ
అన్ని పార్టీలు ఒప్పుకొంటే
అఖిల పక్ష సమావేశం ఏర్పాటు చేసి
ఏకాభిప్రాయానికి కృషి చేసి
తెలంగాణా పై తేల్చేస్తామని
మరో సారి మన తెలంగాణా వాదులను
తెల్లబోయేట్టు చేసారు.

అవతల తెలంగాణా ఆచార్యులు మాత్రం
కారు అద్దాలు దించకుండా ప్రయాణిస్తూ
కమలం కనిపిస్తే మాత్రం కరచాలనం చేసి వస్తున్నారు.

జెండాలన్నీ పక్కన బెట్టి
అందరినీ కలుపుకుని
ఉద్యమించే విషయంలో
ఎవరూ ఎలాంటి చొరవా చూపించక పోవడం చూస్తుంటే
ఎవరికీ తెలంగాణా రావడం ఇష్టం లేనట్టు ఉంది.

ఉస్మానియా విద్యార్థుల జాక్ కూడా
హైజాక్ కాబడినట్లే కనిపిస్తోంది.
వాళ్ళు కూడా ఈ విషయంలో
వింతగా ప్రవర్తిస్తున్నారు.

మొత్తానికి అందరూ కలిసి
ఆశలు పెట్టుకొన్న
అమాయక జీవికి
తమకు తెలంగాణా దక్కదు
కానీ మేమూ పోరాడాము అని
చెప్పుకొనే దిశ గా
ఉద్యమం దిక్కులు చూసేలా చేస్తున్నారు.

టీ ఆర్ పీ రేటింగుల కోసం ఉపయోగించబడే కుక్కల గోల తప్ప.

పంచ కట్టాడు
ప్రతిపక్షంగా విశ్వాస పరీక్ష పెట్టిస్తా అని అంటున్నాడు

ఒక్క ఎం ఎల్ ఏ తో ఉన్నాయన
మాజిక్ ఫిగరు కన్నా ఎక్కువ
బలముందని దింపే వరకు
మడమ తిప్పేది లేదు అని అంటున్నాడు

గతంలో పంచలూడ గొట్టండి అని అన్నా
ఇప్పుడు నాలుక కరుచుకొని
పడగొడితే నిలబెడుతా అని అంటున్నాడు మరొకాయన

వేర్పాటు వాద పార్టీ
అవిశ్వాసం పెట్టండి
మేము మద్దతు ఇస్తాము అని అంటున్నారు

నిజ్జంగా విశ్వాస పరీక్ష జరిగి
ప్రభుత్వం పడితే వెంటనే ఏమౌతుంది
పడక పొతే ఏమౌతుంది?

రైతుల కష్టాల పేరుతో పెట్టే పరీక్షా ఫలితం
గోనే పట్టలు సిద్దం చేస్తుందా?
కరిచే కుక్కలను కరవకుండా చేస్తుందా?
టీ ఆర్ పీ రేటింగుల కోసం
ఉపయోగించబడే కుక్కల గోల తప్ప.

‘చేతి’ డబ్బు సంచులు మొత్తం స్విస్ బ్యాంకు లోనే ఉన్నట్టు ఉంది

యోగా బాబా రాం దేవ్ సత్యాగ్రహం అంటూ
హస్తిన అడుగిడిన మరుక్షణం
అమ్మగారి సేనా పతులు
ప్రణభ్, సిబాల్, బన్సాల్
విమానాశ్రయానికి వచ్చి మరీ
స్వాగతం చెప్పి మంతనాలు జరుపుతున్నారంట
చూస్తుంటే ప్రభుత్వానికి చెమటలు పడుతున్నట్టు ఉంది
నల్ల దానం వెలికితీయడానికి వెనుకాడడం చూస్తుంటే
‘చేతి’ డబ్బు సంచులు మొత్తం స్విస్ బ్యాంకు లోనే ఉన్నట్టు ఉంద.

తామర కూడా తన వంతు ప్రయత్నిస్తోంది

బురదలో వికసించడానికి బదులు
కూరుకు పోతున్న తామరను
కర్ణాటక కుర్చీ పై పెట్టాలని
ఘనుల దోపిడీదారులను దోసిట పట్టి
వారి పుణ్యాన పాలకులుగా పులకరిస్తూ
ఇప్పుడు వాళ్ళు పాపాత్ములుగా తేలుతున్న సమయాన
సుష్మా లాంటి వాళ్ళు
ఘనుల దొరలను దోసిట పట్టింది
నేను కాదంటే నేను కాదని
కడిగేసుకో చూస్తున్నారు చోద్యంగా.

తాము అధికారంలోకి వస్తే
వెంటనే తెలంగాణా అని
తీరా ప్రధాని పీటమెక్కిన పద్మం
ఇస్తే తామర హస్తిన కుర్చీ నుండి కింద పడుతుందని
తెప్ప తగలెట్టి తామూ ఆ తానూ ముక్కలే అని
తెలంగాణా వారికి తేట తెల్లం చేసారు.

ఇప్పుడు కొత్తగా
మరో సారి అధికారంలోకి వస్తే
మొదటగా చేసే పని తెలంగాణా ఇవ్వడమే అని
వింతగా మరో సారి వినుకోండి అని విన్నాపాలు చేస్తున్నారు.

వినే వాడి వెఱ్రిని బట్టి
రాజకీయ నాయకులు
తమకు తాళం వేసే లా
తమ నాలుకను నాట్యం చేయిస్తారు.
అందుకే కొత్తగా తామర కూడా తన వంతు ప్రయత్నిస్తోంది.

మన టోకెన్ ఎప్పుడు?

అరవ’జీ’లు ఇద్దరు ఎంత అరిచి మొత్తుకున్నా
కటకటాల వెనక కాలం వెళ్ళబుచ్చుతున్నారు
తాజాగా ౨ జీ లో ఇంకో జీ చుట్టూ ఉచ్చు బిగుస్తోంది
‘చెయ్యి’ దాటిపోయి సుప్రీం దగ్గర
ఏమి సుద్దులు వినాల్సి వస్తుందో అని
ఆ మూడో జీ నే సమాధానం చెప్పాలి అని
మనీష్ తివారీ మట్టి దులుపుకొన్నాడు.

కన్నడ నాట
కనకాడంబరాలతో
ఎదురులేదనుకొంటున్న
ఘనులకు కుర్చీ ఏసింది
నేను కాదంటే నేను కాదని
అందిన ముందస్తు ఉప్పుతో
కమల నాయకులు కలవరపడిపోతూ
కడిగేసుకోడానికి చూస్తున్నారు

ఆంధ్రాలో
అవినీతిపరులకు కూడా
అన్నీ సిద్దం చేస్తున్నారు
పాపం వీళ్లేమో పార్టీ అంటూ
అప్పుడే టికెట్ల సర్వేలు
గెలుపోటముల సర్వేలతో
ఊహల్లో తేలుతున్నారు
సమరం ముందు
సమస్యల్లోకి నెట్టబడి
ఊచలు లెక్కించ బడే సన్నివేశాలను మాత్రం
మాట మాత్రంగా కూడా
మదిలో రానియ్యడం లేదు.

వీళ్ళను తెలబాన్లు అంటే తప్పేంటి

ఉస్మానియా విద్యార్థుల ముసుగుల్లో ఉన్మాదులు
ఊరకుక్కల్లా ఊగిపోతూ
దాష్టీకాలు చేస్తే దానిని ఉద్యమం అనాలి.

తిరగబడి ఎదురు దాడి చేస్తే
ఉద్యమ కారులపైన దౌర్జన్యం అని ఖండించాలి.

అదే ఉన్మాదులు
ఇచ్చే పాలకుల దగ్గర పిల్లుల్లా ఉంటే
ఉలుకూ పలుకూ లేని ఉన్మాదుల నాయకుడిని
ఉద్యమ నాయకుడు అని ఒప్పుకోవాలి.

ప్రజాస్వామ్యంలో పక్క పార్టీలను అణచడానికి
ఆచరిస్తున్న పెడ ధోరణులకు
ఉద్యమం అని పేరెట్టుకొని
పెట్రేగి పోతున్న వీళ్ళను తెలబాన్లు అంటే తప్పేంటి.

రాజకీయాల కోసం మామ కోపాన్ని దిగమింగుకొన్నాడు.

అల్లుడా మజాకా
చూసి అలా తానూ అవ్వాలనో ఏమిటో
చిరంజీవికే అల్లుడై
అల్లుడా మజాకా చూపిస్తే
రాజకీయాల కోసం మామ కోపాన్ని
దిగమింగుకొన్నాడు.

ఎందుకోసమైతే తను సహించాడో
అదే రానప్పుడు
అసలు రూపం చూపాడు అల్లుడికి.

పాపం సుప్రీం కోర్టు కూడా సుప్రీం హీరో అల్లుడికి
బైలు నిరాకరించింది.

విశ్వసనీయతకు మారు పేరైన కుక్కలు.

రాజా గారు జనాలకు ఆరోగ్యశ్రీ కార్డులు ఇచ్చి
తమకు ఇచ్చే లోపుల పోయాడని
రోశయ్య నుండి కిరణ్ వరకు ఇస్తారేమో నని
చూసి విసిగి అలిగి
అరిచే ఓపిక కూడా లేక
జనాలను కరుస్తూ తమ నిరసన తెలుపుతున్నాయి
విశ్వసనీయతకు మారు పేరైన కుక్కలు.

విశ్వసనీయతకు మారు పేరైన
ఆయనే ఉంటే ఆరోగ్య శ్రీ కార్డు వచ్చి
రేబిస్ రాకుండా టీకాలు వేయించుకొని ఉండేవేమో.

కనీసం ఉండవల్లి లాంటి వాళ్ళు కూడా
జరుగుతున్నా అన్యాయం పై
ఉలుకూ పలుకూ లేకపోయే సరికి
పౌరుషం వచ్చిందేమో.

దానితో పాటు పొద్దున్న
తాము అరవడం కన్నా ముందే
తమ బాషను రాజకీయ నాయకులు
యదేక్షగా టీ వీ లైవ్ షో లలో వాడేసుకొంటూ
తిట్టుకోడానికి తమతో కంపేర్ చేసుకొంటున్నారని
కంపరమెత్తి కక్ష గట్టాయా అన్నట్టుగా
అన్నిప్రాంతాల్లో ఏ పార్టీ కూడా చొచ్చుకు పోలేక
విఫలమౌతున్న సమయానా
ఇవి మాత్రం సందు సందు కూ సందడి చేస్తూ
అన్ని ప్రాంతాల్లోనూ తమ ప్రతాపం చూపిస్తున్నాయి.

ఏడుపు తుడిచే పని ప్రస్తుతానికి ఆపినా..

కొత్తగా కట్టిన అసెంబ్లీ
అమ్మకానికి పెడుతున్నారంటగా
మా మహా నేత తనయుడు యువనేత
దక్షిణాదిలో ప్రతి రాష్ట్రంలో
ఓ కోట ఉండేలా చూసుకొంటున్నాడు
మీదే కొనేస్తాడు
కానీ మీరు కొంచం సమయం ఇవ్వాలి
ఏడుపు తుడిచే పని ప్రస్తుతానికి ఆపినా
కన్నెర్ర చేసే కార్యక్రమం ఒకటి పెట్టుకొన్నారు
అదైన వెంటనే
దేవుడు దగ్గర ప్లీనరీ ఒకటి పెట్టుకొన్నారు
దానితో చిరంజీవి తరువాత
సునామీ సృష్టించేది తామే అని
నిరూపించుకొనే పనిలో
నిమిషం తీరిక లేకున్నారు.

రాజ్యం నేతకు ఆటలో అరటిపండు స్థానం ఇచ్చారు.

అధికారం ఇవ్వండి అని సునామీ సృష్టిస్తే
ఎగబడి వచ్చి చూసి ఎన్నో ఆశలు కల్పించిన జనాలు
రాజ్యం నేతకు ఆటలో అరటిపండు స్థానం ఇచ్చారు.

ఆ తరువాత పక్కలో బల్లెంలా తయారైన మీడియా
ప్రతిసారీ ప్రతి విషయం లో
రేటింగుల కోసం అరటి పండును చేసారు.

గౌరవ నిమజ్జనానికి
జనపద్ దగ్గర పడిగాపులు కాస్తూ
ఏదన్న విదిలిస్తారు అని ఎదురు చూస్తుంటే
ఎం ఎల్ సీ ఎంగిలి మెతుకులు కూడా విదల్చక
ఆటలో అరటిపండు స్థానానికి
భంగం వాటిల్లకుండా
వాటేసుకొంటామని వంచిస్తున్నారు.

విసిగించకండి: చంద్రబాబు పనితీరుపై హరికృష్ణ గరం గరం

తెలుగుదేశం పార్టీ రాజ్యసభ సభ్యుడు నందమూరి హరికృష్ణ శనివారం మహానాడులో సీతయ్య అవతారమెత్తారు. పార్టీ అధ్యక్షుడు నారా చంద్రబాబు నాయుడిపై పార్టీ నాయకుల మద్ద ఆగ్రహం వ్యక్తం చేశారు. తన మనోవేదనను పార్టీ నాయకుల వద్ద వెళ్లబోసుకున్నారు. మహానాడులో మాట్లాడాలని పార్టీ నాయకులు కె. ఎర్రంనాయుడు, యనమల రామకృష్ణుడు చేసిన విజ్ఞప్తిని ఆయన తోసిపుచ్చారు. తాను మాట్లాడలేనని, తనను విసిగించవద్దని ఆయన వారితో అన్నారు. తాను మాట్లాడకపోవడానికి కారణాలు తర్వాత చెప్తానని ఆయన అన్నారు.

చంద్రబాబు నాయుడు ఏకపక్ష ధోరణితో వ్యవహరిస్తున్నారని, ఎవరి అభిప్రాయాలను కూడా పరిగణనలోకి తీసుకోవడం లేదని ఆయన ఆవేదన వ్యక్తం చేసినట్లు సమాచారం. చంద్రబాబు ఏకపక్ష ధోరణి వల్ల పార్టీ నష్టపోతోందని ఆయన అన్నారు. తాను వారసత్వ పోరు గురించి మాట్లాడడం లేదని, పార్టీని రక్షించుకోవాలన్నదే తన ఉద్దేశమని ఆయన అన్నారు. కరీంనగర్ రణభేరీని ఎప్పుడో నిర్వహించాలని తాను సూచించినా పట్టించుకోలేదని ఆయన అన్నారు. పులివెందులలో వైయస్ విజయమ్మపై పోటీకి దిగకూడదని, జగన్‌పై పోరాటం చేయాలని చెప్పానని, తన మాటలను పట్టించుకోలేదని ఆయన అన్నారు.

మీడియా ప్రతినిధులతో మాట్లాడడానికి కూడా హరికృష్ణ నిరాకరించారు. స్వర్గీయ ఎన్టీఆర్ జయంతి వల్ల తాను మాట్లాడలేనని ఆయన అన్నారు. తాను మాట్లాడకపోవడానికి కారణాలు తర్వాత చెప్తానని ఆయన అన్నారు. మహానాడులో ఆయన ముభావంగానే ఉన్నారు. మొదటి రోజు కూడా మహానాడు నుంచి మధ్యలోనే వెళ్లిపోయారు. మహానాడు వేదికపై హరికృష్ణ ఫొటో కనిపించలేదు

చంద్రబాబుపై జూ ఎన్టీఆర్ వైరం

తెలుగుదేశం పార్టీ అధ్యక్షుడు నారా చంద్రబాబు నాయుడిపై పోరు సాగించడానికే సినీ హీరో జూనియర్ ఎన్టీఆర్ నిర్ణయించుకున్నట్లు అర్థమవుతోంది. తన తండ్రి నందమూరి హరికృష్ణతో కలిసి ఆయన చంద్రబాబుపై యుద్ధం చేయడానికే సిద్ధపడ్డారని అనిపిస్తోంది. ఆయన మహానాడుకు దూరంగా ఉండడం, నందమూరి హరికృష్ణ మహానాడులో ప్రసంగించకుండా నిరసన వ్యక్తం చేయడం అందుకు నిదర్శనంగా చెప్పవచ్చు. మహానాడుకు రావాలని చంద్రబాబు చేసిన విజ్ఞప్తిని కూడా జూనియర్ ఎన్టీఆర్ తిరస్కరించారు. సినిమా షూటింగుల్లో బిజీగా ఉండడం వల్లనే మహానాడుకు వెళ్లడం లేదని జూనియర్ ఎన్టీఆర్ చెప్పిన మాటలు నమ్మేట్లుగా లేవు. హైదరాబాదులోని ఉన్న ఆయన మహానాడుకు వెళ్లాలంటే పెద్ద సమయం వెచ్చించాల్సిన అవసరం లేదు. మర్యాదపూర్వకంగానైనా అలా ఇలా రావచ్చు. ఓ పది నిమిషాల పాటు మాట్లాడి పోవచ్చు. జూనియర్ ఎన్టీఆర్‌కు ఆ మాత్రం సమయం కూడా లేదంటే విశ్వసించే పరిస్థితి లేదు.

