అందరితో చర్చించి నిర్ణయాలు తీసుకోవడం జగన్ విధానం కాదు.

వైయస్సార్ కాంగ్రెసు పార్టీ అధ్యక్షుడు వైయస్ జగన్‌తో కలిసి పనిచేయడాన్ని రాజకీయ నాయకులు ఇబ్బందిగానే భావిస్తున్నారనే ప్రచారం ప్రారంభమైంది. జగన్ తమను పట్టించుకోవడం లేదనే అసంతృప్తి కూడా వైయస్సార్ కాంగ్రెసులో మొదలైనట్లు అర్థమవుతోంది. తమను పట్టించుకోకుండా, తాను చెప్పినట్లు నడవాలనే వైఖరి వల్ల వైయస్ జగన్ నష్టపోయే ప్రమాదం ఉందని అంటున్నారు. పైగా, అందరితో చర్చించి నిర్ణయాలు తీసుకోవడం జగన్ విధానం కాదు. తాను తీసుకున్న నిర్ణయాలను తన వెంట నడుస్తున్న నాయకులు పాటించాల్సి ఉంటుంది. వాటి మంచిచెడుల గురించి చర్చించే వాతావరణం ఉండదు, ఆ సందర్భం కూడా రాదు. వైయస్ జగన్ వాణిజ్యవేత్త అని, వాణిజ్యవేత్తలు గుట్టుగా వ్యవహరిస్తారని, తాము నిర్ణయాలు తీసుకుని తన అనుచరులకు చెబుతారని వైయస్ రాజశేఖర రెడ్డికి అత్యంత సన్నిహితుడైన కాంగ్రెసు పార్లమెంటు సభ్యుడు ఉండవల్లి అరుణ్ కుమార్ ఒకానొక సందర్భంలో అన్నారు.

వాణిజ్యవేత్తల పనితీరు రాజకీయాల్లో పనికి రాదని ఆయన చెప్పకుండానే చెప్పారు. వైయస్ రాజశేఖర రెడ్డి తాను చేయదలుచుకున్న పని గురించి చాలా మందితో మాట్లాడేవారని, దానివల్ల తాను చేయబోయే పనిలోని మంచీచెడులు తెలిసి వచ్చేవని ఆయన అన్నారు. గుట్టుగా వ్యవహరించే జగన్ వ్యవహార శైలి వల్ల నాయకులు ఇబ్బంది పడుతున్నారని చెబుతున్నారు. ఇప్పటికే బద్వేలు కాంగ్రెసు శాసనసభ్యురాలు కమలమ్మ వైయస్సార్ పార్టీకి దూరమయ్యారు. తాజాగా, ప్రజారాజ్యం పార్టీ శాసనసభ్యుడు కాటసాని రాంరెడ్డి కూడా ఆయనకు దూరం జరిగారు. జగన్ వెంట నడుస్తున్న శోభా నాగిరెడ్డి, భూమా నాగిరెడ్డి దంపతులు ఏం చెప్తే అది చేసే వ్యక్తి కాటసాని రాంరెడ్డి. అటువంటి కాటసాని రాంరెడ్డే జగన్‌కు దూరమయ్యారంటే మరింత మంది కూడా వెనక్కి తిరిగి వచ్చే అవకాశాలున్నాయని అంటున్నారు.

జగన్ వెంట నడుస్తున్న చాలా మంది శాసనసభ్యులు, నాయకులు తిరిగి రావడానికి సిద్ధంగా ఉన్నారని ముఖ్యమంత్రి కిరణ్ కుమార్ రెడ్డి కాంగ్రెసు పార్టీ అధిష్టానానికి చెప్పారు. ఆయన ప్రస్తుతం ఢిల్లీలో ఉన్నారు. పరిణామాలను పసిగట్టే ఆయన ఆ విధంగా చెప్పి ఉంటారనేది స్పష్టమవుతోంది. నిజానికి, ఒక వ్యక్తి ఇష్టానిష్టాలకు, నిర్ణయాలకు అనుగుణంగా ఓ కార్పొరేట్ కంపెనీలాగా నడిచే పార్టీలో కొనసాగడం అంత సులభం కాదు. తెలుగుదేశం పార్టీ అధ్యక్షుడు నారా చంద్రబాబు నాయుడు పార్టీ కూడా సంకటస్థితిని ఎదుర్కోవడానికి ఓ కారణం ఇదే. పార్టీలో ప్రజాస్వామ్యం ఉంటుందా, ఉండదా అనే విషయాన్ని పక్కన పెడితే, పార్టీ అందరి అభిప్రాయాలను పరిగణనలోకి తీసుకుంటుందని, అధినేత తమ మాటలు వింటారని అనిపించడం పార్టీ మనుగడకు అత్యంత ప్రధానమైన విషయం.