ఇకపోతే, హరికృష్ణ మహానాడులో వ్యవహరించిన తీరు కూడా చంద్రబాబుతో విభేదాలు కొనసాగుతున్నాయని చెప్పడానికి తగిన బలాన్ని చేకూరుస్తున్నది. మహానాడులో ప్రసంగించాలని కోరిన పార్టీ సీనియర్ నేత యనమల రామకృష్ణుడిని ఆయన కసురుకున్నారు. తాను మాట్లాడబోనని తెగేసి చెప్పారు. పైగా, తర్వాత అన్ని విషయాలు మాట్లాడుతానని కూడా చెప్పారు. ఎన్టీఆర్ జయంతి రోజున పార్టీలో విభేదాలను బయటపెట్టడం ఇష్టం లేకనే ఆయన మాట్లాడలేదని అంటున్నారు. శుక్రవారం మధ్యలోనే మహానాడు నుంచి ఆయన వెళ్లిపోయారు. శనివారం స్పష్టంగా నాయకుల వద్ద తన అభిమతాన్ని బయటపెట్టారు. బాలకృష్ణ మాత్రం చంద్రబాబుకు మద్దతుగా నిలబడేట్లే ఉన్నారు. మహానాడు ప్రసంగంలో ఆయన చంద్రబాబును ప్రశంసించారు.

చంద్రబాబు ఆలోచన ఎలా ఉందనేది తెలియడం లేదు. హరికృష్ణను చంద్రబాబు పట్టించుకోవడం లేదా, కావాలనే పట్టించుకోనట్లు నటిస్తున్నారా అనేది తెలియడం లేదు. అయితే, మహానాడులో మాట్లాడాలని యనమల రామకృష్ణుడిని చంద్రబాబే అడిగించారని తెలుస్తోంది. హరికృష్ణ తీరు పట్ల చంద్రబాబుకు నచ్చడం లేదని కూడా చెబుతున్నారు. మహానాడు నుంచి హరికృష్ణ శనివారం నాడు కూడా మధ్యలోనే వెళ్లిపోయారు. తన వారసుడిగా నారా లోకేష్‌ను తేవాలని చంద్రబాబు చేస్తున్న ప్రయత్నాలే తండ్రీకొడుకులు హరికృష్ణ, జూనియర్ ఎన్టీఆర్‌లకు నచ్చడం లేదని చెబుతున్నారు. ఏమైనా, ప్రస్తుతం తెలుగుదేశంలో వారసత్వ పోరు బద్దలవడానికి సిద్ధంగా ఉన్నట్లే కనిపిస్తోంది.

బాబు స్వర్గీయ ఎన్టీఆర్ వారసుడేనా?

తెలుగుదేశం పార్టీలో చంద్రబాబు నాయుడు స్వర్గీయ ఎన్టీ రామారావు వారసత్వాన్ని కొనసాగిస్తున్నారా అనేది అనుమానమే. ఆయన ఎన్టీ రామారావు పేరును వాడుకున్నప్పటికీ వారసత్వాన్ని మాత్రం కొనసాగించడం లేదని అందరూ చెప్పే మాటే. ఎన్టీ రామారావు బొమ్మ వేరేవారి సొంతం కాకుండా జాగ్రత్త పడుతూ నారా వారసత్వాన్ని స్థాపించడమే చంద్రబాబు లక్ష్యమని చెబుతున్నారు. తన కుమారుడు నారా లోకేష్‌కు తన వారసత్వాన్ని అందించాలనేది ఆయన ప్రయత్నంగా కనిపిస్తోంది. ఎన్టీఆర్ జయంతి సందర్బంగా పార్టీ మహానాడు జరగడం ఆనవాయితీగా వస్తోంది. ఆ ఆనవాయితీని మాత్రం చంద్రబాబు తప్పకుండా పాటిస్తున్నారు.

ఎన్టీ రామారావుకున్న తెగువ, సూటిదనం చంద్రబాబుకు లేవు. పైగా, తన చేతిలోకి వచ్చిన తర్వాత పార్టీ స్వరూప స్వభావాలనే మార్చేశారు. ఇతరులు చెప్పే మాటను వినే అలవాటు ఎన్టీఆర్‌కు ఉంది. ఎవరైనా చెప్తే ప్రజలకు మేలు జరుగుతుందని భావిస్తే దాన్ని ఆచరణలో పెట్టేవారు. కాంగ్రెసుకు బద్ద వ్యతిరేకిగా వ్యవహరించారు. అందువల్ల ఆయన మొండివాడిగా కూడా ముద్ర పడ్డారు. ప్రజల మేలు తప్ప మరోటి ఆయనకు తట్టేది కాదు. పైగా, ప్రజలకు మేలు జరుగుతుందంటే నిబంధనలను కూడా పక్కన పెట్టేవారు. ఇచ్చిన మాటకు కట్టుబడి ఉండేవారు. పార్టీపరంగా తీసుకున్న నిర్ణయానికి నష్టమైనా, కష్టమైనా కట్టుబడి ఉండేవారు.

చంద్రబాబు నాయుడు ప్రభుత్వాన్ని సంక్షేమ దిశ నుంచి అభివృద్ధి దిశకు, అదీ పెట్టుబడీదారి దిశకు మళ్లించారు. చంద్రబాబు సంక్షేమ పథకాలకు కోత పెట్టారు. వ్యవసాయం దండుగ వంటి మాటలు మాట్లాడారు. ఉద్యోగ నియామకాల్లో తెలంగాణ స్థానికేతరులకు అన్యాయం జరిగిందనే విషయం బయటకు వచ్చినప్పుడు దాన్ని సరిదిద్దడానికి 610 జీవోను విడుదల చేశారు. కానీ దాన్ని చంద్రబాబు అమలు చేయలేకపోయారు. అంతేకాదు, రాజకీయ ప్రయోజనం కోసం తీసుకున్న తెలంగాణ అనుకూల వైఖరికి ఇప్పుడు పూర్తి భిన్నంగా వ్యవహరిస్తున్నారు. తెలుగుదేశం ఎన్టీఆర్ ఉన్నప్పటి తెలుగుదేశం కాదనేది అందరికీ తెలిసిన విషయమే.

లేదంటే ఒకప్పటి వెలిగిన దేశంగా చరిత్రలో మిగిలిపోతుంది.

నరసింహా రావు గారి నాన్చుడు దారిలో
నారా వారు ఇంకా [ఈ కాలం లో కూడా] ప్రయాణిస్తూ
ప్రభుత్వ పగ్గాల కోసం తీవ్రంగా ప్రయత్నిస్తూ ఉన్నారు.

కానీ గ్రామ గ్రామానికీ విస్తరించి ఉన్న పార్టీ శాఖ
ఇదే విషయంలో విసిగిపోతోంది.

వయసుమళ్ళిన వాళ్ళు వాహ్యాళికి వచ్చినట్టు
వచ్చి ఇంకా పార్టీ వ్యవహారాలూ నడుపుతుంటే
అవకాశం రాని యువత అంగలారుస్తూ
తక్షణమే పేరొచ్చే పెడదారులను వెతుక్కొంటున్నారు.

రైతు సమస్యలు అవినీతి సమస్యలపై అధినేత అరుస్తున్నా
వాహ్యాళికి వచ్చినట్టు ప్రవర్తిస్తున్న
పండిన వృద్ద ఝంభూకాల జంజాటాన్ని
ఎంత తొందరగా వదులుకొని
జనంలో మమేకమయ్యే మనుషులకు
మేధావులకు పార్టీ పనులు అప్పజేబుతారో
అప్పుడే తెలుగు దేశం దశ తిరుగుతుంది.

లేదంటే ఒకప్పటి వెలిగిన దేశంగా
చరిత్రలో మిగిలిపోతుంది.

కుటుంబంలో ఎవరు జైలుకు పోతే వాళ్ళే సి ఎం అయిపోతారు

కనిమొళక్కో

కరుణ కూతురుగా ఉన్నా

కాస్తా దూరంగానే ఉంటివి

రాక రాక రాజకీయాలకు వస్తివి

రాజ్య సభకు వెళ్తివి

కుటుంబ గొడవల్లో కళైంజర్ ఛానెల్ పెడితివి

రాజాతో చేరి చేసిన రచ్చ

రచ్చ రచ్చ అయ్యి

అది కాస్తా 2 జీ అయ్యి

బైలు దొరక్క

జైలు పాలవుతున్నావు

అయినా మీ కుటుంబంలో

ఎవరు జైలుకు పోతే వాళ్ళే సి ఎం అయిపోతారు

బాధపడకు.

ఎప్పడూ ‘ఓదార్పు’ పేరుతొ ఏడుపేనా అనే సందేహం వద్దు

ఈ సీరియల్ లో
కథా నాయకుడు
కన్నీళ్లు తుడిచే నెపంతో వస్తాడు.
ఆ పాత్రను స్వయంగా కథా నాయకుడే
ఆవిధంగా మలుచుకొన్నాడు.
మధ్య మధ్య లో దీక్షల ఎపిసోడ్స్ తో అలరిస్తున్నా
అడపా దడపా ఎన్నికలంటూ డబ్బులు ఎదజల్లే
ఎపిసోడ్స్ తో ప్రత్యేక టెలి ఫిల్ములు చేస్తున్నా
ఈ సీరియల్ మాత్రం
తనకు ఖశ్చితంగా
కుర్చీ తెచ్చిపెడుతుందని నమ్మినందువల్లా
కథానాయకుడు ఎపిసోడ్ల మీద ఎపిసోడ్లతో
ఏడిపించడానికి
రెండో సంవత్సరానికి దగ్గరవుతున్నా
రెట్టించిన ఉత్సాహంతో ఉరకలేస్తున్నాడు
ఎప్పడూ ‘ఓదార్పు’ పేరుతొ ఏడుపేనా అనే
సందేహం వద్దు
ఏడిపించబోయే ఇంటికి వెళ్లక ముందు
డబ్బులు కొడుతూ
బాణా సంచా కాలుస్తూ
బహు సందడి తో
హాస్యాన్ని కూడా పండిస్తారు.
లైవ్ సీరియల్ కాబట్టి
షూటింగ్ వచ్చిన వాళ్ళందరికీ
కవరేజి గ్యారెంటీ తో
గమ్మత్తు కలగజేస్తారు.
వీలయితే షూటింగ్ కు వెళ్ళండి
లేదంటే 24 గంటల లైవ్
టీ వీ ల లో వస్తుందని మరచిపోకండి.

తోడు పంపిస్తారని భయమా?

యువనేత తనకు మాత్రమే
రైతు సమస్యలపై పేటెంటు ఉన్నట్టు
మిగిలిన వారు ఎవరు ఏమి చేసినా
కనీసం ప్రస్తావించినా
కిందా మీదా పడి
తనను కాపీ కొడుతున్నారని
మొసలి కన్నీరనీ మొత్తుకొంటున్నాడు
ఇన్నాళ్ళూ సభ్యుడై ఉండీ
భత్యాలు తీసుకొంటూ
సభ్యత కోసమైనా
పార్లమెంటులో ఒక్క సారైనా ప్రస్తావించాడా?
ఇక్కడ మాట్టాడి కుర్చీ కొట్టేద్దామనే బదులు
అక్కడ ప్రస్తావిస్తే ప్రసారం చేసే
సొంత మీడియా ఉండదనా లేక
హసన్ అలీ లేక మధు కోడాకు చేసిన సత్కారం చేసి
2 జీ రాజా కు తోడు పంపిస్తారని భయమా?

ఓదార్పు అంటూ ఏడిపించడానికి వెళతారు.

సొంతంగా పార్టీ పరంగా గెలిచిన
ఎం ఎల్ ఏ ఒక్కరే.

మిగిలినవి అన్నీ కప్పదాట్లే.
అవి కూడా పాతికకు మించి లేదు.

పాలకులు తలుచుకొంటే
కప్ప దాట్లను సభకే రానివ్వకుండా చెయ్యొచ్చు.

ఇన్నీ తెలిసి పాలకులను పడగొట్టేస్తాం అని
పదే పదే చెప్పడం ఎందుకో ?

సిన్సియారిటీ చూస్తుంటే చిరంజీవి గుర్తుకు వస్తున్నాడు
ఏ పిలుపు వచ్చి డిల్లీకి వెళ్ళినా పోలవరం అంటాడు
తరువాత పత్తా ఉండడు.

సేం డిటో అలానే రైతు సమస్యలు అని ఓ టెంట్ వేస్తారు
కానీ ఓ సొంత పార్టీ ఎం పీ గా
విత్త మంత్రులను నిద్రలేపే వినతి పత్రం ఇవ్వలేరు.

టెంటు అవుతూనే
కుర్చీ సుమన్ అవతారం ఎత్తి
ఓదార్పు అంటూ ఏడిపించడానికి వెళతారు.

వెళ్ళిన చోట్లల్లా
ట్రాఫిక్ లేని జంక్షన్లు వెదికి
విగ్రహాన్ని పెడుతూ
యువ నేత మహా నేత విగ్రహావిస్కరణ అని
తన మీడియా లో రోజులో ఎప్పుడు చూసినా
తప్పించుకోకుండా బాధుతారు.

కుర్చీ తన బాబు సొత్తు అనే బాధ ఎక్కువగా ఉండేట్టు ఉంది
కూల్చేదేదో కూల్చేసి ఆ భారం దింపుకొంటే బావున్ను.

నేనే ఎలికవ్వాలని అనుకొంటే ఎలా కుదురుతుంది.

తానూ ఓ ఏలిక అవ్వాలని
ఓ ఎలుక
తన కుటుంబం మొత్తంతో
ఇంట్లో చిందర వందర చేస్తుంది
అందరూ చూసే లోపల
తన కుటుంబం మొత్తాన్ని
కలుగులో ఉంచుకొంటుంది
చిందర వంద చేస్తున్న భాగాన్ని
తన ఏలుబడికి వదిలేయమని
తతిమా ఎలుకలేవీ అలా సెయ్యకుండా
ఏదన్నా ప్రయత్నించినా
కలుగు దాటి బయటకు వచ్చి
ఇంట్లో ఇంకో మూల చప్పుడు చేసినా
ఎలికవ్వాలని కలలుగనే ఎలుక
చప్పుడు చేసే ఎలుకల కలుగుల ముందర
టమోటో పిండేసి గుడ్ల పెంకులు పెట్టేసి
నా నా రభస చేస్తోంది
అన్ని ఎలుకలూ ఒక్కటై
చెత్త జేస్తే కదా ఈ ఇంట్లో ఉండలేమని
సామాన్లు సర్దుకు పోయేది అక్కడ ఉన్నోళ్ళు.
నచ్చినప్పుడు కలుగు బయట వచ్చి
చిందర వందర చేసి
మిగిలినప్పుడు కలుగులోకి వెళ్లి పోయి కాలాక్షేపం చేస్తూ
నేనే ఎలికవ్వాలని అనుకొంటే
ఎలా కుదురుతుంది.