తన తండ్రి వైయస్సార్ సంక్షేమ పథకాలు, ఆయన వారసత్వం, తనపై ఉన్న ప్రజాదరణ తన పార్టీని అగ్రస్థానంలో నిలబెడుతుందని బహుశా వైయస్ జగన్ భావిస్తూ ఉండవచ్చు. కానీ, అది ఎల్లకాలం ఫలితాలు సాధించి పెట్టదు. నాయకులను తగిన విధంగా గుర్తించినప్పుడే పార్టీకి మనుగడ ఉంటుంది. వైయస్ రాజశేఖర రెడ్డి ప్రతి ఒక్కరినీ గుర్తించినట్లు కనిపించేవారు. తన వద్దకు వచ్చిన ప్రతి ఒక్కరికీ ప్రాధాన్యం ఉంటుందని ఆయన చేతల్లో చూపించేవారు. అందుకే, హీరో రాజశేఖర్ దంపతులు కాంగ్రెసు పార్టీలోకి వచ్చారు. ఇప్పుడు జగన్ వ్యవహార శైలి నచ్చక వెనక్కి వచ్చారు. వారంతట వారు తనను బలపరచాల్సిందే తప్ప బలపరిచిన వారికి గుర్తింపు ఇవ్వాల్సిన అవసరం లేదని తలిస్తే జగన్ రాజకీయాల్లో దెబ్బ తినడం ఖాయం.

వైయస్ రాజశేఖర రెడ్డి అభిమానులు ఎటు వైపు ఉంటారనేది ఇప్పుడు ప్రశ్నార్థకంగా మారింది.

కడప లోకసభ స్థానానికి, పులివెందుల శాసనసభా స్థానానికి జరుగుతున్న ఉప ఎన్నికల్లో దివంగత నేత వైయస్ రాజశేఖర రెడ్డి అభిమానులు ఎటు వైపు ఉంటారనేది ఇప్పుడు ప్రశ్నార్థకంగా మారింది. వైయస్సార్ రాజకీయ వారసత్వాన్ని సొంతం చేసుకోవడమే ప్రధాన లక్ష్యంగా వైయస్సార్ కాంగ్రెసు పార్టీ నాయకుడు వైయస్ జగన్ ముందుకు సాగుతుంటే, వైయస్ తమ వాడేనని కాంగ్రెసు నాయకులు చెబుకుంటున్నారు. వైయస్సార్ చరిష్మాను, అభిమానాన్ని సొంతం చేసుకోవడానికి రెండు పార్టీలు ఉప ఎన్నికల్లో పోటీ పడ్డాయి.

వైయస్ రాజశేఖర రెడ్డికి సొంత అభిమానులున్నారు. ఆయనకు సొంత ప్రజాదరణ ఉంది. ఆ ప్రజాదరణను తమ వైపు తిప్పుకోవడానికి కాంగ్రెసు పార్టీ నాయకులు తీవ్రంగానే ప్రయత్నించారు. ముఖ్యమంత్రి కిరణ్ కుమార్ రెడ్డితో పాటు ప్రజారాజ్యం పార్టీ అధినేత చిరంజీవి కూడా తమ ఎన్నికల ప్రచారంలో ఇదే ప్రయత్నం చేశారు. వైయస్ పథకాలన్నీ కాంగ్రెసు పార్టీవేనని, వైయస్సార్ కాంగ్రెసు పార్టీ నేతగానే కొనసాగారని, అలా కొనసాగడానికి మాత్రమే ఇష్టపడ్డారని వారు ప్రజలకు నచ్చజెప్పి వారిని తమ వైపు తిప్పుకోవడానికి ప్రయత్నించారు. అయితే, వైయస్సార్ రాజశేఖర రెడ్డి పథకాలకు కాంగ్రెసు ప్రభుత్వం తూట్లు పొడుస్తోందని వైయస్ జగన్ ఎప్పటికప్పుడు సూటిగా ప్రజల్లోకి తీసుకుని వెళ్లడానికి ప్రయత్నించారు.

వైయస్సార్ అభిమానులు వైయస్సార్ కాంగ్రెసు పార్టీకి, కాంగ్రెసు పార్టీకి మధ్య చీలుతాయా అనేది ఆసక్తికరమైన విషయంగా మారింది. వైయస్ జగన్ చీలిక వర్గం కాంగ్రెసుకు అనుకూలంగా మారే అవకాశాలున్నాయి. పులివెందుల ఓటర్లు మాత్రం వైయస్ విజయమ్మ, వైయస్ వివేకానంద రెడ్డిలో ఎవరిని ఎంపిక చేసుకోవాలనే డైలమాలో పడ్డారు. వీరిద్దరి మధ్యనే పులివెందులలో ప్రధానమైన పోటీ ఉండే అవకాశాలున్నాయి. పులివెందులలో తెలుగుదేశం పార్టీ అభ్యర్థి బిటెక్ రవిని స్థానికంగా కొంత మంది పార్టీ నాయకులు వ్యతిరేకిస్తున్నారు. దీంతో బిటెక్ రవి పోటీలో ఉంటారా, లేదా అనేది కూడా అనుమానంగానే ఉంది. కడప లోకసభ స్థానంలో మాత్రం వైయస్సార్ అభిమానులు జగన్ వైపు ఉండే అవకాశాలున్నాయి

కొంతమంది వ్యక్తుల విశిష్టత వలనే వాళ్లు పుట్టిన గ్రామానికి ఎంతో పేరు వస్తుంది.

కొంతమంది వ్యక్తుల విశిష్టత వలనే వాళ్లు పుట్టిన గ్రామానికి ఎంతో పేరు వస్తుంది. ఉదా:3,500సంవత్సరాల క్రితం బుద్దుడు ‘లుంబిని’ అనే గ్రామంలోనే జన్మించారు. అందుకే ‘లుంబిని’అనే పేరు ప్రపంచవ్యాప్తంగా ప్రసిద్దిగాంచింది. ‘లుంబిని’ అనే గ్రామంలో జన్మించాడు కాబట్టే హైదరాబాద్ లో లుంబినీ పార్క్ అని పేరు పెట్టారు. సుభాష్ చంద్రబోస్, అల్లూరి శీతారామరాజు, ప్రకాశం పంతులు, భగత్ సింగ్ ఇలా ఎంతో మంది వ్యక్తుల ప్రాబల్యం వలన వాళ్లు పుట్టిన ప్రదేశాలకి వెలుగులోకి వచ్చాయి.

అలాగే మహానటుడు టిడిపి రూపకర్త, 9నెలల కాలంలోనే పార్టీ పెట్టి ముఖ్యమంత్రి అయిన నందమూరి తారకరామారావు నిమ్మకూరు అనే గ్రామంలో పుట్టి, ఆగ్రామానికే ఒక ప్రాముఖ్యతను, విశిష్టతను కల్పించారు. అటువంటి, నిమ్మకూరులో ఎన్టీఆర్ వారసుడైన జూ ఎన్టీఆర్ తన శోభనాన్ని చేసుకోవాలని ఉవిళ్లూరుతున్నారని తెలుస్తోంది. నిమ్మకూరులో ఎన్టీఆర్ కుటుంబానికి అచ్చొచ్చిన పందిరి మంచాన్నే, జూ ఎన్టీఆర్ తన శోభనానికి ఉపయోగించుకోనున్నారిని సమాచారం. నందమూరి వంశ వృక్షానికి నిలువెత్తు సాక్షిగా ఉన్న ఆ మంచాన్ని, అతి జాగ్రత్తగా నందమూరి వారు కాపాడుకుంటున్నారు. ముత్తాతల నుండి వస్తున్న ఈ సాంప్రదాయాన్ని, జూ ఎన్టీఆర్ కూడా పాటించాలనీ పట్టుదలతో తన శోభనాన్ని నిమ్మకూరు గ్రామంలోనే జరగాలని ఆకాంక్షిస్తున్నట్టు తెలుస్తోంది.

ఢీకొట్టడానికే సిద్ధపడ్డారు

తెలంగాణ అంశంపై తెలుగుదేశం పార్టీ తెలంగాణ ఫోరం కన్వీనర్ నాగం జనార్దన్ రెడ్డి తమ పార్టీ అధ్యక్షుడు నారా చంద్రబాబునాయుడిని ఢీకొట్టడానికే సిద్ధపడ్డారు. ఈ నెల 9వ తేదీన మహబూబ్ నగర్ జిల్లా నాగర్ కర్నూలులో జరిగే తెలంగాణ బహిరంగ సభ దానికి నాంది పలుకుతుందని భావిస్తున్నారు. పార్టీ జెండా లేకుండా నడిచే ఈ బహిరంగ సభకు లభించే ప్రతిస్పందనను చూసి నాగం జనార్దన్ రెడ్డి చంద్రబాబుకు వ్యతిరేకంగా తన గొంతును మరింత పెంచే అవకాశాలున్నట్లు చెబుతున్నారు. ఇప్పటికే, నాగం జనార్దన్ రెడ్డి చంద్రబాబును లెక్క చేయకుండా ప్రకటనలు చేస్తున్నారు.

నాగం జనార్దన్ రెడ్డి పార్టీలోని తెలంగాణ నాయకులు కొంత మంది తీవ్రంగా వ్యతిరేకిస్తున్నారు. మోత్కుపల్లి నర్సింహులు, రేవంత్ రెడ్డి, దయాకర్ రెడ్డి వంటి నాయకులు నాగం తీరును తప్పు పడుతున్నారు. అయినా, నాగం జనార్దన్ రెడ్డి లెక్క చేయడం లేదు. అయితే, నాగం జనార్దన్ రెడ్డికి పార్టీలోని ఓ వర్గం మద్దతు బలంగా ఉన్నట్లు చెబుతున్నారు. నాగర్ కర్నూలు బహిరంగ సభకు తెలంగాణ పార్టీ నాయకులంతా వస్తారని ఆశిస్తున్నట్లు నాగం జనార్దన్ రెడ్డి చెప్పారు. కానీ అ పరిస్థితి కనిపించడం లేదు.

నాగం జనార్దన్ రెడ్డి వెంట హరీశ్వర్ రెడ్డి (రంగా రెడ్డి జిల్లా), వేణుగోపాలాచారి (ఆదిలాబాద్), విజయ రామారావు (హైదరాబాద్), ఉమా మాధవ రెడ్డి ( నల్లగొండ) వంటి నాయకులు నడిచే అవకాశాలున్నట్లు చెబుతున్నారు. వీరు నాగర్ కర్నూలు బహిరంగ సభకు హాజరయ్యే అవకాశాలున్నట్లు కూడా ప్రచారం జరుగుతోంది. 9వ తేదీ బహిరంగ సభనే పార్టీలో నాగం జనార్దన్ రెడ్డి భవిష్యత్తును నిర్ణయిస్తుందని అంటున్నారు.