అరిచే కుక్క కరవదు

అని అందరికీ ఓ నమ్మకం
ఒక వేళ కరిస్తే బొడ్డు చుట్టూ
పద్నాలుగు సూదులు పొడి పించుకోవాలనే
మరో నమ్మకం
ఆ నమ్మకాలన్నీ విడిచి పెట్టండి.
అట్టని నేను జన విజ్ఞాన వేదిక కార్యకర్తను కాను,
ఆంధ్రాలో రోజుకొక్కరైనా కుక్క కరిచి చస్తున్నారు
పద్నాలుగు బదులు వచ్చిన ఒక్క సూది కూడా
ఆంధ్రాలో దొరకదు
అలా తయారయ్యింది మన ఆస్పత్రుల పరిస్థితులు.

మనకు ఉచితంగా వచ్చే ఆరోగ్య శ్రీ లు కావాలి కానీ
కుక్క కరిచి పోతే ఏమి అని అనుకొనే రోజులు వచ్చేసాయి.

అమెరికా వాళ్ళకు ఈ విషయం తెలియనట్టు ఉంది
లేదంటే ఈ పాటికి ఆంధ్రాకు వెళ్లి కుక్క కరిచి చావకండి
అని అందరూ కాండ్రించి ఉమ్మేట్టు
తమ పౌరులకు హెచ్చరికలు చేసి ఉండేది.

అందరివాడికి అమాత్య పదవి అందని ద్రాక్షేనా?

అన్నను ఆదర్శంగా తీసుకొని
అబ్దుల్ కలాం పిలుపందుకొని
ముఖ్యమంత్రి పదవికి కోసం పార్టీ పెట్టి
సామాజిక న్యాయాన్ని మంది మదిలో చొప్పించలేక
రెంటికీ చెడ్డ రేవడి అయి
గౌరవ నిష్క్రమణకోసం చూస్తుంటే
కేంద్ర మంత్రి ఇంటికి రాంగానే
తనకో కేంద్ర అమాత్య పదవి వస్తుందేమోనని ఆశపడి
పెట్టే బేడాతో సహా పార్టీని చేతిలో పెట్టడానికి ఒప్పుకొని
చేతి కోసం ఓట్లడిగి
తనూ రాహుల్ గాంధీ లాంటి వాడేనని నిరూపించుకొని
ఒగరుస్తూ ఓపిగ్గా హస్తిన ప్రయాణాలు చేసి
హస్త రేఖలు చూసుకొని మురిసిపోతూ
ప్రజల మధ్య ఉండాలను కొంటున్నానని
సముద్రం (చేతి పార్టీని సముద్రం పార్టీ గా వర్ణిస్తారు రాజకీయ విశ్లేషకులు)
ఒడ్డున నిలుచుకొని కేకేసి చెప్పి
ఇంటికొచ్చి అలక పాన్పు ఎక్కేసాడు
మరో సారి ప్రయాణం కట్టమని హస్తిన నుండి పిలుపొచ్చింది
అమాత్య పదవి కోసం అడిగి మళ్ళీ భంగపడుతాడో ఏమిటో?

ఇక్కడ భంగపడతాడు అని ఖశ్చితంగా ఎందుకు చెబుతున్నాను అంటే
ఈయనకు పదవిచ్చి ఖాళీ అయ్యే తిరుపతి లో
పరపతి నిలుపుకొనే ధైర్యం సముద్రానికి లేదు కాబట్టి
అదీ స్థానిక ఎన్నికల ముందు అసలు ఆ ఊసే ఊహకు కూడా రానివ్వరు.
అందుకే అందరివాడికి అమాత్య పదవి అందని ద్రాక్షే అవుతుంది
కాదు అమాత్యాడు అవ్వాలని మొండిఘటం అయితే రాష్ట్రం లో ఇస్తారు.

గోనె పట్టలు కూడా రైతులకు ఇవ్వలేని ఘోర ప్రభుత్వంలో
ముఖ్యమంత్రి పదవికి కోసం పార్టీ పెట్టి
రాష్ట్ర మంత్రులలో ఓ బోడి లింగ మవ్వడానికి
మనః సాక్షి అంగీకరిస్తుందా అన్నది ఓ ప్రశ్న?

జూ ఎన్టీఆర్‌కు చంద్రబాబు చెక్?

తన కుమారుడు నారా లోకేష్‌కు అడ్డం పడాలని చూస్తున్న తన మేనల్లుడు జూనియర్ ఎన్టీఆర్‌కు తెలుగుదేశం పార్టీ అధ్యక్షుడు నారా చంద్రబాబు నాయుడు చెక్ పెట్టినట్లు ప్రచారం జరుగుతోంది. జూనియర్ ఎన్టీఆర్ పూర్తి కాలం రాజకీయాలపై దృష్టి పెట్టలేని స్థితిని గమనించి ఆయన నారా లోకేష్‌ను పార్టీలోకి దింపుతున్నట్లు చెబుతున్నారు. చిత్తూరు జిల్లా చంద్రగిరి నియోజకవర్గంలో మంత్రి గల్లా అరుణ పాగా వేశారు. ఒకప్పుడు చంద్రబాబు సొంత నియోజకవర్గమైన చంద్రగిరి గల్లా అరుణ చేతుల్లోకి పోవడాన్ని దృష్టిలో ఉంచుకుని మళ్లీ తాను పాగా వేయాలనే ఉద్దేశంతో ఉన్నారు. ఇందులో భాగంగా తన కుమారుడు నారా లోకేష్‌ను అక్కడి నుంచి రంగంలోకి దింపాలని నిర్ణయించుకున్నారు. దీనివల్లనే చంద్రగిరి నియోజకవర్గం పార్టీ నేతలు నారా లోకేష్‌ను ఇంచార్జీగా నియమించాలని పట్టుపడుతున్నారు.

కాగా, జూనియర్ ఎన్టీఆర్ సినిమాలతో బిజీగా ఉన్నారు. అతను సినిమాలను తగ్గించుకోవడానికి కనీసం పదేళ్లయినా పడుతోంది. ఈ పదేళ్ల లోపు అతను పూర్తి స్థాయిలో రాజకీయాల్లోకి వచ్చే పరిస్థితి లేదు. నందమూరి హరికృష్ణ ముందుకు వచ్చి పార్టీ నాయకత్వం చేపట్టే స్థితి కూడా లేదు. హరికృష్ణకు తగిన సమర్థత కూడా లేదు. పార్టీ నాయకులు అందుకు అంగీకరించే అవకాశం లేదు. ఇప్పుడిప్పుడే సినిమాలను వదిలేసి రాజకీయాల్లోకి వచ్చే సాహసం జూనియర్ ఎన్టీఆర్ చేస్తాడని అనుకోలేం. అందువల్ల నారా లోకేష్‌ను అడ్డుకుని జూనియర్ ఎన్టీఆర్ తెలుగుదేశం పార్టీలో కీలక పాత్ర పోషించే అవకాశాలు లేవు. వచ్చే పదేళ్ల కాలంలో, అంటే జూనియర్ ఎన్టీఆర్ రాజకీయాల వైపు దృష్టి సారించాలని అనుకునే సరికి నారా లోకేష్ నాయకుడిగా స్థిరపడిపోతారు. అందువల్ల జూనియర్ ఎన్టీఆర్ నుంచి ఏ విధమైన ఆటంకాలు ఉండవని చంద్రబాబు భావిస్తున్నట్లు తెలుస్తోంది.

ఒకవేళ, బాలకృష్ణ తెలుగుదేశం పార్టీ పగ్గాలు చేపట్టాలని అనుకుంటే మాత్రం కాస్తా తేడా రావచ్చు. కానీ, లోకేష్‌ను అల్లుడిగా చేసుకున్న బాలకృష్ణ అందుకు సాహసించకపోవచ్చు. ఇప్పటికే, చంద్రబాబు, బాలకృష్ణల మధ్య ఒక అవగాహన కుదిరినట్లు చెబుతున్నారు. మొత్తం మీద, కుమారుడు నారా లోకేష్‌కు చంద్రబాబు లైన్ క్లియర్ చేసి పెట్టారు. పార్టీ ఉన్నత స్థానాల్లో ఉన్నవారు కూడా నారా లోకేష్‌ను సమర్థించేవారే. అంటే చంద్రబాబు మాటకు కట్టుబడి ఉండేవారే. నామా నాగేశ్వర రావువంటి నాయకులు నారా లోకేష్‌కే మద్దతు తెలుపుతారు

కాంగ్రెసులో రెడ్డి వర్సెస్ కాపు

ఇన్నాళ్లూ రెడ్డి ఆధిపత్యం ఉన్న కాంగ్రెసు పార్టీ క్రమంగా తన దిశ మార్చుకుంటున్నట్లుగా తెలుస్తోంది. కాసు బ్రహ్మానందరెడ్డి హయాం నుండి నిన్నటి వైయస్ రాజశేఖరరెడ్డి హయాం వరకు రాష్ట్ర కాంగ్రెసులో రెడ్డిలకే ప్రాధాన్యం ఉండేది. కాంగ్రెసులో రెడ్డిలకే అధిక ప్రాధాన్యత ఉన్నప్పటికీ వైయస్ హయాంలో రెడ్ల ప్రాధాన్యత మరింత పెరిగిందనే వారూ ఉన్నారు. అయితే వైయస్ఆర్ మరణానంతరం ఆయన తనయుడు వైయస్ జగన్మోహన్ రెడ్డి పార్టీ విడిచి కొత్త పార్టీ పెట్టడం, ఆయన వైపు పలువురు నేతలు చూస్తుండటంతో కాంగ్రెసు ఇప్పుడు రెడ్డిని కాదని కాపుల వైపు చూస్తున్నట్లుగా తెలుస్తోంది. ఇన్నాళ్లూ కాంగ్రెసుకు అండగా ఉన్న రెడ్లు జగన్ పార్టీ పెట్టడం కారణంగా వారు ఆయన వైపు చూస్తుండటంతో తమకంటూ ఓ సామాజికవర్గం ఓట్లు ఉండాలనే ఉద్దేశ్యంలో భాగంగానే కాంగ్రెసు పార్టీ రాష్ట్రంలో అతిపెద్ద సామాజికవర్గంలో ఒకటి అయిన కాపులను దరి చేర్చుకోవాలని చూస్తున్నట్లుగా తెలుస్తోంది. ఆ వ్యూహంతోనే ప్రజారాజ్యం పార్టీని పార్టీలో విలీనం చేసే దిశలో చిరంజీవిని ఒప్పించి సఫలం చెందిందని తెలుస్తోంది.

కాంగ్రెసు కార్యకర్తల్లో ఎక్కువ కాపులే ఉన్నప్పటికీ ప్రాధాన్యత మాత్రం రెడ్డిలకే ఇప్పటి వరకు ఉంది. రెడ్లంతా ఇప్పుడు జగన్ వైపు చూస్తున్న నేపథ్యంలో కాపులకు పార్టీలో కీలక పదవులు అప్పగించడం ద్వారా వారిని మరింత దరి చేర్చుకునే వ్యూహంతో పార్టీ ముందుకు వెళుతోంది. రెడ్లు దూరం కావడం ద్వారా 2014లో ఏర్పడే లోటును కాపుల ద్వారా పూడ్చుకునే ఉద్దేశ్యంతోనే చిరును దరి చేర్చుకున్నట్లు తెలుస్తోంది. చిరును తమ వైపు తిప్పుకోవడం ద్వారా చిరు అభిమానులతో పాటు, కాపు వర్గాన్ని దమ వైపు తిప్పుకోవచ్చునని కాంగ్రెసు భావిస్తోంది. సామాజికంగా, ఆర్థికంగా రెడ్డిలదే ముందంజ. కాపులకు ప్రాధాన్యత ఇవ్వడం ద్వారా రెడ్ల ప్రాధాన్యం తగ్గించి లాభం పొందాలను అధిష్టానం భావిస్తున్నట్లుగా తెలుస్తోంది. ముఖ్యమంత్రి కిరణ్ కుమార్ రెడ్డి హయాంలో కూడా రెడ్లకే ప్రాధాన్యత ఉంది. కిరణ్ కేబినట్లో 15 శాఖలు రెడ్డి సామాజిక వర్గం చేతిలోనే ఉన్నాయి. అయితే కిరణ్ పనితీరుపై అధిష్టానం తీవ్ర అసంతృప్తిగా ఉన్నది. కాబట్టి క్రమంగా రెడ్లకు ప్రాధాన్యత తగ్గించి కాపులను అందలం ఎక్కించాలనే వార్తలు వస్తున్నాయి.

ఇప్పటికిప్పుడు చిరంజీవికి సిడబ్ల్యుసిలో స్థానం కేటాయించడం ద్వారా పార్టీ రెడ్లతో పాటు కాపులకు మంచి ప్రాధాన్యం ఇస్తుందనే ధోరణి కల్పించాలని ప్రయత్నాలు చేస్తున్నట్టుగా తెలుస్తోంది. అంతేకాదు మంత్రి బొత్స సత్యనారాయణకు పిసిసి పదవిని కట్టబెడతారని, వట్టి వసంతకుమార్, కన్న లక్ష్మీనారాయణలకు కూడా ప్రాధాన్యం ఉన్న పోస్టులను ఇస్తారనే వార్తల వెనుక కూడా కాపులను మరింత దగ్గరకు చేర్చుకోవాలనే ఉద్దేశ్యమే అని తెలుస్తోంది. టిడిపికి బిసి, కమ్మ, జగన్‌కు రెడ్డి సామాజిక వర్గం ఓట్లు ఉన్నట్లు ఇక ముందు ముందు కాంగ్రెసుకు కాపు సామాజిక వర్గం దగ్గరవుతుందనే వాదనలు బలంగా వినిపిస్తున్నాయి.

జూనియర్ ఎన్టీఆర్ కృష్ణా జిల్లా ఇంచార్జీ??

తెలుగుదేశం పార్టీ అధ్యక్షుడు నారా చంద్రబాబు నాయుడి కుమారుడు నారా లోకేష్‌కు సినీ హీరో జూనియర్ ఎన్టీఆర్ కౌంటర్ ప్రారంభమైంది. పార్టీ మహానాడుకు ముందే తెలుగుదేశం పార్టీలో వారసత్వ పోరు ముదురుతోంది. తెలంగాణలో సీనియర్ శాసనసభ్యుడు నాగం జనార్దన్ రెడ్డి వ్యవహారం రగులుతున్న సమయంలోనే వారసత్వ పోరు కొత్త రూపు ధరించడం విశేషం. చిత్తూరు జిల్లా చంద్రగిరి నియోజకవర్గానికి నారా లోకేష్‌ను ఇంచార్జీగా ప్రకటించాలని కోరుతూ తీర్మానం చేయాలని నిర్ణయించుకున్న సమయంలోనే కృష్ణా జిల్లా రాజకీయాలు దానికి కౌంటర్‌గా ప్రారంభమయ్యాయి.

కృష్ణా జిల్లాలోని ఏదో ఒక శాసనసభా నియోజక వర్గం ఇంచార్జీగా జూనియర్ ఎన్టీఆర్‌ను ప్రకటించాలని కోరుతూ జిల్లా నాయకత్వం తీర్మానం చేయడానికి సిద్ధపడుతోంది. మంగళవారం మధ్యాహ్నం బందరులో కృష్ణా జిల్లా పార్టీ సమావేశం జరుగుతోంది. ఇందులో మహానాడులో ప్రతిపాదించే తీర్మానాలపై చర్చ జరుగుతుంది. ఇందులో భాగంగానే జూనియర్ ఎన్టీఆర్‌ను ఏదో ఒక నియోజకవర్గం ఇంచార్జీగా నియమించాలనే తీర్మానం పురుడు పోసుకుంటుందని అంటున్నారు. తాత స్వర్గీయ ఎన్టీఆర్ సొంత జిల్లా కృష్ణా నుంచి జూనియర్ ఎన్టీఆర్ తన రాజకీయ ప్రవేశం చేయాలని భావిస్తున్నట్లు సమాచారం. జూనియర్ ఎన్టీఆర్ ఇంచార్జీగా వ్యవహరించడానికి అనువైన నియోజకవర్గాన్ని కూడా పార్టీ నాయకులు గుర్తించనున్నారు.