ఎవరికి ఓట్లు వేస్తారో

కడప, పులివెందుల ఉప ఎన్నికల బరిలో నిలిచిన మాజీ పార్లమెంటు సభ్యుడు వైయస్ జగన్మోహన్ రెడ్డి, ఆయన తల్లి విజయమ్మ గెలుపు ఖాయమని ఐబి(ఇన్వెస్టిగేషన్ బ్యూరో) నిర్వహించిన సర్వేలో తేలినట్టు తెలుస్తోంది. కడప, పులివెందుల నియోజకవర్గంలోని పలువురు వ్యక్తులను ఐబి కలిసి వారు ఎవరికి ఓట్లు వేస్తారో కనుగొంది. అయితే సర్వేలో పాల్గొన్న వారిలో ఎక్కువ మంది జగన్‌కే, విజయమ్మకే ఓటు వేస్తామని చెప్పారంట. అయితే జగన్ గెలుస్తాడని ఐబి నిర్వహించిన సర్వేకు సంబంధించిన సంక్షిప్త సందేశాలు(మెసేజ్‌) అలా అలా సెల్ ఫోన్‌లలో తిరగాడుతున్నాయంట.

కడప పార్లమెంటు పరిధిలో జగన్‌కు ఓటు వేస్తామని 54.45 శాతం మంది చెబితే, టిడిపికి ఓటు వేస్తామని 25 శాతం, కాంగ్రెసుకు ఓటు వేస్తామని 19.4 శాతం మంది చెప్పారంట. ఇక కడప పరిధిలోని ఏడు నియోజకవర్గాల్లో అన్ని నియోజకవర్గాల్లోనూ జగన్‌కే మెజార్టీ వస్తుందంట. ఏ నియోజవర్గంలోనూ కాంగ్రెసుగానీ, టిడిపిగానీ మెజార్టీ సాధించే పరిస్థితి లేదంట. ఇక పులివెందుల విషయానికి వస్తే విజయమ్మకు 56 శాతం, వైయస్ వివేకానందరెడ్డికి 25 శాతం, టిడిపికి 18 శాతం మంది ఓట్లు వేస్తారంట. జగన్ గెలుచినప్పటికీ విజయమ్మ ఓడిపోతుందనే వాదనలు వినిపించాయి. అయితే జగన్ కంటే విజయమ్మ 1.5 పర్సెంట్‌తో ముందుండటం విశేషం.

ఇక ప్రజారాజ్యం పార్టీని చిరంజీవి కాంగ్రెసులో విలీనం చేయడంపై ఎక్కువ మంది అసంతృప్తి వ్యక్తం చేశారంట. అయితే ఐబి సర్వే చేసిన ప్రకారం ఫలితం ఉండదని కాంగ్రెసు, టిడిపి చెబుతోంది. ఆ సర్వే జగన్ రాజీనామా చేసిన ప్రత్యేక పరిస్థితిలో చేసిందని, అలాంటి సమయంలో సర్వే చేస్తే అలాగే ఉంటుందని కానీ ప్రస్తుత పరిస్థితులు జగన్‌కు వ్యతిరేకంగా ఉన్నాయని వారు చెబుతున్నారు. ఈ మధ్యనే అవినీతికి వ్యతిరేకంగా అన్నాహజారే చేసిన నిరాహార దీక్ష ప్రభావం కూడా పడుతుందని ఆ రెండు పార్టీలు భావిస్తున్నాయంట. అయితే రాయలసీమ ప్రాంతంలో మిగతా ప్రాంతాల్లా కాకుండా అక్కడ పార్టీల కంటే వ్యక్తుల ప్రభావం ఎక్కువగా ఉండటం విశేషం. ఏదైమైనా ఐబి సర్వే జగన్ పార్టీలో ఉత్సాహాన్ని తీసుకు వచ్చింది.

యువనేత ఓటుకు వెయ్యి రూపాయల నుంచి ఐదు వేల రూపాయల వరకూ పంపిణీ చేస్తారన్న???

ఎన్నికలకు రెండు రోజుల ముందు కడప జిల్లాలో యువనేతకు ఆయన వర్గంలోని ముఖ్యమైన ఎమ్మెల్యే షాక్ ఇచ్చినట్లుగా తెలుస్తోంది. దీంతో తన గెలుపు నల్లేరు మీద బండి నడకని భావిస్తున్న యువనేతకు గట్టి షాక్ తగిలినట్లయింది. సొంత పార్టీ తరఫున ఎన్నికల బరిలోకి దిగిన ఆయన వైఖరే ఆయనకు ఇబ్బందులు తెస్తోంది. తన మాటే చెల్లాలన్న యువనేత వైఖరి పట్ల ఆ పార్టీ నేతల నుంచి తీవ్ర వ్యతిరేకత వ్యక్తమవుతోంది. ప్రధానంగా లెక్క విషయంలో అసంతృప్తితో ఉన్న ఒక కీలక ఎమ్మెల్యే మరీ ఇంత తక్కువైతే ఎలాగంటూ యువనేతపై ఫైర్ అయ్యారని సమాచారం. తాను ఎమ్మెల్యే ఎన్నికల్లోనూ, ఇటీవల జరిగిన ఎమ్మెల్సీ ఎన్నిల్లోనూ ఇంత కంటే ఎక్కువ ఖర్చు పెట్టానంటూ నిలదీసినట్లు ఆ పార్టీలో ప్రచారం జరుగుతోంది.

ఇలాగైతే తన దారి తాను చూసుకుంటానని యువనేతను కూడా హెచ్చరించాడంట. నియోజకవర్గంలో తన మాటే చెల్లుబాటు చేసుకునే సామర్థ్యం కలిగిన ఆ నేత ఆగ్రహం వ్యక్తం చేయడంతో యువనేత కంగు తిన్నారని సమాచారం. అయితే తన మాట తప్ప వేరెవరి మాటనూ లక్ష్య పెట్టని యువనేత ఏ మాత్రం వెనక్కు తగ్గక పోవడంతో.. ఆ ఎమ్మెల్యే కినుక వహించినట్లు తెలుస్తోంది. రూ. లక్ష కోట్లకు అధిపతిగా బహుళ ప్రాచుర్యం పొందిన ఆ యువనేతకు ఇప్పుడు ఆ డబ్బే కట్లపామై కరిచేందుకు సన్నద్ధమైందని పలువురు భావిస్తున్నారు. ఉప ఎన్నికల బరిలో ఉన్న ఇతర రాజకీయ పార్టీలు ఓటుకు 200 నుంచి 500 వరకూ పంపిణీ చేస్తే యువనేత పార్టీ మాత్రం కేవలం 200 రూపాయలు మాత్రమే పంపిణీ చేయాలని నిర్ణయించారని సమాచారం. ఈ నిర్ణయం పట్ల నేతల్లో తీవ్ర వ్యతిరేకత వ్యక్తమవుతోందని తెలుస్తోంది.

ఇప్పటివరకూ యువనేత ఓటుకు వెయ్యి రూపాయల నుంచి ఐదు వేల రూపాయల వరకూ పంపిణీ చేస్తారన్న ప్రచారం జోరుగా సాగింది. అయితే అందుకు విరుద్ధంగా యువనేత మాత్రం సెంటిమెంట్ అస్త్రంతో తాను గెలవడం ఖాయమని ఓటుకు నోటు ఇవ్వాల్సిన అవసరమే లేదని వాదిస్తున్నారట. అందరూ కోరుతున్నందున ఆ మాత్రం లెక్కయినా ఇచ్చానని ఇక ఏమాత్రం ఇచ్చేది లేదని ఖరాఖండీగా చెప్పినట్లు ఆ పార్టీ నేతలు పేర్కొంటున్నారు. దీంతో ఆ ఎమ్మెల్యే ప్రాతినిథ్యం వహిస్తున్న అసెంబ్లీ నియోజకవర్గం నుంచే అత్యధిక మెజారిటీ వస్తుందని ఆశించిన యువనేత షాక్ తిన్నారంటున్నారు. ఈ వ్యవహారాలను నిశితంగా పరిశీలిస్తున్న కాంగ్రెస్ నేతలు దీనిని తమకు అనుకూలంగా మార్చుకునే యత్నాలు చేస్తున్నారని సమాచారం. ఇప్పటికిప్పుడు తమ వైపునకు రాకున్నా రెండు రోజుల పాటు మౌనంగా ఉండాలని కాంగ్రెస్ నేతలు కోరుతున్నారని ప్రచారం జరుగుతోంది.

కడప మహిళా నేతలు ప్రచారం

పులివెందుల, కడప ఉప ఎన్నికల బరిలో అధినేతలకు ధీటుగా ఆయా పార్టీల మహిళా నేతలు ప్రచారాన్ని నిర్వహిస్తూ ఓటర్లను ఆకర్షిస్తున్నారు. కాంగ్రెసు, తెలుగుదేశం, వైయస్ఆర్ కాంగ్రెసు పార్టీ నుండి మహిళా నేతలు జిల్లాలోనే తిష్ట వేసి తమ తమ పార్టీ అభ్యర్థుల గెలుపు కోసం తీవ్రంగా శ్రమిస్తున్నారు. రాప్తాడా శాసనసభ్యురాలు పరిటాల సునీత, తెలుగు మహిలా అధ్యక్షురాలు శోభా హైమావతి, కేంద్రమంత్రి పురందేశ్వరి, రోజా, షర్మిళ, లక్ష్మీపార్వతి తదితరులు ధాటిగా ప్రచారాన్ని నిర్వహిస్తున్నారు. వైయస్ వివేకానందరెడ్డి గెలుపు కోసం ఆయన కూతురు, మరికొంతమంది కాంగ్రెసు మహిళా నేతలు పులివెందుల ప్రచారానికి పరిమితం అయ్యారు.

దివంగత పరిటాల రవీంద్ర సతీమణి, రాప్తాడు శాసనసభ్యురాలు పరిటాల సునీతది అనంతపురం జిల్లా సరిహద్దు ప్రాంతాలతో పాటు, పరిటాల అభిమానులు భారీగా ఉన్న గ్రామాలలో ప్రచారం నిర్వహిస్తుంది. అభిమానాన్ని ఓటుగా మలుచుకోగలుగుతారా లేదా అనే విషయాన్ని పక్కన పెడితే పరిటాల సునీత ప్రచారానికి మిగతా వారి కంటే అనూహ్య స్పందన వస్తుంది. కడప ఎంపీ అభ్యర్థిగా పోటీ చేస్తున్న మైసూరారెడ్డికి ఓటు వేయాల్సిందిగా ఆమె పరిటాల అభిమానులను, ప్రచారాన్ని వీక్షించడానికి వచ్చిన ప్రజలను కోరుతోంది. సునీత ప్రచారం చేస్తున్న గ్రామాలలో ప్రజా స్పందన చూసిన టిడిపి కార్యకర్తలు మంచి ఉత్సాహంతో కనిపిస్తున్నారంట. ఇక తెలుగుదేశం పార్టీ రాష్ట్ర మహిళా అధ్యక్షురాలు, కడప జిల్లా పార్టీ అధ్యక్షురాలు కుసుమకుమారితో పాటు పలువురు మహిళా నేతలు ప్రచారంలో దూసుకు వెళుతున్నారు. వీరు జగన్ అవినీతిపై, కాంగ్రెసు అభ్యర్థులపైన కాకుండా టిడిపి గెలిస్తే ఏం చేస్తుంది, ఎందుకు ఓటెయ్యాలో చెప్పడంపైనే ఎక్కువగా దృష్టి కేంద్రీకరిస్తున్నారు. వ్యక్తిగత విమర్శలకు సాధ్యమైనంతగా దూరంగా ఉంటున్నారు.