తన కుమారుడు లోకేష్‌ను చంద్రగిరి నియోజక వర్గం ఇంచార్జీగా నియమించాలనే చిత్తూరు జిల్లా పార్టీ నాయకుల ఒత్తిడిపై చంద్రబాబు అసహనం వ్యక్తం చేసినట్లు చెబుతున్నారు. పార్టీని బలోపేతం చేయాల్సిన తరుణంలో వారసత్వ పోరు రగలడం చంద్రబాబుకు కాస్తా ఇబ్బందిగానే ఉందని చెబుతున్నారు. తెలంగాణకు సంబంధించి నాగం జనార్దన్ రెడ్డి వ్యవహారం తలనొప్పిగా పరిణమించింది. ఇదే సమయంలో వారసత్వ పోరు కొత్త మార్గంలో తలకు చుట్టుకుంటుండడం చంద్రబాబు అసహనానికి కారణమని అంటున్నారు.

చంద్రబాబు వ్యూహం కూడా తిరగబడేట్లే ఉంది.

తెలుగుదేశం పార్టీ అధ్యక్షుడు రాజకీయాల్లో చాణక్యుడని, అతని వ్యూహం ముందు అందరూ చిత్తు కావాల్సిందేనని ఇప్పటి వరకు ఓ నమ్మకం ఉంటూ వచ్చింది. అంతేకాకుండా, ఓ నిర్ణయం తీసుకున్న తర్వాత కష్టమైనా, నష్టమైనా తెలుగుదేశం పార్టీ భరిస్తుందనే విశ్వాసం ప్రజల్లో ఉండేది. ప్రత్యర్థులనే కాదు, పార్టీ వ్యతిరేకులను తన వ్యూహాలతో దారికి తెచ్చుకునే నేర్పు చంద్రబాబుకు ఉందని అనుకుంటూ ఉండేవారు. కానీ ఇప్పుడు పరిస్థితి తలకిందులవుతున్నట్లు కనిపిస్తోంది. పార్టీపై, పార్టీ నాయకులపై చంద్రబాబు పట్టు కోల్పోయినట్లు కనిపిస్తున్నారు. తాను అనుసరించిన వ్యూహమే తన కొంప ముంచేలా ఉంది. తన దారిలో నడవని నేతలను కట్టడి చేయడానికి పార్టీలో వారికి వ్యతిరేకంగా మరో గ్రూపు తయారు చేసే చంద్రబాబు వ్యూహం బెడిసి కొడుతోంది.

మహబూబ్‌నగర్ జిల్లా నాగర్ కర్నూలు శాసనసభ్యుడు నాగం జనార్దన్ రెడ్డి విషయంలో చంద్రబాబు అనుసరించిన వ్యూహం పూర్తిగా బెడిసికొట్టినట్లే కనిపిస్తోంది. పార్టీ వైఖరిని నాగం జనార్దన్ రెడ్డి తూర్పారపడుతున్నారు. తెలంగాణకు అనుకూలంగా తీసుకున్న నిర్ణయానికి కట్టుబడి ఉంటారా, ఆ నిర్ణయాన్ని సమీక్షించి వెనక్కి తీసుకుంటారా తేల్చాలని ఆయన పట్టుబడుతున్నారు. నాగం జనార్దన్ రెడ్డి పట్టులో అర్థం ఉంది. తెలంగాణ ప్రజల ముందు చంద్రబాబును నాగం జనార్దన్ రెడ్డి ద్రోహిగా నిలబెడుతున్నారు. ఇతర పార్టీల నాయకులు ఇప్పటికే కావాల్సినంత చంద్రబాబు వైఖరిని తప్పు పడుతూ వచ్చారు. దీంతో తెలంగాణ ప్రాంతంలో ప్రజలు చంద్రబాబును నమ్మడానికి వీలు లేని పరిస్థితి వచ్చింది. ఇప్పుడు నాగం జనార్దన్ రెడ్డే ముందుకు రావడంతో ఆయన పప్పులు ఉడికేట్లు లేవు. చంద్రబాబు అనుకూల తెలంగాణ ప్రాంత నాయకత్వం దుమ్ము దులిపేందుకు కూడా ఆయన వెనకాడడం లేదు.

ఇకపోతే, వారసత్వ పోరు నానాటికీ రాజకుంటోంది. తన కుమారుడు నారా లోకేష్‌ను తెర మీదికి తేవాలనే చంద్రబాబు వ్యూహం కూడా తిరగబడేట్లే ఉంది. చిత్తూరు జిల్లా చంద్రగిరి పార్టీ ఇంచార్జీగా నారా లోకేష్ పేరును ప్రకటించాలని ఆ ప్రాంత నాయకులు పట్టుబట్టడం కూడా చంద్రబాబుకు తలనొప్పిగానే పరిణమించింది. నారా లోకేష్‌ను అడ్డుకోవడానికి నందమూరి హరికృష్ణ, జూనియర్ ఎన్టీఆర్ ఎప్పటికప్పుడు తమ అస్త్రాలను సంధిస్తూనే ఉన్నారు. కృష్ణా జిల్లాలో దాని ప్రకంపనలు కనిపిస్తున్నాయి. వల్లభనేని వంశీని దారికి తెచ్చామని అనుకున్నా అది రగులుతూనే ఉన్నది.

తాజాగా, పార్టీ సీనియర్ నాయకుడు బుచ్చయ్య చౌదరి పార్టీ నుంచి తప్పుకోవడానికి సిద్ధపడినట్లు వార్తలు వస్తున్నాయి. బుచ్చయ్య చౌదరి పార్టీ నాయకత్వ తీరు పట్ల, అంటే చంద్రబాబు తీరు పట్ల ఆయన తీవ్ర అసంతృప్తితో ఉన్నారనే విషయం మాత్రం నిర్ధారణ అయింది. నాగం జనార్దన్ రెడ్డికి వ్యతిరేకంగా తెలంగాణ ప్రాంత నాయకులను చంద్రబాబు ఉసిగొల్పినా అది ఫలితం ఇచ్చే సూచనలు కనిపించడం లేదు. సీమాంధ్ర సీనియర్ నాయకులు పార్టీ వ్యవహారాల పట్ల పట్టనట్లు వ్యవహరిస్తున్నారు. మొత్తం మీద, చంద్రబాబు కోలుకోలేని స్థితిలోకి జారుకుంటున్నారని మాత్రం అనిపిస్తోంది.

నారా లోకేష్ వర్సెస్ వైయస్ జగన్

రాష్ట్ర రాజకీయాలను వైయస్సార్ కాంగ్రెసు పార్టీ అధ్యక్షుడు వైయస్ జగన్ వర్సెస్ నారా లోకేష్‌గా మార్చేందుకు తెలుగుదేశం పార్టీ అధ్యక్షుడు నారా చంద్రబాబు నాయుడు ప్రయత్నిస్తున్నారు. అందుకుగాను ఈ నెల 28వ తేదీన జరిగే మహానాడులో తీర్మానం చేసి తన కుమారుడు నారా లోకేష్‌ను ప్రత్యక్ష రాజకీయాల్లోకి తెస్తున్నారు. తాను ఇప్పుడే పార్టీ నాయకత్వ బాధ్యతల నుంచి తప్పుకోవాలని చంద్రబాబు అనుకోవడం లేదు. కానీ వచ్చే ఎన్నికల నాటికి లోకేష్‌ను జగన్‌కు దీటుగా నిలబెట్టి పార్టీ విజయానికి వాడుకోవాలని ఆయన చూస్తున్నట్లు అనుకోవచ్చు. పార్టీ నాయకులు, కార్యకర్తలు కోరుతున్నారు కాబట్టి ఆ కోరిక మేరకే నారా లోకేష్ రాజకీయాల్లోకి వస్తున్నారని చెప్పడానికి తగిన రంగాన్ని చంద్రబాబు సిద్ధం చేశారు.

వైయస్ జగన్ కాంగ్రెసుకే కాకుండా నారా చంద్రబాబునాయుడికి కూడా బలమైన సవాల్ విసురుతున్నారు. చెప్పాలంటే, ఆయన ఎక్కువగా చంద్రబాబునాయుడినే లక్ష్యంగా చేసుకుని వాగ్బాణాలు ఎక్కుపెడుతున్నారు. చంద్రబాబు కాంగ్రెసుతో కుమ్మక్కయ్యారని పదే పదే ఆరోపించడం ద్వారా తెలుగుదేశం అస్తిత్వాన్ని, మూలాలను దెబ్బ కొట్టే ప్రయత్నం చేస్తున్నారు. దానికి తోడు, ఏ మాత్రం వ్యవధి ఇవ్వకుండా వైయస్ జగన్ కార్యక్రమం మీద కార్యక్రమం తీసుకుని ప్రజల్లోకి వెళ్తున్నారు. కడప ఉప ఎన్నికల్లో ఆయన కాలికి బలపం కట్టుకుని తిరిగారు. ఉప ఎన్నికలు ముగిసిన వెంటనే రైతు సమస్యలపై గుంటూరులో దీక్ష చేపట్టారు. మంగళవారం నుంచి విజయవాడ జిల్లాలో ఓదార్పు యాత్ర చేపట్టనున్నారు. తెరిపి లేకుండా కార్యక్రమాలు చేపట్టి ప్రజల్లోకి వెళ్లడానికి వైయస్ జగన్‌కు వయస్సు సహకరిస్తోంది.

జగన్‌కు దీటుగా ముందుకు సాగడానికి చంద్రబాబుకు వయస్సు అడ్డుపడుతోంది. అంత విస్తృతంగా పర్యటించడం చంద్రబాబు వల్ల కాదనేది తెలిసిపోతూనే ఉన్నది. ఈ స్థితిలో నారా లోకేష్‌ను రంగం మీదికి తెచ్చి, జగన్‌తో పోటీ పడేలా చేయాలనేది చంద్రబాబు వ్యూహంగా కనిపిస్తోంది. చంద్రబాబు తన స్థానాన్ని పదిలం చేసుకుని, తిరిగి అధికారం చేపట్టడానికి నారా లోకేష్ ఓ అస్త్రంగా పనికి వస్తారని భావిస్తున్నారు. నారా లోకేష్ తనను దింపడానికి ప్రయత్నం చేసే అవకాశాలు లేవు కాబట్టి మరింత కాలం తాను నాయకత్వం నెరపడానికి, ఎన్నికల్లో గెలిస్తే ముఖ్యమంత్రి పదవి చేపట్టడానికి అవకాశం ఉంటుందని చంద్రబాబు అనుకుంటున్నట్లు తెలుస్తోంది.

కాంగ్రెసు పార్టీ రాష్ట్రంలో తుడిచిపెట్టుకుపోయే పరిస్థితి ఉందని ఆ పార్టీ నాయకులే అంటున్నారు. తమిళనాడులో మాదిరిగా ఆంధ్రప్రదేశ్ కూడా రెండు ప్రాంతీయ పార్టీల ప్రాబల్యానికి అలవాలంగా మారుతుందని అంటున్నారు. ఈ స్థితిలో తమిళనాడులో కరుణానిధికి స్టాలిన్ పనికి వచ్చినట్లుగా రాష్ట్రంలో నారా లోకేష్ తనకు పనికి వస్తారని చంద్రబాబు అనుకుంటున్నట్లు చెబుతున్నారు. వైయస్ జగన్ జోరును తట్టుకోవడం నారా లోకేష్ వల్లనే అవుతుందని అనుకుంటున్నారు. దీంతో రాష్ట్ర రాజకీయాలు నారా లోకేష్ వర్సెస్ వైయస్ జగన్‌గా మారే అవకాశాలున్నాయని చెబుతున్నారు.

జూ. ఎన్టీఆర్ ఏం చేస్తారు?

తెలుగుదేశం పార్టీ అధ్యక్షుడు నారా చంద్రబాబు నాయుడు తన కుమారుడు నారా లోకేష్ అధికారిక రాజకీయ రంగ ప్రవేశానికి మార్గం సుగమం చేశారు. తన రాజకీయ వారసత్వాన్ని నారా లోకేష్‌కు అప్పగించడానికి రంగం సిద్ధం చేశారు. నేరుగా రాష్ట్ర స్థాయి నాయకత్వంలోకి తేకుండా క్రమంగా అక్కడికి చేరుకునేలా ఆయన పక్కా ప్రణాళికను రచించి అమలు చేస్తున్నారు. చిత్తూరు జిల్లా చంద్రగిరి నియోజకవర్గం పార్టీ ఇంచార్జీగా నియమించడం ద్వారా లోకేష్ ప్రత్యక్ష రాజకీయాల్లో ప్రధాన పాత్ర పోషించడానికి వీలు కల్పిస్తున్నారు. చంద్రగిరి మండల నాయకులు తీర్మానం చేసి పార్టీ మహానాడుకు పంపితే దాన్ని ఆమోదించేందుకు రంగం సిద్ధమైంది.

చంద్రగిరి నియోజకవర్గం నుంచి గతంలో చంద్రబాబు సోదరుడు నారా రామ్మూర్తి నాయుడు పోటీ చేశారు. ఆ తర్వాత సినీ నటి రోజా పోటీ చేశారు. తన స్వస్థలం చంద్రగిరి నియోజకవర్గం బాధ్యతలను చంద్రబాబు ఇప్పుడు తన కుమారుడు లోకేష్ చేతిలో పెడుతున్నారు. చంద్రగిరి నుంచి శాసనసభకు ఎన్నికయ్యేలా చూసి రాష్ట్ర రాజకీయాల్లో లోకేష్ రాష్ట్ర రాజకీయాల్లో ప్రధాన భూమిక పోషించే విధంగా ప్రణాళిక అమలవుతోందని తెలిసి పోతూనే ఉన్నది. నారా లోకేష్‌ను ఎదుర్కోవడానికి సిద్ధపడిన స్వర్గీయ ఎన్టీఆర్ తనయుడు నందమూరి హరికృష్ణ వ్యూహం ఎలా ఉంటుందనేది ఆసక్తికరంగా మారింది. అదే సమయంలో తన తండ్రి హరికృష్ణ సహకారం పొందుతున్న సినీ హీరో జూనియర్ ఎన్టీఆర్ ఏం చేయబోతారనే చర్చ జరుగుతోంది.

జూనియర్ ఎన్టీఆర్ 2019 ఎన్నికలను లక్ష్యం చేసుకుని ముందుకు రావాలని అనుకుంటున్నట్లు ఇటీవల వార్తలు వచ్చాయి. అందుకుగాను ఆయన వైయస్సార్ కాంగ్రెసు పార్టీ అధ్యక్షుడు వైయస్ జగన్‌తో కలిసి పని చేయడం ద్వారా 2014లో చంద్రబాబు గెలవకుండా చూడాలని అనుకుంటున్నట్లు కూడా చెబుతున్నారు. అయితే, వైయస్ జగన్‌తో పాటు నారా లోకేష్ లక్ష్యం కూడా 2014 ఎన్నికలే అవుతున్నాయి. అయితే, 2014లోనే చంద్రబాబు తప్పుకుని నారా లోకేష్‌కు పగ్గాలు అప్పజెప్తారని చెప్పలేం. దాదాపు పదేళ్ల పాటు ప్రత్యక్ష రాజకీయాల్లో ఉండి, తగిన అనుభవం సంపాదించుకునే వరకు చంద్రబాబు మాత్రమే నాయకత్వం వహిస్తారు. కింది స్థాయి నుంచి ప్రజల ఆమోదంతో, పార్టీ కార్యకర్తలో ఆమోదంతో లోకేష్ వచ్చారని చెప్పడానికి తగిన ప్రాతిపదికను కూడా చంద్రబాబు ఏర్పాటు చేసుకుంటున్నారు. ఏమైనా, జూనియర్ ఎన్టీఆర్‌కు ఇది పరీక్షా కాలమే.

పలువురు చెవులు కొరుక్కుంటున్నారు.

తెలుగుదేశం పార్టీలో ఇటు నారా, అటు నందమూరి కుటుంబాల మధ్య వారసత్వ పోరు జరుగుతున్న వాదనలు వినిపిస్తున్న నేపథ్యంలో టిడిపి అధ్యక్షుడు చంద్రబాబునాయుడు తనయుడు నారా లోకేష్ కుమార్‌కు పార్టీలో మరింత ప్రాధాన్యత కల్పించే దిశలో ప్రయత్నాలు చేస్తున్నట్టుగా తెలుస్తోంది. ఇందులో భాగంగా బాబు సొంత జిల్లా చిత్తురు జిల్లాలోని చంద్రగిరి నియోజకవర్గ బాధ్యతలను నారా లోకేష్ కుమార్‌కు అప్పగించేందుకు పార్టీ ప్రయత్నాలు చేస్తున్నట్లు తెలుస్తోంది. చంద్రబాబు సొంత జిల్లా నారావారిపల్లె కూడా చంద్రగిరి నియోజకవర్గంలోనే ఉంది.

అయితే చంద్రగిరి నియోజకవర్గంలో కాంగ్రెసు హవా కూడా ఉంది. అక్కడ పులివెందులలా ఏకపక్షంగా లేదు. దీంతో అక్కడి టిడిపి చంద్రగిరి నియోజకవర్గానికి లోకేష్‌ను ఇంఛార్జ్‌గా నియమిస్తే పార్టీ బాగా బలపడుతుందని అభిప్రాయపడినట్లుగా తెలుస్తోంది. పార్టీ అధినేత దృష్టికి కూడా ఈ విషయాన్ని తీసుకు వచ్చినట్లుగా తెలుస్తోంది. పార్టీని మరింత బలోపేతం చేయడానికి లోకేష్‌ను చంద్రగిరి నియోజకవర్గానికి ఇంఛార్జిగా నియమించాలనే తీర్మానాన్ని మంగళవారం జిల్లా పార్టీ సమావేశంలో ప్రవేశ పెట్టనున్నారని తెలుస్తోంది. అలా అయితే అది జిల్లా సమావేశంలో వీజీగానే ఆమోదం పొందుతుంది.

ఎలాగూ తనయుడి రాజకీయ ప్రవేశానికి తహతహలాడుతున్న చంద్రబాబు కూడా దానిని ఆమోదించే అవకాశాలే ఎక్కువ ఉన్నాయి. అంతేకాదు ఈ తీర్మానాన్ని త్వరలో జరిగే మహానాడులో ప్రవేశ పెట్టి ఆమోదించే ప్రయత్నాలు కూడా జరుగుతున్నాయంట.
అయితే లోకేష్ కుమార్ కోసం జిల్లా పార్టీ నేతలు తీర్మానం ప్రవేశ పెట్టాల్సిందిగా చంద్రబాబు ఆదేశించారని కూడా పలువురు చెవులు కొరుక్కుంటున్నారు.

కాంగ్రెసు వైపు వైయస్ జగన్?

వైయస్ఆర్ కాంగ్రెసు పార్టీ అధినేత వైయస్ జగన్మోహన్ రెడ్డిని తిరిగి కాంగ్రెసులోకి రప్పించేందుకు కేంద్రమంత్రి గులాం నబీ ఆజాద్ ప్రయత్నాలు చేస్తున్నట్టుగా తెలుస్తోంది. కాంగ్రెసు పార్టీకి అత్యంత ప్రధాన రాష్ట్రంగా పేరుపడ్డ ఆంధ్రప్రదేశ్‌లో కాంగ్రెసు పార్టీ దెబ్బ తినకూడదంటే జగన్‌ను దరి చేర్చుకోక తప్పదని ఆజాద్ భావిస్తున్నట్టుగా తెలుస్తోంది. జగన్‌తోనే రాష్ట్రంలో పార్టీ మరింత బలపడుతుందని ఆయన భావిస్తున్నట్టుగా తెలుస్తోంది. ఇటీవల రాష్ట్ర పర్యటనకు వచ్చిన ఆజాద్ పార్టీని నడిపించే నాయకుడు ఎవరు కూడా లేరవి నిశ్చయానికి వచ్చినట్టుగా తెలుస్తోంది. అందులో భాగంగా ఆయన పలువురు ముఖ్య నేతలతో కూడా భేటీ అయ్యారు. ఎవరి వలన పార్టీ బలపడుతుంది అనే విషయంపై రాష్ట్ర నేతలను ప్రశ్నించినట్టుగా తెలుస్తోంది. అందరి ఆలోచనలతో న్యూడిల్లీ వెళ్లిన ఆజాద్ జగన్‌ను పార్టీలోకి అహ్వానించడం అనే కొత్త వాదనను అధిష్టానం ముందు ఉంచినట్లుగా సమాచారం.

రాష్ట్రంలో ముఖ్యమంత్రి కిరణ్ కుమార్ బలహీనపడ్డారని, ఆయన పార్టీని సరిగా నడపలేక పోతున్నారనే భావనకు ఆజాద్ వచ్చారని, మంత్రులు, ఎమ్మెల్యేల ఫిర్యాదు కూడా ముఖ్యమంత్రిపై ఫిర్యాదు చేయడంతో ఆయన సిఎంపై మరింత అసంతృప్తితో వ్యక్తం చేసినట్లుగా తెలుస్తోంది. ఆజాద్ రాక కారణంగా రాష్ట్రంలో కొత్త సమీకరణాలు వచ్చే అవకాశం లేక పోలేదని, పెను మార్పులు జరిగే అవకాశమున్నదని కాంగ్రెసు నేతలు భావిస్తున్నారంట. కడప జిల్లాలో జగన్‌కు గట్టిపోటీ కూడా ఎవరూ ఇవ్వక పోవడాన్ని కూడా ఆయన తీవ్రంగా పరిగణించినట్లుగా తెలుస్తోంది. జగన్‌ను అడ్డుకోవడంలో అందరూ విఫలమవడంతో జగనే ఆజాద్‌కు సమాధానంగా కనిపిస్తున్నాడనే వాదనలు వినిపిస్తున్నాయి. గతంలో మహారాష్ట్రలో శరద్ పవార్, పశ్చిమ బెంగాల్‌లో కాంగ్రెసు పార్టీ నుండి బయటకు వెళ్లి సొంత పార్టీలు పెట్టి కాంగ్రెసును పూర్తిగా దెబ్బ తీసిన వైనాన్ని అధిష్టానానికి ఆజాద్ గుర్తు చేసినట్టుగా తెలుస్తోంది.

అయితే జగన్ పార్టీలోకి రావడానికి ఆసక్తి కనబర్చకున్నా కనీసం జగన్ పార్టీతో అవగాహన కుదుర్చుకోవాలని ఆజాద్ మదిలో ఉన్నదని తెలుస్తోంది. అయితే సెంటిమెంట్ కారణంగా ఇప్పటికిప్పుడు జగన్ ప్రభావం ఏమేరకు ఉంటుందో చెప్పడం కష్టం కాబట్టి 2014 వరకు చూసి అప్పటి ఎన్నికలలో జగన్ ప్రభావం ఏ మేరకు ఉంటుందో గమనించి జగన్‌ను పార్టీలోకి తిరిగి రప్పించడము ఆయన కాదంటే కలిసి వెళ్లడమా అనే నిర్ణయానికి వచ్చే అవకాశాలను ఆజాద్ యోచిస్తున్నట్టుగా తెలుస్తోంది. అందులో భాగంగా ఇప్పటి నుండే వ్యూహం రచిస్తున్నట్లుగా సమాచారం. కేంద్రంలో కాంగ్రెసు బలపడాలంటే 2014 ఎన్నికలలో జగన్ మద్దతు తప్పనిసరి అని ఆజాద్ భావిస్తున్నట్లుగా తెలుస్తోంది. ప్రభుత్వ సలహాదారు కెవిపి రామచంద్రారావు కూడా తెరపైకి వస్తారనే వాదనలు కూడా ఆజాద్ వచ్చి వెళ్లిన తర్వాత వినిపిస్తుండటం విశేషం. అయితే ఆయన ఇతర పార్టీలతో కలిసి కాంగ్రెసును దెబ్బతీయాలనుకుంటే జగన్‌ను అణగదొక్కడం అనే అంశంపై కూడా దృష్టి సారిస్తున్నట్లుగా తెలుస్తోంది. జగన్ తన లక్ష్యం అయిన ముఖ్యమంత్రి అయినా కాకున్నా కాంగ్రెసును దెబ్బతీయడం మాత్రం ఖాయం కాబట్టి ఆజాద్ అన్ని కోణాలలో దృష్టి సారిస్తున్నట్లుగా తెలుస్తోంది.

ప్రీచర్లకు చేదు అనుభవమే ఎదురైంది

బైబిల్ లెక్కల ప్రకారం.. మే 21, 2011 (శనివారం)న ఈ ప్రపంచం అంతరించిపోతుందని అమెరికాలో డప్పుకొట్టి మరీ ప్రచారం చేసిన కొందరు ప్రీచర్లకు చేదు అనుభవమే ఎదురైంది. కాలిఫోర్నియాకు చెందిన క్రైస్తవ మత ప్రచార రేడియో అయిన "ఫ్యామిలీ రేడియో" అధ్యక్షుడు హరోల్డ్ క్యాంపింగ్ తెలిపిన దాని ప్రకారం.. మే 21, 2011న అమెరికాలో స్థానిక సమయం ప్రకారం, శనివారం సాయంత్రం సరిగ్గా ఆరు గంటలకు పెను భూకంపం సంభవించి ఈ ప్రపంచం అంతరించి పోతుందని విశ్లేషించి శనివారాన్ని ‘జడ్జిమెంట్ డే’ అని అభివర్ణిస్తూ భారీ ప్లకార్డులు, బ్యానర్లతో న్యూయార్క్ మొత్తం ప్రచారం సాగించారు. కానీ ఆయన చెప్పినట్లుగా ఏమీ జరగలేదు. అంతా ప్రశాంతంగానే ఉంది.

‘బైబిల్ ప్రకారం 4990 సంవత్సరంలో జలప్రళయం సంభవించినప్పుడు తాను ఈ భూగోళాన్ని ఏడు రోజుల్లో నాశనం చేస్తానని ప్రభువు చెప్పాడు. అలాగే ఏడురోజుల్లో ఆయన దాన్ని నాశనం చేస్తాడు’ అని హరోల్డ్ వాదించారు. ఇంకా ఏసు ప్రభువుకు ఒక్క ఒక రోజు వెయ్యి సంవత్సరాలతో సమానమని, దీని ప్రకారం.. అంటే 4990 సంవత్సరాలు, వెయ్యేళ్లకు ఒక రోజు చొప్పున 7001 సంవత్సరాలు మొత్తం కలిపితే 2011 సంవత్సరం. అలాగే అప్పటి క్యాలెండర్ ప్రకారం ప్రళయం సంభవించిన రెండో నెల 17వ రోజు, ఇప్పుడు మే 21, 2011వ తేదీ ఒకటే కావడాన్ని బట్టి చూస్తే ఆ ప్రళయం శనివారమే జరుగుతుందని హరోల్డ్ పేర్కొన్నారు.

గత 1994లో కూడా ఇలాంటి ప్రచారమే జరిగింది. 1994లో ఓ రోజు సరిగ్గా 6 గంటలకు భూమి అంతరించి పోతుందని, ఇది తొలుత న్యూజిలాండ్ నుంచి ప్రారంభమవుతుందని ప్రచారం జరిగింది. అయితే ఆ రోజు 6 గంటల సమయం వచ్చి వెళ్లపోయింది. భూకంపం కానీ దానికి సంబంధించిన ఆనవాళ్లు కానీ ఎక్కడా కనిపించలేదు. కేవలం మీడియా అటెన్షన్ తప్ప. కాబట్టి ఇలాంటి తప్పుడు ప్రచారాలను అస్సలు నమ్మకండి. ప్రజలను రక్షించాల్సిన దేవుడే ప్రపంచాన్ని అంతం చేస్తాననడం ఎంత వరకూ సమర్థనీయమైనదో సదరు ప్రచారకులే తెలుసుకోవాలి. కాబట్టి ఏం జరిగినా అంత మన మంచికే అనుకుంటూ ప్రజలందరూ ముందుకు సాగిపోతూ, ఇలాంటి మూఢ నమ్మకాలకు ఇకనైనా ఫుల్‌స్టాప్ పెట్టక తప్పదు.

అమెరికన్లకు వింత భయం

అమెరికన్లకు వింత భయం పట్టుకుంది. యుగాంతం గురించి ఎన్నో కథనాలు, మరెన్నో ఆసక్తికర విషయాలు పుకార్లుగా షికార్లు చేస్తున్న ఇటీవలి కాలంలో అమెరికాలో మరో ఆసక్తి కోణం వెలుగులోకి వచ్చింది. కొందరు 2012లో యుగాంతం సంభవిస్తుందని చెబుతుంటే కొందరు అమెరికన్లు మాత్రం ఈ రోజే (మే 21, 2011 శనివారం) యుగాంతం సంభవిస్తుందని ప్రచారం చేస్తున్నారు.

క్రిస్టియన్ మతస్థుల పరమ పవిత్ర గ్రంధమైన బైబిల్ ప్రకారం... శనివారం అంటే మే 21న ప్రపంచం అంతమై పోతుందని హెచ్చరిస్తూ అమెరికాలోని న్యూయార్క్‌లో కొంతమంది కరపత్రాలు, బ్రోచర్లు, పుస్తకాలు మరియు పోస్టర్లతో నగరంలోని కూడలి ప్రాంతాల్లో ప్రచారం చేస్తున్నారు. నేడు ప్రపంచవ్యాప్తంగా పెను భూకంపం సంభవించి ప్రపంచం అంతమైపోతుందని హెచ్చరిస్తూ న్యూయార్క్ సిటీ సబ్‌వేలో అడ్వర్టయిజ్‌మెంట్లు సైతం వెలిసాయి. అక్కడి ప్రజలు మే 21ని ‘జడ్జిమెంట్ డే’గా పేర్కొంటున్నారు.

మరి బైబిల్ ప్రకారం మే 21, 2011 రోజునే ఈ ప్రళయం ఎలా సంభవిస్తుందని చెప్పగలరు..? ఇందుకు సమాధానం కాలిఫోర్నియాకు చెందిన క్రైస్తవ మత ప్రచార రేడియో అయిన ఫ్యామిలీ రేడియో అధ్యక్షుడు హరోల్డ్ క్యాంపింగ్ వద్ద ఉంది ఆయన లెక్కలు వేసి విశ్లేషించిన దాని ప్రకారం.. ఈ ప్రళయం శనివారమే జరుగుతుందని బల్ల గుద్ది మరీ చెబుతున్నాడు. ‘బైబిల్ ప్రకారం 4990 సంవత్సరంలో జలప్రళయం సంభవించినప్పుడు తాను ఈ భూగోళాన్ని ఏడు రోజుల్లో నాశనం చేస్తానని ప్రభువు చెప్పాడు. అలాగే ఏడురోజుల్లో ఆయన దాన్ని నాశనం చేస్తాడు’ అని హరోల్డ్ వాదిస్తున్నారు.

అంతేకాకుండా.. ఏసు ప్రభువు తనకు ఒక్క ఒక రోజు వెయ్యి సంవత్సరాలతో సమానమని చెప్పినట్లు హరోల్డ్ అంటున్నారు, దీని ప్రకారం.. అంటే 4990 సంవత్సరాలు, వెయ్యేళ్లకు ఒక రోజు చొప్పున 7001 సంవత్సరాలు మొత్తం కలిపితే 2011 సంవత్సరం. కాబట్టి ఈ రోజునే ప్రళయం సంభవిస్తుందని హరోల్డ్ లెక్కలు కట్టారు. ఇంకా అప్పటి క్యాలెండర్ ప్రకారం ప్రళయం సంభవించిన రెండో నెల 17వ రోజు, ఇప్పుడు మే 21, 2011వ తేదీ ఒకటే కావడాన్ని బట్టి చూస్తే ఆ ప్రళయం శనివారమే జరుగుతుందని హరోల్డ్ అంటున్నారు. అయితే ఇప్పటికే ఇలాంటి ప్రకటనలు చాలానే వచ్చాయి. ఏది జరిగినా భగవంతునిపై భారం వేసి మన జీవన ప్రయాణం కొనసాగించక తప్పదు మరి. అంతా మంచే జరగాలని, అందరూ హాయిగా ఉండాలని కోరుకుందాం.