ఇక వైయస్ఆర్ కాంగ్రెసు పార్టీ తరఫున రోజా, ఎన్టీఆర్ టిడిపి అధ్యక్షురాలు లక్ష్మీపార్వతీ ప్రచారాన్ని ముమ్మరంగా నిర్వహిస్తున్నారు. అయితే వీరు వ్యక్తిగత విమర్శలకే ప్రాధాన్యత ఇస్తున్నారు. ప్రజారాజ్యం పార్టీ అధ్యక్షుడు చిరంజీవి, తెలుగుదేశం పార్టీ అధ్యక్షుడు చంద్రబాబునాయుడు పై తీవ్రంగా వ్యక్తిగత విమర్శలకు దిగడం విశేషం. అయితే రోజా ప్రచారానికి ప్రజలు భారీగా వస్తున్నప్పటికీ లక్ష్మీపార్వతి ప్రచారానికి మాత్రం అంతగా ఆధరణ కనిపించడం లేదని తెలుస్తోంది. ఇక జగన్ చెల్లెలు షర్మిళ కూడా తల్లి, అన్నయ్య విజయానికి శాయశక్తులా ప్రయత్నాలు చేస్తోంది. తన అన్నయ్యను కుట్రతో కాంగ్రెసు నుండి బయటకు పంపించారని వోటర్లను నమ్మించడానికి ఆమె తీవ్రంగా ప్రయత్నాలు చేస్తోంది. ఆమె ప్రచార తీరు పూర్తిగా సానుభూతి కలిగించేలా ఉంటోంది. ఇక దివంగత ముఖ్యమంత్రి వైయస్ సతీమణి ఎలాగూ అభ్యర్థి కాబట్టి ఆమె పులివెందులలో గెలుపు కోసం శాయశక్తులా కృషి చేస్తోంది. అయితే వైయస్ ఉన్నప్పుడు ఇంటిని విడిచి బయటకు రాని విజయమ్మ, షర్మిళాలను మాత్రం జగన్‌ తన స్వార్థం కోసం మండుటెండలో వారిని కష్ట పెడుతున్నారనే వాదనలు వినిపిస్తున్నాయి.

ఇక కాంగ్రెసు తరఫున ప్రముఖంగా ఎవరూ లేక పోయినప్పటికీ కేంద్ర మంత్రి పురందేశ్వరి బుధవారం పులివెందులలో వైయస్ వివేకా అభ్యర్థన మేరకు ప్రచారాన్ని నిర్వహించారు. ఆమె కూడా జగన్‌పై విమర్శలకు ప్రాధాన్యత ఇచ్చారు. మరో వైపు వివేకానంద భార్య, కూతురు కూడా పులివెందుల నియోజకవర్గంలో గడప గడపకు తిరుగుతూ వివేకానందకు వోటేయాలని అభ్యర్థిస్తున్నారు. అయితే వారు కాంగ్రెసు కార్యకర్తలుగా కాకుండా వివేకా కుటుంబ సభ్యులుగా ప్రచారం చేస్తుండటం విశేషం.

పోలింగ్ సమీపించే కొద్దీ జగన్‌లోని లోపాలు బయటపడుతున్నాయి

పులివెందుల, కడప ఉప ఎన్నికలను మూడు పార్టీలు ప్రతిష్టాత్మకంగా తీసుకొని శాయశక్తులా తమ తమ పార్టీ గెలుపు కోసం ప్రయత్నాలు చేస్తున్నాయి. ఇందులో ఒకరిది సెంటిమెంట్ అస్త్రం కాగా, మరొకరిది అభివృద్ధి, సాంప్రదాయ ఓటింగ్ అస్త్రం, వేరొకరిది ప్రత్యర్థి చీలి పోవడంతో గెలుపు ఉంటుందనే ఆశ. ఇలా ఏ పార్టీ ఆ పార్టీ తమ గెలుపు ఖాయం అని ఆశాభావం వ్యక్తం చేస్తున్నాయి. అయితే గెలుపుపై జగన్ వర్గం అతి విశ్వాసంతో ఉండగా, కాంగ్రెసు, టిడిపిలు మాత్రం ఆశాభావంతో ఉన్నట్టుగా తెలుస్తోంది. శుక్రవారం సాయంత్రంతో ప్రచారానికి తెరపడనుంది. ఉప ఎన్నికల నోటిఫికేషన్ విడుదలైన తొలిరోజుల్లో కడప లోక్‌సభ, పులివెందుల అసెంబ్లీ స్థానాల ఎన్నికల ఫలితాలు పూర్తి ఏకపక్షంగా ఉంటాయన్న ప్రచారం జరిగింది. ఈ ప్రచార హోరు నుంచి గట్టి పోటీని ఇస్తున్నామన్న ధీమాను వ్యక్తం చేసే స్థాయికి తెలుగుదేశం, కాంగ్రెస్ పార్టీ అభ్యర్థులు క్రమంగా ఎదిగారు.