నాగం జనార్దన్ రెడ్డి కార్నర్

తెలుగుదేశం తెలంగాణ ప్రాంత శాసనసభ్యుల్లో నాగం జనార్దన్ రెడ్డి ఒంటరి అయినట్లే కనిపిస్తున్నారు. నాగం జనార్దన్ రెడ్డి విధానాలకు వ్యతిరేకంగా శుక్రవారం తెలుగుదేశం తెలంగాణ విస్తృత స్థాయి సమావేశంలో నిర్ణయాలు జరిగాయి. తెలంగాణ కోసం చేపట్టాల్సిన కార్యక్రమాలపై శుక్రవారం ఈ సమావేశం జరిగింది. సమావేశంలో శాసనసభ్యులు ఎర్రబెల్లి దయాకర్ రావుకు, నాగం జనార్దన్ రెడ్డికి మధ్య తీవ్ర వాగ్వివాదం చెలరేగినట్లు తెలుస్తోంది. దీంతో నాగం జనార్దన్ రెడ్డి సమావేశం మధ్యలోనే లేచి వెళ్లిపోయారు. ఎర్రబెల్లి దయాకర్ రావు నాయకత్వంలో టిడిపి తెలంగాణ సమన్వయ కమిటీ ఏర్పాటుతో నాగం జనార్దన్ రెడ్డికి చెక్ పెట్టాలన్న వ్యూహం ఈ సమావేశంతోనే అమలు కావడం ప్రారంభమైందని చెప్పవచ్చు.

శుక్రవారం జరిగిన తెలంగాణ విస్తృత స్థాయి సమావేశానికి నాగం జనార్దన్ రెడ్డి హాజరు కాగా, హరీశ్వర్ రెడ్డి గైర్హాజరయ్యారు. పరిగిలో శనివారం జరిగే తెలంగాణ నగారా సభ ఏర్పాట్లలో ఉండడం వల్లనే ఆయన రాలేకోపయారని చెబుతున్నారు. పరిగి సభకు వెళ్లాలా, వద్దా అనే విషయంపై సమావేశంలో ఏకాభిప్రాయం కుదరలేదని తెలుస్తోంది. నాగం జనార్దన్ రెడ్డి తెలంగాణలో చేయాలని తలపెట్టిన నగారా సభలకు కూడా ఎర్రబెల్లి దయాకర్ రావు వర్గం బ్రేకులు వేసే కార్యక్రమానికి సిద్ధపడింది. ఈ నెల 25వ తేదీన కరీంనగర్ జిల్లాలో నగారాను నిర్వహించాలని సమావేశం నిర్ణయించింది.

ఇక ముందు తెలంగాణ నగారా సభలు పార్టీ జెండాలతోనే జరపాలని కూడా నిర్ణయించింది. తెలంగాణకు అనుకూలంగా కేంద్ర హోం మంత్రి చిదంబరానికి లేఖ ఇస్తేనే పార్టీ జెండా పెట్టాలని నాగం జనార్దన్ రెడ్డి పెట్టిన మెలికను ఆయన వ్యతిరేకవర్గం తిప్పికొట్టింది. ఈ నెల 23వ తేదీన నల్లగొండ జిల్లా యాదగిరిగుట్ట నుంచి తలపెట్టిన పాదయాత్ర కూడా సందిగ్ధంలో పడింది. ఈ కార్యక్రమాన్ని భువనగిరి శానససభ్యురాలు ఉమా మాధవ రెడ్డి అభ్యంతరం చెప్పారు. పార్టీలో పదవులు అనుభవించినప్పుడు అవన్నీ గుర్తుకు రాలేదా అని ఎర్రబెల్లి దయాకర రావు నాగం జనార్దన్ రెడ్డిని ప్రశ్నించారు. తాను ఒక్కడినే లేనని, తన వెంట చాలా మంది ఉన్నారని నాగం జనార్దన్ రెడ్డి అన్నారు.

వెనక్కి తగ్గడానికి నాగం జనార్దన్ రెడ్డి సిద్ధంగా లేరు.

తెలంగాణపై తన పోరాటంలో వెనక్కి తగ్గడానికి తెలుగుదేశం తెలంగాణ ప్రాంత శాసనసభ్యుడు నాగం జనార్దన్ రెడ్డి సిద్ధంగా లేరు. తాను తమ పార్టీ అధ్యక్షుడు నారా చంద్రబాబు నాయుడికి గానీ పార్టీకి వ్యతిరేకం కాదంటూనే చంద్రబాబు వైఖరిని తప్పు పట్టారు. చంద్రబాబు అనుకూల తెలంగాణ నేతలపై తీవ్ర వ్యాఖ్యలు చేశారు. పార్టీ తెలంగాణ విస్తృత స్థాయి సమావేశం నుంచి మధ్యలో బయటకు వచ్చిన నాగం జనార్దన్ రెడ్డి శనివారం సాయంత్రం మీడియా ప్రతినిధులతో మాట్లాడారు. పార్టీ జెండా లేకుండానే తాను సభలు నిర్వహిస్తానని ఆయన చెప్పారు. రేపు శనివారం పరిగి తెలంగాణ నగారా సభ కూడా పార్టీ జెండా లేకుండానే జరుగుతుందని, ఈ సభకు అందర్నీ ఆహ్వానిస్తానని ఆయన చెప్పారు. రేపటి సమావేశానికి అందరూ వస్తారని ఆశిస్తున్నట్లు ఆయన తెలిపారు.

సమావేశంలో పార్టీ జెండా లొల్లే తప్ప తెలంగాణ ఉద్యమాన్ని ముందుకు ఎలా తీసుకుని వెళ్లాలనే ఆలోచన చేయలేదని, అటువంటి సమావేశంలో తాను ఎలా కూర్చుంటానని ఆయన అన్నారు. సమావేశం ఎన్టీఆర్ ట్రస్టు భవన్‌లో జరిగింది కాబట్టి చాలా మంది మాట్లాడడానికి భయపడుతున్నారని ఆయన అన్నారు. తాను నిర్వహించిన నాగర్ కర్నూలు సభ ప్రకంపనలు సృష్టించిందని, ఉద్యమాన్ని ఉధృతం చేయడానికే సమావేశం నిర్వహించానని ఆయన అన్నారు. తెలంగాణ సాధన కోసం ప్రజల సమీకరణకు పార్టీ జెండా పెడితే ఎలా వస్తారని ఆయన అన్నారు. తెలంగాణ కోసం చేపట్టే ఉద్యమంలో పార్టీ జెండా పెడితే అన్ని పార్టీలవాళ్లు రారని ఆయన అన్నారు.

కాంగ్రెసు తెలంగాణ ప్రాంత నాయకులు కూడా పార్టీ జెండా పెట్టడం లేదని, ఎర్రబెల్లి దయాకర రావు వరంగల్ జిల్లాలో ఎలా పాల్గొంటున్నారని ఆయన అన్నారు. పార్టీలకు అతీతంగా ఉద్యమాలు చేస్తేనే తెలంగాణ సాధించుకోగలుగుతామని ఆయన చెప్పారు. కాలం చెల్లిన ప్రణబ్ కమిటీకి తెలంగాణకు అనుకూలంగా లేఖ ఇచ్చామంటే ఎవరు నమ్ముతారని ఆయన అడిగారు. తాము కలిసినప్పుడు చంద్రబాబు నుంచి తెలంగాణకు అనుకూలంగా లేఖ కావాలని కేంద్ర హోం మంత్రి చిదంబరం సంకేతాలిచ్చారని ఆయన చెప్పారు. తెలంగాణపై తమ నాయకులు స్పష్టత లేదని ఆయన అన్నారు.

జగన్‌ వ్యాపార సామ్రాజ్య రహస్యము ఇదేనా??

జగన్‌దీ అం '' బాణీ ''యే!
కంపెనీలపై కంపెనీల ఏర్పాటు
వేల కోట్లు టర్నోవర్ చేసే అనామక కంపెనీలు
లెక్కచూపని నిధులతో వ్యాపార సామ్రాజ్య నిర్మాణం
దశాబ్దాల కిందటే రిలయన్స్ అనుసరించిన మార్గం
యువనేత చేతుల్లో కొత్త పుంతలు తొక్కుతున్న వైనం
ఒక ప్రధాన కంపెనీ. దాని చుట్టూ వందల సంఖ్యలో అనామక కంపెనీలు. ఒక కంపెనీలో మరో కంపెనీ పెట్టుబడి.. రెండు కంపెనీల మధ్య పరస్పర పెట్టుబడులు.. ఈక్విటీల జారీ.. రుణాలు ఇచ్చి పుచ్చుకోవడాలు.. అల్లిబిల్లిగా అల్లుకుపోయిన బ్రహ్మజెముడు పొదల వంటి ఒక సంక్లిష్ట వ్యవస్థ! వేల రూపాయల పెట్టుబడితో ఏర్పాటైన అనామక కంపెనీల చేతుల మీదుగా కోట్ల రూపాయల లావాదేవీలు. ఈ అనామక కంపెనీల వెనక ఎవరున్నారో చాలా సందర్భాల్లో ఎవరికీ తెలియదు. ఏమిటిదంతా...? ఇది వ్యాపార సామ్రాజ్య విశేషం కాదు. లెక్క చూపని నిధులతో వ్యాపార సామ్రాజ్యాలను నిర్మించే వ్యూహం.

చట్టం కన్నుగప్పి నల్లధనాన్ని చలామణి చేసే విధానం. ప్రమోటర్ల అక్రమ ప్రయోజనాలను కాపాడే అకౌంటింగ్ మార్గం. యువనేత వైఎస్ జగన్మోహన్‌రెడ్డి సారథ్యంలోని వ్యాపారాల్లో సహజత్వాన్ని సంతరించుకున్న ఈ కత్తిలాంటి వ్యూహానికి ఆద్యుడు రిలయన్స్ వ్యవస్థాపకుడు ధీరూభాయ్ అంబానీ. బడా కార్పొరేట్ సంస్థల్లో అనేకం ఏదో ఒక దశలో ఈ వ్యూహాన్ని అనుసరించినా.. నేడు జగన్మోహన్‌రెడ్డి చేతుల్లో ఈ వ్యూహం కొత్త పుంతలు తొక్కుతోంది.

హైదరాబాద్, మే 17 : హైదరాబాద్‌లోని అత్యంత ఖరీదైన జూబ్లీహిల్స్ లోటస్ పాండ్ సమీపంలో అరడజను ప్లాట్లను సొంతం చేసుకుని, నూరు కోట్లతో మహారాజ ప్రాసాదాన్ని నిర్మిస్తున్న వైఎస్ జగన్మోహన్‌రెడ్డి ఈ ప్లాట్లను సొంతం చేసుకోవడానికి అనుసరించిన వ్యూహంపై 'ఆంధ్రజ్యోతి'లో మంగళవారం వెలువడిన కథనం సంచలనం సృష్టించింది. నిజానికిది, జగన్ కనిపెట్టిన విద్య కాదు.

ఆస్తుల కొనుగోలుకు, సంపద సృష్టికి, సృష్టించిన సంపదను మళ్లించడానికి కంపెనీలపై కంపెనీలు పెట్టే పద్ధతిని పతాక స్థాయికి తీసుకువెళ్లిన తొలి ఘనత ఈ దేశంలో రిలయన్స్ వ్యవస్థాపకుడు ధీరూభాయ్ అంబానీకి దక్కుతుంది. రిలయన్స్ వ్యాపార ప్రస్థానంలో అల్లిబిల్లిగా అల్లుకుపోయిన ఈ చిల్లర కంపెనీల పాత్ర చాలా పెద్దది. ఈ కంపెనీలను ఉపయోగించి ఆ రోజుల్లోనే విదేశీ నిధులను తెప్పించిన వైనం... ఇటీవలి కాలంలో పన్నుల ఎగవేతకు పుట్టగొడుగు కంపెనీలనుఅడ్డు పెట్టుకుంటున్న తీరు ఆశ్చర్యచకితులను చేస్తాయి.

నేడు మారిషస్.. నాడు ఐజల్ ఆఫ్ మాన్
ఇప్పుడు మారిషస్‌లాగా.. అప్పట్లో బ్రిటిష్ దీవి ఐజల్ ఆఫ్ మాన్ పన్నుల ఎగవేతదారులకు, రాజమార్గంలో భారత్‌కు నిధులను తరలించే వారికి స్వర్గధామంగా ఉండేది. ఐజల్ ఆఫ్ మాన్ కేంద్రంగా వెలసిన డజన్ల సంఖ్యలోని కంపెనీలు అప్పట్లో రిలయన్స్‌లోకి కోట్లాది రూపాయలను గుప్పించాయి. ఈ కంపెనీల పేర్లు చిత్రంగా ఉండటం, ఈ కంపెనీల ప్రమోటర్లు ఎవరో తెలియకపోవడం వర్తమాన దృశ్యాన్ని జ్ఞాపకం చేస్తాయి.

రిలయన్స్ షేర్లలో దాదాపు పాతిక కోట్ల రూపాయల మేర ఇన్వెస్ట్ చేసిన ఆ కంపెనీల పేర్లు క్రొకడైల్ ఇన్వెస్ట్‌మెంట్, ఐయోటా ఇన్వెస్ట్‌మెంట్, ఫియాస్కో ఇన్వెస్ట్‌మెంట్... కాగా, ఈ ఇన్వెస్ట్‌మెంట్ కంపెనీల ప్రమోటర్లందరి పేరు చివరన 'షా' అన్న తోక ఉంది. ఎన్ఆర్ఐలు అని చెప్పడం తప్ప వీరెవరో ఎవరికీ తెలియదు. ఈ కంపెనీలన్నింటికీ మార్కెట్ ధర కంటే తక్కువ రేటుకు రిలయన్స్ షేర్లను అంబానీలు విక్రయించారు. ఈ షేర్ల విక్రయం ద్వారా సమీకరించిన సొమ్ముతోపాటు బ్యాంకుల నుంచి కూడా భారీ మొత్తాన్ని అంబానీలు సమీకరించారు.

ఇందుకు కూడా మళ్లీ పుట్టగొడుగు కంపెనీల వ్యూహాన్నే అనుసరించారు. యాభై వరకు కంపెనీలను ఏర్పాటు చేసి, వాటికి రిలయన్స్ కన్వర్టెబుల్ డిబెంచర్లను జారీ చేశారు. డిబెంచర్ల కొనుగోలుకు అప్పులిచ్చేందుకు బ్యాంకులను రంగంలోకి దించారు. పోటాపోటీగా అప్పట్లో బ్యాంకులు ఈ రుణ మేళాలో పాల్గొన్నాయి. ఈ రకంగా సమీకరించిన సొమ్మును ఉపయోగించి స్టాక్ మార్కెట్‌ను ధీరూభాయ్ ఆడుకున్నారు. ఈ ఉదంతం మరింత ఆసక్తికరం.

కోల్‌కతా బ్రోకర్లకు చావుదెబ్బ
రిలయన్స్ యాత్ర 1958లో రిలయన్స్ కమర్షియల్ కార్పొరేషన్ పేరుతో ప్రారంభమైంది. ట్రేడింగ్ కంపెనీగా ప్రారంభమై ఉత్పత్తుల్లోకి అడుగుపెట్టిన ఈ సంస్థ 1977లో పబ్లిక్ ఇష్యూకు వచ్చింది. ఈ షేరులో ట్రేడింగ్ జోరుగా సాగేది. బుల్స్, బేర్స్ మధ్య పోటాపోటీగా క్రయవిక్రయాలు జరిగేవి. ఈ ట్రేడింగ్ నుంచి లాభపడేందుకు రిలయన్స్ ప్రమోటర్లు పుట్టించిన కంపెనీలు ప్రయత్నిస్తుంటే.. వాటిని దెబ్బతీసేందుకు ప్రత్యర్థి సంస్థలు ప్రయత్నించేవి. 1982లో రిలయన్స్ రైట్స్ ఇష్యూ జారీ చేసింది.