కాంగ్రెస్ తరఫున ఎన్నికల బరిలో దిగిన కడప లోక్‌సభ అభ్యర్థి డిఎల్ రవీంద్రారెడ్డి, పులివెందుల అసెంబ్లీ అభ్యర్థి వైఎస్ వివేకానందరెడ్డి విజయం కోసం పట్టుదలతో పనిచేస్తున్నారు. ఇదే సమయంలో టిడిపి తరఫున రంగంలోకి దిగిన కడప లోక్‌సభ అభ్యర్థి ఎంవి మైసూరా రెడ్డి, పులివెందుల అసెంబ్లీ అభర్థి బిటెక్ రవి కూడా తమ విజయం కోసం గట్టి ప్రయత్నాలు చేస్తున్నారు. అంతర్గత కలహాలు లేకుండా తమ శ్రేణులను కాపాడుకుంటూ ముందుకు సాగడం ఈ రెండు పార్టీలకూ కలసి వచ్చే అంశం. అయితే అదే సమయంలో జగన్ వర్గం మాత్రం అంతర్గత కుమ్ములాటలో మునిగి పోయినట్లుగా తెలుస్తోంది. డబ్బుల పంపకం కారణంగా ఓ ముఖ్య ఎమ్మెల్యే అసంతృప్తికి గురి కాగా, స్థానికేతరులు కడప, పులివెందులలో పెత్తనం చెలాయించడం స్థానిక జగన్ వర్గం నేతలకు నచ్చక పోవడం మరో వైపు అంతర్గత సమస్యలకు దారి తీసింది.

ఇక కాంగ్రెసు పార్టీ తరఫున చిరంజీవి ప్రచారం నిర్వహించారు. ఆయన ప్రచారానికి జనం హాజరు బాగా ఉండడంతో అధికార పార్టీలోనూ ఉత్సాహం పెరిగింది. ఆఖరి నిమిషంలో ముఖ్యమంత్రి కిరణ్‌కుమార్‌రెడ్డి నిర్వహించిన మూడు సభల్లో చేసిన ప్రసంగాలకు మంచి స్పందనే వచ్చింది. రోజుకో ప్రకటన చేస్తూ చిత్తచాపల్యాన్ని ప్రదర్శించకుండా ప్రభుత్వాన్ని పడగొడతావో నిలబెడతావో ఏదో ఒకటి తేల్చుకోవాలంటూ జగన్‌ను కిరణ్ సవాల్ చేయడం ముఖ్యమైన అంశంగా మారింది. ఇక టిడిపి అధ్యక్షుడు చంద్రబాబు కడప లోక్‌సభ పరిధిలో చేపట్టిన రోడ్‌షోలు విజయవంతమై ఆపార్టీ శ్రేణుల్లో నూతనోత్తేజాన్ని నింపడమే కాకుండా కార్యకర్తల్లో చలనం తీసుకురాగలిగాయి. రెండు ఎద్దుల భీకర పోరులో లేగ దూడ కూడా విజయం సాధించే అవకాశాలు లేకపోలేదన్న చందంగా పులివెందుల అసెంబ్లీ స్థానం నుంచి టీడీపీ అభ్యర్థిగా బరిలో ఉన్న బీటెక్ రవి తాను విజయం సాధిస్తానన్న ధీమా వ్యక్తం చేస్తున్నారు.

ఉప ఎన్నికలకు సంబంధించి ముందుగానే కార్యాచరణ ప్రణాళికలు సిద్ధం చేసుకుని వ్యూహాత్మకంగా ముందుకు సాగిన జగన్‌లో చివరి నిమిషంలో కొంత ఆత్మస్థయిర్యం దెబ్బతిన్నదన్న అభిప్రాయం వ్యక్తమవుతోంది. ఎన్నికల నోటిఫికేషన్ విడుదలైన తొలి రోజుల్లో నువ్వు ఎన్నికల్లో తిరిగితే తిరిగావు. కానీ నీ తల్లి విజయలక్ష్మి చేత రాజీనామా చేయించి ఆమెను ఎర్రని ఎండలో ఎందుకు తిప్పుతున్నావ్ అంటూ కాంగ్రెస్ నేతలు ప్రశ్నించినప్పుడు సమాధానం ఇవ్వని జగన్ ఇప్పుడు మాత్రం అందరికీ అన్నం పెట్టే తల్లి ఇప్పుడు ఓట్ల కోసం ఊరూరా తిరుగుతోంది అంటూ సానుభూతిని సొమ్ము చేసుకునే ప్రయత్నాలను మొదలెట్టిన వైనంపై వైరి పార్టీలు ఆశ్చర్యం వ్యక్తం చేస్తున్నాయి. బిజెపితో అవగాహన అంశం కూడా జగన్‌ను దెబ్బతీస్తున్నట్టుగా కనిపిస్తోంది. అయితే జగన్ గెలిచినా గతంకన్నా తక్కువ మెజార్టీ వస్తే ఆయన ఇమేజ్ పడిపోయినట్టేనని పలువురు భావిస్తున్నారు.