రిలయన్స్ షేర్లలో లిక్విడిటీ పెరగడాన్ని అదనుగా తీసుకుని షేరు ధరను చితక్కొట్టేందుకు కొందరు బేర్ ఆపరేటర్లు రంగంలోకి దిగారు. ోల్‌కతాకు చెందిన కొందరు స్టాక్ బ్రోకర్లు (బేర్ ఆపరేటర్లు) జట్టుకట్టి ఎడాపెడా షార్ట్ సెల్లింగ్‌కు దిగారు. ప్రత్యర్థుల ఎత్తును చిత్తు చేసేందుకు ధీరూభాయ్ అంబానీ తన బినామీ కంపెనీలు, అనుకూలురైన బ్రోకర్ల (బుల్ ఆపరేటర్లు)తో అంతకంటే ఉధృతంగా షేర్లను కొనిపించారు. షార్ట్ సేల్ చేసిన ఆపరేటర్లు ఊహించినట్టు షేరు ధర ఏ మాత్రం పడిపోలేదు.

పైగా డెలివరీ ఇవ్వాల్సిన సమయం వచ్చేసరికి మార్కెట్‌లో షేర్లు దొరకని పరిస్థితి. రిలయన్స్ ఫ్రెండ్స్‌గా ప్రచారంలోకి వచ్చిన బ్రోకర్లు, షార్ట్ సేల్ చేసిన ఆపరేటర్లను షేర్లు డెలివరీ ఇవ్వాలని గట్టిగా డిమాండ్ చేసే సరికి సంక్షోభం మొదలైంది. కొందామంటే మార్కెట్‌లో షేర్లు లేవు. ఒక్కో షేరుకు 35 రూపాయల పెనాల్టీ ఇవ్వాలని అంబానీ అనుకూల బ్రోకర్లు డిమాండ్ చేశారు. ఈ సంక్షోభం బీఎస్ఈని కుదిపేసింది. ఎక్స్చేంజ్ మూడు రోజులపాటు మూతపడింది. బీఎస్ఈ మధ్యవర్తిత్వం వహించి షేరుకు 2 రూపాయల పెనాల్టీని నిర్ణయించింది. షేర్ల డెలివరీకి కొంత గడువు ఇప్పించింది.

ఈ పరిణామాలతో రిలయన్స్ షేరు ధర భారీగా పెరిగింది. చేతులు కాలిన కోల్‌కతా బ్రోకర్లకు అంబానీయే కావల్సిన షేర్లను విక్రయించి కోట్లలో లాభాన్ని మూటగట్టుకున్నారని చెబుతారు. ఈ క్రీడలో బేర్ ఆపరేటర్లను దెబ్బతీసేందుకు ధీరూభాయ్ వెదజల్లిన సొమ్ము ఐజల్ ఆఫ్ మాన్ నుంచి, బ్యాంకుల రుణమేళా నుంచి వచ్చిపడ్డవే. స్టాక్ మార్కెట్‌లో కేవలం రిలయన్స్ షేర్లలోనే ట్రేడింగ్ చేసేందుకు వందల సంఖ్యలో కంపెనీలను అంబానీలు సృష్టించారు. అప్పట్లో ఈ వ్యవహారం తీవ్ర వివాదాన్నే సృష్టించింది. తర్వాత పునర్ వ్యవస్థీకరణ చేపట్టారు. ఇప్పటికీ రిలయన్స్ ఇరు గ్రూప్‌లకు సంబంధించి డజన్ల సంఖ్యలోనే చిన్నా చితక హోల్డింగ్ కంపెనీలు ఉన్నాయి.

పన్ను ఎగవేత కోసం..
రిలయన్స్ ఇండస్ట్రీస్ అధినేత ముకేశ్ అంబానీ ఏడాది, రెండేళ్ల క్రితం పెద్ద సంఖ్యలో లిమిటెడ్ లయబులిటీ పార్టనర్‌షిప్స్ (ఎల్ఎల్‌పీ)లను ఏర్పాటు చేశాడు. రిలయన్స్ ఇండస్ట్రీస్‌లోని తన వాటాలను డజన్ల సంఖ్యలో ఏర్పాటు చేసిన ఈ ఎల్ఎల్‌పీలకు బదిలీ చేశాడు. ఈ సంస్థల చేతుల్లో ఉన్న రిలయన్స్ షేర్ల విలువ అక్షరాలా లక్ష కోట్ల రూపాయలు. దీనివల్ల ఏమిటీ లాభం. సాధారణ కంపెనీలకు లభించే పన్ను నిబంధనలు ఈ ఎల్ఎల్‌పీలకు వర్తించవు. మ్యాట్, డివిడెండ్ డిస్ట్రిబ్యూషన్ టాక్స్ కూడా ఎల్ఎల్‌పీలకు వర్తించదు.

సర్‌చార్జ్ ఉండదు. అందువల్ల పన్నులను తప్పించుకునేందుకు తెలివిగా ముకేశ్ తన షేర్లను ఈ కంపెనీలకు బదలాయించారని అంటారు. రిలయన్స్ మాత్రమే కాకుండా ఇంకా అనేక కార్పొరేట్ సంస్థలు ఇదే బాటపట్టడంతో గత బడ్జెట్‌లో ఆర్థిక మంత్రి ప్రణబ్ ముఖర్జీ ఈ ఎల్ఎల్‌పీలపై 18.5 శాతం ప్రత్యామ్నాయ కనీస పన్ను విధిస్తున్నట్టు ప్రకటించారు. 2012-13 నుంచి ఇది అమల్లోకి వస్తుంది. ఈ దెబ్బకు ఇప్పుడు కార్పొరేట్లు మరో కొత్తదారి కోసం వెతుక్కుంటున్నాయి.

వ్యాపారాల్లో విజయాలకు అనుకూలమైన పాలసీల కోసం, ప్రత్యర్థులను దెబ్బతీయడం కోసం రాజకీయ నాయకులను కనుసన్నల్లో తిప్పుకొన్న ఘనత రిలయన్స్ ప్రమోటర్లది. ఇప్పుడు వ్యాపారంలోనూ, రాజకీయంలోనూ తానే స్వయంగా చక్రం తిప్పే ప్రయత్నం చేస్తున్న ఘనత వైఎస్ జగన్మోహన్‌రెడ్డిది. రాజకీయాల్లో ఆయన అనుకున్న లక్ష్యాలను సాధిస్తే వ్యాపారంలో, లక్షల కోట్ల రూపాయల అంబానీల సామ్రాజ్యం కూడా ఆయన ముందు చిన్నబోవడం ఖాయం.

షార్ట్ సెల్లింగ్ అంటే...
చేతుల్లో షేర్లు లేకపోయినా వాటిని అమ్మే వెసులుబాటు. ప్రస్తుతం వంద రూపాయల స్థాయిలో ఉన్న షేరు 50 రూపాయలకు పడిపోతుందని గట్టిగా తెలిస్తే, వెంటనే వంద రూపాయల రేటుకు వాటిని అమ్మేయడం, యాభై రూపాయలకు పడిపోయిన తర్వాత కొని అప్పుడు డెలివరీ ఇవ్వడం షార్ట్ సెల్లర్స్ చేసే పని. వీరిని ఎదురుదెబ్బ తీసేందుకు పొంచుకుని ఉండే బుల్ ఆపరేటర్లు షార్ట్ సేల్ చేసిన షేర్లన్నింటినీ కొనేస్తారు. గడువు తేదీన షేర్ల డెలివరీ ఇవ్వమని డిమాండ్ చేస్తారు. ఊహించినట్టుగా షేర్ల ధర పతనం కాకుండా ధర పెరిగితే మాత్రం బేర్ ఆపరేటర్లు చావుదెబ్బతిన్నట్టే. ఎక్కువ ధర పెట్టి షేర్లను కొనాల్సిందే.

పవిత్రంగా భావించే తిరుమల కొండపై విద్యార్థులు లైంగిక వేధింపులు

ప్రజలు పవిత్రంగా భావించే తిరుమల కొండపై గల ధర్మగిరి వేద పాఠశాల ప్రస్తుతం సెక్స్ కుంభకోణంతో అట్టుడికిడి పోతోంది. వేద పాఠశాలలో సెక్స్‌పరమైన ఆరాచాకాలు జరుగుతున్నాయని ఆరోపణలు వచ్చాయి. అధికారులు కూడా దాన్ని అంగీకరిస్తున్నారు. ఇందుకు సంబంధించి ముగ్గురిపై పోలీసులు కేసు పెట్టారు. అవినాష్ శర్మ, మహేష్ కన్నన్, చక్రవర్తిలపై కేసు నమోదైంది. నవీన్, నాగేంద్ర అనే విద్యార్థులు 15 రోజుల కింద అధికారులకు ఫిర్యాదు చేసినా పట్టించుకోలేదని అంటున్నారు. వేదపాఠశాలలోని కొందరు విద్యార్థులు అధ్యాపకుల సహకారంతో విచ్చలవిడి చర్యలకు పాల్పడుతున్నట్లు ఆరోపణలు వచ్చాయి.. కొందరు విద్యార్థులు సెల్ ఫోన్లలో సెక్స్ దృశ్యాలను చూడటం అలవాటుగా పెట్టుకున్నారు. జూనియర్లకు కూడా ఆ దృశ్యాలు చూపిస్తారు. అంతటితో ఆగకుండా 'ప్రాక్టికల్స్' కూడా మొదలుపెట్టారు. వేద పాఠశాలలో చేరే పేద, జూనియర్ విద్యార్థులను ఎంచుకుంటారు. వారిని లైంగికంగా వేధించడం నిత్యకృత్యకంగా మార్చారు.

మొదట బలవంతపు అత్యాచారాలకు పాల్పడి స్వలింగ సంపర్కాన్ని అలవాటు చేస్తారు. కొందరిని మగ వ్యభిచారులుగా మార్చినట్లు కూడా తెలుస్తోంది. తిరుమల జీయర్ మఠంలోని ఓ ఏకాంగి తరచూ వేద పాఠశాలకు వచ్చి పిల్లలకు డబ్బులిచ్చి స్వలింగ సంపర్కం చేసుకుపోతున్నట్టు విశ్వసనీయ సమాచారం. ధర్మగిరిలో 60 మంది అధ్యాపకులు పని చేస్తున్నారు. నిర్దేశిత డ్యూటీ ప్రకారం అధ్యాపకులు రాత్రిళ్లు పాఠశాలలోనే బస చేయాలి. కానీ చేయరు. ఇక సీనియర్ విద్యార్థులే సూపర్‌వైజర్లు. దీంతో జూనియర్లపై లైంగిక వేధింపులు యథేచ్ఛగా సాగుతున్నాయి. ఈ ఘోరాలను ప్రశ్నించడానికి ప్రయత్నించినా, ఫిర్యాదు చేయాలనే ఆలోచన వచ్చినా సీనియర్లు రెచ్చిపోతారు. వారి ట్రంకు పెట్టెల్ని కాళ్లతో తుక్కు చేసి, కాంపౌండ్ బయట పడేస్తారు. కొత్త విద్యార్థులపై వీరే తప్పుడు ఫిర్యాదులు చేయిస్తారు. ఈ దారుణాలు భరించలేక పది సంవత్సరాల్లో వందలాది మంది కోర్సును మధ్యలోనే వదిలి వెళ్లిపోయారని అంటున్నారు. అధ్యాపకులను పాఠశాల నిర్వాహకులు నిలదీస్తే సహాయ నిరాకరణకు దిగుతారని వార్తలు వచ్చాయి. తడాఖా చూపిస్తామంటూ సెలవు పెట్టి వెళ్లిపోతారు. ఎంతకూ సిలబస్ పూర్తిచేయరు. దీంతో నిర్వాహకులు కూడా వారితో సర్దుకుపోవటమో, వారికి భాగస్వాములు కావటమో జరుగుతోంది.

ధర్మగిరిలో చేరే విద్యార్థులకు ఇటీవల టీటీడీ భారీ ప్యాకేజీలు ప్రకటించింది. దీని ప్రకారం పిల్లలు చేరగానే మూడు లక్షల రూపాయలు వారి పేరిట డిపాజిట్ చేస్తారు. ఆగమాలు నేర్చుకునేవారికి లక్ష రూపాయలు డిపాజిట్ చేస్తారు. వారు 12, 8 సంవత్సరాల కోర్సు పూర్తి చేసుకుని తిరిగి వెళ్లేటప్పుడు ఆ మొత్తాన్ని వడ్డీతో కలిపి ఇస్తారు. ఈ సౌలభ్యాన్ని వదులుకోలేక పేద విద్యార్థులు ఇక్కడి దారుణాలపై నోరు మెదపలేక పోతున్నారు. ఇటీవల ఫిర్యాదులు వెల్లువెత్తడంతో టీటీడీ అధికారులు బుధవారం వేద పాఠశాలలో పరిస్థితి చక్కదిద్దేందుకు పరిపాలనాధికారిగా సుబ్రమణ్యాన్ని నియమించారు.

శ్రీవారి ఆలయానికి అవసరమైన వేద పండితులను తయారు చేసుకోవాలనే సంకల్పంతో 1884లో వేద పాఠశాలను ప్రారంభించారు. తొలుత తిరుపతి గోవిందరాజస్వామి ఉత్తర మాడవీధిలోని ప్రస్తుత మ్యూజియంలో ప్రారంభించారు. 1951లో శ్రీవారి ఆలయంలోని సంపంగి ప్రాకారానికి మార్చారు. క్రమేపీ విద్యార్థుల సంఖ్య పెరగడంతో తిరుమల శిఖరభాగాన ఉన్న నారాయణగిరి కొండల్లో ధర్మగిరి వేద పాఠశాలను ఏర్పాటు చేశారు. తిరుమల వేద పాఠశాలలో ఒక విద్యార్థిపై సహ విద్యార్థులు లైంగిక వేధింపులు జరిపిన మాట వాస్తవమే టిటిడి కార్యనిర్వాహణాధికారి కృష్ణారావు అంగీకరించారు.

వైయస్ జగన్‌ది చంద్రబాబు వైఖరే, తెలంగాణపై ఇద్దరూ ఏకం

తెలంగాణపై వైయస్సార్ కాంగ్రెసు పార్టీ అధ్యక్షుడు వైయస్ జగన్ స్పష్టమైన వైఖరి తీసుకునే అవకాశాలు లేవు. ఆయన స్పష్టంగా తెలంగాణకు అనుకూలంగా వైఖరి తీసుకుంటారని ఇటీవల వచ్చిన వార్తలు అబద్ధాలేనని తెలిసోతోంది. తెలుగుదేశం పార్టీ అధ్యక్షుడు నారా చంద్రబాబు నాయుడు తీసుకున్న వైఖరినే ఆయన అనుసరించే అవకాశాలున్నాయి. వైయస్సార్ కాంగ్రెసు పార్టీ నాయకుడు గోనె ప్రకాశ రావు గురువారం చేసిన ప్రకటన ఈ విషయాన్ని తెలియజేస్తోంది. తెలంగాణకు చంద్రబాబు, వైయస్ జగన్ అడ్డు కారని ఆయన చెప్పారు. తెలంగాణపై ఆయన కేంద్ర వైఖరిని తప్పు పట్టారు.గోనె ప్రకాశ రావు ప్రకటనను బట్టి వైయస్ జగన్ తెలంగాణపై రెండు కళ్ల సిద్ధాంతాన్నే ఆనుసరించే అవకాశాలున్నాయని తెలుస్తోంది. తనకు రెండు ప్రాంతాలు రెండు కళ్లు అంటూ చంద్రబాబు రెండు కళ్ల సిద్ధాంతాన్ని అనుసరిస్తున్నారు. తెలంగాణపై ఆయన కాంగ్రెసు వైఖరిని తప్పు పడుతున్నారు. తెలంగాణను ఇచ్చేది తెచ్చేది తాము కాదని వైయస్ జగన్ చెప్పే అవకాశాలున్నాయి. అసలు జగన్ తెలంగాణపై మాట్లాడుతారా అనేది కూడా అనుమానమే. వైయస్సార్ కాంగ్రెసు నాయకులు మాత్రమే జగన్ తెలంగాణకు వ్యతిరేకం కాదంటూ ఊదరగొడుతున్నారు. కట్టె విరగకుండా పాము చావకుండా జగన్ వైఖరి ఉంటుందని చెప్పవచ్చు. అన్ని విషయాల్లో చంద్రబాబుపై కత్తులు నూరుతున్న వైయస్సార్ కాంగ్రెసు నాయకులు తెలంగాణ విషయంలో మాత్రం ఆయనను సమర్థిస్తున్నారు.

టీఆర్‌ఎస్‌, జగన్‌ కలిస్తే మనం మటాష్‌

ప్రత్యేక తెలంగాణ రాష్ట్రం ఇవ్వకపోతే ఈ ప్రాంతంలో పార్టీ మనుగడ అసాధ్యమని కాంగ్రెస్‌ పార్టీ రాష్ట్ర వ్యవహారాల ఇన్‌ఛార్జ్‌ గులాం నబీ ఆజాద్‌కు ఆ పార్టీ సీనియర్‌ నేతలు స్పష్టంచేశారు. ప్రత్యేక రాష్ట్రం ఇవ్వకపోతే పార్టీ ఉనికి ప్రశ్నార్థకం అని ముగ్గురు మంత్రులు పేర్కొన్నారు. సమైక్యరాష్ట్రంలో తెలంగాణ అభివృద్ధికోసం చేసిన ఒప్పందాలన్ని ఉల్లంఘనకే గురయ్యాయని, ప్రత్యేక రాష్టమ్రే దానికి పరిష్కారం అని కాంగ్రెస్‌ ఎమ్మెల్యేలు, ఎమ్మెల్సీలు కొందరు ఆజాద్‌కు తెలియజేశారు. హైదరాబాద్‌ వచ్చిన గులాం నబీ ఆజాద్‌తో తెలంగాణ సీమాంధ్ర నేతలు భేటీ విడివిడిగా భేటీ అయ్యారు. ఈ సందర్భంగా పలువురు కాంగ్రెస్‌ తెలంగాణ సీనియర్‌ నేతలు భేటీ అయ్యారు.

పిసిసి మాజీ అధ్యక్షులు పి.నర్సారెడ్డి, సీనియర్‌ నేత పాల్వాయి గోవర్ధన్‌రెడ్డి భేటీ అయ్యారు. ప్రత్యేక రాష్ట్రం ఇవ్వకపోతే తెలంగాణాలో కాంగ్రెస్‌ పార్టీ నాశనం అవుతుందని ఆజాద్‌కు పి.నర్పారెడ్డి స్పష్టంచేశారు. వచ్చే ఎన్నికల్లో టిఆర్‌ఎస్‌తో జగన్‌ పొత్తు పెట్టుకొనే అవకాశముందని, ఇదే జరిగితే తెలంగాణాలో కాంగ్రెస్‌ వాష్‌ఆవుట్‌ అవుతుందని పేర్కొన్నారు. అలా కాకుండా ప్రత్యేక రాష్ట్రం ఇస్తే మాత్రం జగన్‌ను తెలంగాణాలో కాలుమోపనీయమని పేర్కొన్నారు. తెలంగాణ ఇచ్చింది తామే కాబట్టి ఈ ప్రాంతంలో అధికారంలోకి వచ్చేది కూడా కాంగ్రెస్‌ పార్టీయేనని పి.నరసారెడ్డి, పాల్వాయిగోవర్దన్‌రెడ్డి స్పష్టంచేశారు. ఈ ప్రాంతంలో టిడిపి ఇప్పటికే జీరోగా ఉందని, ప్రత్యేక రాష్ట్రంలో కాంగ్రెస్‌ బలపడే అవకాశముందని ఆజాద్‌కు వారు తెలియజేశారు.

పిసిసి అధ్యక్షుడిగా పనిచేసిన తనకు ఇప్పుడు ఏ పదవిపై ఆశలేదని, పార్టీ మనుగడ కోసమే తెలంగాణను కోరుతున్నానని ఆజాద్‌తో పి.నర్పారెడ్డి చెప్పినట్లు తెలిసింది. మరోవైపు తెలంగాణ ఇవ్వకపోతే మాత్రం ప్రజాప్రతినిధులు, మంత్రులు ఎవరూ తిరగలేని పరిస్థితి అని త్వరగా ప్రత్యేక రాష్ట్రంపై నిర్ణయం తీసుకోవాలని ఆజాద్‌కు మంత్రులు కె.జానారెడ్డి, బి.సారయ్య, డి.శ్రీధర్‌బాబులు కోరారు. సమైక్యరాష్ట్ర ఏర్పాటు సమయంలో చేసుకొన్న ఒప్పందాలు, హక్కుల తీర్మానాలు అని ఉల్లంఘనకు గురయ్యాయని కాంగ్రెస్‌ ఎమ్మెల్సీ యాదవ్‌రెడ్డి, ఇంద్రసేన్‌రెడ్డి, ఎమ్మెల్యేలు ఆరేపల్లి మోహన్‌, ప్రవీణ్‌రెడ్డి పార్టీ రాష్ట్ర వ్యవహారాల ఇన్‌ఛార్జ్‌కు తెలియజేశారు. మరోవైపు గ్రేటర్‌ హైదరాబాద్‌ మున్పిపల్‌ కార్పొరేషన్‌కు చెందిన కొందరు కార్పోరేటర్లు తెలంగాణ అంశాన్ని తొందరగా తేల్చాలని కోరారు.

ప్రజారాజ్యం విలీనాన్ని ప్రశ్నిస్తూ అధినేత చిరంజీవికి లీగల్ నోటీసులు

ప్రజారాజ్యం పార్టీ అధ్యక్షుడు చిరంజీవికి ఆ పార్టీకే చెందిన ఓ కార్యకర్త లీగల్ నోటీసులు పంపించారు. ప్రకాశం జిల్లాకు చెందిన లక్ష్మణ్ నాయుడు అనే ప్రజారాజ్యం పార్టీ కార్యకర్త పార్టీని కాంగ్రెసులో విలీనం చేయడాన్ని ప్రశ్నిస్తూ లీగల్ నోటీసులు పంపించారు. పార్టీని విలీనం చేయడం ద్వారా చిరంజీవి పార్టీకి ఓటు వేసిన లక్షలాది మంది ఓటర్లకు అన్యాయం చేశారని ఆరోపిస్తూ నోటీసులు ఇచ్చారు.

ప్రజారాజ్యం పార్టీని కాంగ్రెసులో విలీనం చేసిన కారణంగా తాను పార్టీ కోసం ఇప్పటి వరకు ఖర్చు చేసిన డబ్బును ఇప్పించాలని ఆయన డిమాండ్ చేశారు. కాగా ఇటీవల పార్టీ విలీనంపై ప్రజారాజ్యం పార్టీ నేతలు చిరంజీవిని ప్రశ్నిస్తున్న విషయం తెలిసిందే.

కాసేపు సరదా

పెట్టుబడికి, శ్రమ కి తేడా ఏంటి ?
టీచర్ : పెట్టుబడికి, శ్రమ కి తేడా ఏంటి ?
హరి : మీరు ఒక వ్యక్తి కి డబ్బు అప్పిచ్చారనుకోండి, మీరు అప్పు ఇచ్చిన డబ్బు పెట్టుబడి. దాన్ని మీరు అతని దగ్గర నుంచి వసూలు
చేయడానికి చేసే ప్రయత్నాలు శ్రమ.
---------------------------------------------------------------------
వారెవ్వా! ఏమి చెప్పేవు
చిన వెంగళప్ప : అన్నయ్య !' గో ' కి వెర్బ్ ఫామ్స్ చెప్పవా !
పెద వెంగళప్ప : వేరి సింపుల్ రా, GO , GOKED , GOKEN .

---------------------------------------------------------------------

నభూతో... నభవిష్యత్

మారిషస్
లెక్కలేనన్ని బీచ్ లతో, పచ్చని కొండలు, అడవులతో అందంగా ఉండే ద్వీపం మారిషెస్. ఈ సమయంలో అక్కడ కొద్దిగా ఎండతో, అప్పుడప్పుడు చిరుజల్లులతో, 24 డిగ్రీల మినిమం టెంపరేచర్ తో గమ్మతైన శీతాకాల వాతావరణం పర్యాటకులను ఆకట్టుకుంటుంది. ముఖ్యంగా హనీమూన్లకు ఈ సమయం అనువైనదిగా చెబుతారు. బీచ్ లకు పెట్టింది పేరు అయిన మారిషెస్ లో బ్లూబే బీచ్, పెరేయ్బెరే బీచ్, లా ప్రేనేఉసే బీచ్ వంటి తదితర బీచ్ లు కేవలం పర్యటకులనే కాకుండా షూటింగుల కోసం సినిమా వాళ్ళను కూడా అమితంగా ఆకర్షిస్తాయి.

కొన్ని ఆలోచనలు..

ఇష్టం

ఇష్టానికి మరణం ఉండదు
ఇష్టం ఉన్నపుడు కష్టానికి జననం ఉండదు!
-----------------------------------------------------
అతను - ఆమె

అతను - చందమామ
ఆమె - వెన్నెలమ్మ
చందమామ, వెన్నెలమ్మ రెండు కాదు ఒకటే.
---------------------------------------------------------
ప్రేమంటే...

ఒక్కోసారి అనిపిస్తుంది ప్రేమంటే -

"రెండు బలహీన హృదయాలు చాలా బలంగా ఇష్టపడడం" అని.
----------------------------------------------------------------
మన ప్రాణాలన్నీ...

నీ ఒంట్లో నలతగా ఉందంటేనే
నా మనసు ఎంతో కలత చెందుతుంది!
నా పంచ ప్రాణాలూ నీ ఒక్క ప్రాణమే అంటే
నా ఒక్క ప్రాణం కోసం నీ పంచ ప్రాణాలు పనంగా పెట్టవా?
మన ప్రేమలో ఒక్కోసారి నాకు బలంగా అనిపిస్తుంది-
కష్టం నీది అనుభవించాలని.. సంతోషం నీతో అనుభవించాలని...
---------------------------------------------------------------------

పాత మిత్రులు ఒక్కటవుతారా

పాత మిత్రులు ఒక్కటవుతారా అనేది ఆసక్తికరంగా మారింది. కలెక్షన్ కింగ్ మోహన్ బాబును తెలుగుదేశం పార్టీ అధ్యక్షుడు నారా చంద్రబాబు నాయుడు దువ్వుతున్నట్లు ప్రచారం సాగుతోంది. స్టార్ అట్రాక్షన్ కోసమే కాకుండా సామాజిక వర్గంలో సమతౌల్యం కోసం చంద్రబాబును దగ్గరకు తీసుకోవాలని ప్రయత్నిస్తున్నట్లు చెబుతున్నారు. తన బావమరిది హరికృష్ణ, మేనల్లుడు జూనియర్ ఎన్టీఆర్ తనపై కత్తి కట్టిన నేపథ్యంలో మోహన్ బాబును చేరదీయాలని చంద్రబాబు భావిస్తున్నట్లు చెబుతున్నారు.



జూనియర్ ఎన్టీఆర్ పెళ్లిలో చంద్రబాబు మోహన్ బాబుతో మాట్లాడుతూ చంద్రబాబు ఎక్కువ సమయం గడిపారు. బావ మరిది, రాజ్యసభ సభ్యుడు నందమూరి హరికృష్ణతో ఆయన ఎడమొహం పెడమొహంగానే ఉన్నారు. తాను కుదిర్చిన పెళ్లి కాబట్టి చంద్రాబాబు కాస్తా హడావిడి చేసినట్లు భావిస్తున్నారు. చంద్రబాబు కుమారుడు నారా లోకేష్ కూడా ఏ విధమైన విభేదాలు లేనట్లే పెళ్లిలో జూనియర్ ఎన్టీఆర్‌తో వ్యవహరించారు.

సూర్యనమస్కారం.. సమస్యలు దూరం

వేకువనే నిద్ర లేచి దినచర్య మొదలుపెడితే.. మానసికంగా, శారీరకంగా బోలెడు ప్రయోజనాలు. అలా లేచిన వెంటనే పనిలో పనిగా లేలేత భానుడికి నమస్కారాలు చేయాలని కొన్ని అధ్యయనాలు చెబుతున్నాయి. దానివల్ల కలిగే ప్రయోజనాలు అన్నీ ఇన్నీ కావంటున్నాయి.

సూర్యనమస్కారాలు చేయడం వల్ల గుండెకు చాలా మేలు జరుగుతుంది. కవాటాలకు రక్త సరఫరా చురుగ్గా ఉంటుంది. అలాగే రక్తంలో ప్రాణవాయువు శాతమూ సజావుగా సాగుతుందని చెబుతున్నాయి అధ్యయనాలు.

అజీర్తి సమస్యలు ఉన్నవారు.. నిపుణుల సూచనలతో సూర్యనమస్కారాలు చేయాలి. దీనివల్ల ఎంతో మార్పు ఉంటుంది. అలాగే నాడీవ్యవస్థా చురుగ్గా పనిచేస్తుంది. శ్యాసకోస సమస్యలుంటే దూరమవుతాయి. ఒత్తిడి, మానసిక కుంగుబాటు వంటివి దూరమై తనువు, మనసు ఉత్తేజితమవుతాయి.


నిద్రలేమి సమస్యలతో బాధపడేవారికీ ఇది చక్కని పరిష్కారం. ఇలాంటి వారు నిశబ్ద వాతావరణంలో సూర్యనమస్కారాలు చేయాలి. చాలా మార్పు కనిపిస్తుంది. బద్ధకం వదిలి రోజంతా చురుగ్గా ఉల్లాసంగా ఉండాలన్నా సరే.. దీనిని మించిన ప్రత్యామ్నాయం లేదు. చేస్తున్న పనిపట్ల శ్రద్ధ, ఏకాగ్రత అలవడుతుంది.

వూబకాయం ఉన్నవారికి ఇది ఎంతగానో మేలు చేస్తుంది. క్రమం తప్పకుండా చేయడం వల్ల ఉదర కండరాలు దృఢమవుతాయి. పొట్ట చుట్టూ పేరుకొన్న కొవ్వు ఇట్టే కరిగిపోతుంది. సూర్య కిరణాల ప్రభావంతో శరీరంలోని అధిక కెలొరీలు ఖర్చవుతాయి. కొవ్వు నిల్వలు కరిగిపోతాయి. వెన్నెముక దృఢమవుతుంది. జ్ఞాపకశక్తి మెరుగవుతుంది. శరీరం తాజాదనాన్ని సంతరించుకున్న మార్పు ఇట్టే కనిపిస్తుంది.

నెలసరి సంబంధ సమస్యలతో బాధపడేవారు తరచూ వీటిని చేయడం మంచిది. అధ్యయనాల ప్రకారం.. యుక్తవయసు నుంచి సూర్యనమస్కారం చేయడం వల్ల భవిష్యత్‌లో ప్రసవ సమయంలో ఎదురయ్యే ఇబ్బందులను చాలామటుకు నివారించవచ్చు.

లేలేత, నులివెచ్చని సూర్యకిరణాలు ముఖాన్ని తాకితే చర్మానికి మేలు జరుగుతుంది. ముడతలు తొలగిపోతాయి.. వృద్ధాప్య చాయలు కనిపించవు. జుట్టు కూడా ఆరోగ్యంగా ఉంటుంది. చుండ్రు సమస్యను సైతం నివారించవచ్చు.

అయితే... వీటిని చేసేముందు.. వైద్యుల సలహా తప్పనిసరిగా తీసుకోవాలి.