పోలింగ్ సమీపించే కొద్దీ జగన్‌లోని లోపాలు బయటపడుతున్నాయని మంత్రి ఒకరు అన్నారు. పులివెందుల నుంచి బరిలో ఉన్న వివేకానందరెడ్డి గట్టి పోటీ ఇస్తుండడంతోనే సెంటిమెంట్ అనే రాజకీయ ఎత్తుగడకు జగన్ కుటుంబం దిగిందని కాంగ్రెస్ నేతలు విమర్శిస్తున్నారు. ఇక నియోజకవర్గాల వారీగా పులివెందుల, జమ్మలమడుగు, బద్వేల్ నియోజకవర్గాల్లో తమకు భారీ మెజారిటీ వస్తుందని జగన్ అంచనాలు వేస్తున్నారు. మైదుకూరు, కడప, కమలాపురం, పులివెందులలో తాము ఆధిక్యతను సాధిస్తామని కాంగ్రెస్ పార్టీ ధీమా వ్యక్తం చేస్తోంది. ఇదే సమయంలో కమలాపురం, మైదుకూరు, ప్రొద్దుటూరులపై తెలుగుదేశం నేతలు ధీమాతో ఉన్నారు. మరో వైపు తాను పులివెందులలో విజయం సాధిస్తానని తెలుగుదేశం అభ్యర్థి బీటెక్ రవి చెబుతున్నారు. కడప లోక్‌సభ పరిధిలో తనకున్న మంచి పేరే గెలిపించి తీరుతుందన్న విశ్వాసంతో మైసూరా రెడ్డి ఉన్నారు

అమెరికాతో పాటు భారత్‌పైనా పాక్ తన ఆగ్రహాన్ని చూపించింది

తమ దేశంలోనే తమకు తెలియకుండా అమెరికా ఆపరేషన్ జరిపి అంతర్జాతీయ తీవ్రవాది ఒసామా బిన్ లాడెన్‌ను హతమార్చడంపై పాకిస్తాన్ ఆగ్రహం ఇంకా చల్లారనట్టే కనిపిస్తోంది. లాడెన్ చంపిన తరహా ఆపరేషన్‌లు మరిన్ని పాకిస్తాన్‌లో జరుపుతామని అమెరికా ప్రకటించిన నేపథ్యంలో పాక్ తీవ్రంగా స్పందించింది. ఆలాంటి ఆపరేషన్‌లు మరిన్ని జరిపితే తాము తీవ్రంగా స్పందిస్తామని చెప్పింది. అలా చేస్తే అమెరికాను వదిలే పరిస్థితి ఉండదని హెచ్చరించింది. అవసరమైతే అమెరికాతో సంబంధాలు తెంచుకుంటామని హెచ్చరికలు జారీ చేసింది.

అమెరికాతో పాటు భారత్‌పైనా పాక్ తన ఆగ్రహాన్ని చూపించింది. అమెరికా లాంటి ఆపరేషన్లు భారత్ తమ దేశంలో నిర్వహించాలని చూస్తే తగిన మూల్యం చెల్లించుకోవాల్సి వస్తుందని హెచ్చరించింది. ఆ దాడులను తిప్పికొడతామని ప్రకటించింది.

నేను అడిగిందల్లా ఆగమేఘాల మీద అధికారంతో అందించావు

నేను అడిగిందల్లా ఆగమేఘాల మీద అధికారంతో అందించావు
కాలు పెట్టిన చోటల్లా క్రమబద్దీకరించావు
తర తరాలకు మనగలిగేలా పునాదులకు సిమెంట్ ఏసావు
పవరు ప్లాంట్లు ఇచ్చి నిరంతర విద్యుత్తు ఉండేలా చేసావు
గాదెల నిండా నింపుకోడానికి గనులు ఇచ్చావు
ఎవరు నోరేట్టినా తిట్టడానికి పేపర్ పెట్టించావు
మన గురించి స్తుంతిచడానికి ఓ చానల్ పెట్టించావు
మన ఆస్తులు కేసి ఆబగా చూస్తారని
మామ బావలకు సర్వే చేసి మరీ
సరిహద్దుల గొడవ లేకుండా జిల్లాలనే రాసిచ్చావు
ఇంతిచ్చిన నువ్వు అసలైన మంత్ర దండం నీ కుర్చీ
నాకు వచ్చేలా ఏర్పాటు చెయ్యకుండా ఏమారావు.

అదే ఇప్పుడు ప్రపంచం ముందు దోషిగా నెలబెడుతోంది

లాడెన్ ను తమ దేశంలోనే తనువు చలింపజేసి
వాడి కుటుంబాన్ని వదిలి
వచ్చిన వేగంతో అమెరికా పనికానిచ్చుకుపోతే

మేము నీళ్ళు పోసిన మొక్క తన కొమ్మలతో
మా కొమ్ములనే విరిచిందని
ఉంటే చెప్పండనే అపాత్ర ధర్మ గాళ్ళకు
ఇన్నాళ్ళూ లేదు లేదని
దాన ధర్మాలకు వాళ్ళ వద్దే చేయి చాస్తూ
తమ కలుగులోనే దాచి
ప్రపంచ దేశాల ముందు
గొంతులో పచ్చి వెలక్కాయ పడినట్టు
పడరాని పాట్లు పడుతూ

మన దేశానికి
రివాజుగా అపద్దాలు చెప్పి చెప్పి
ఆరితేరిపోయిన పాకిస్తాన్ ఐ ఎస్ ఐ

లాడెన్ దొరికిన ఇంటి పై మేము
2003 లోనే దాడి చేసాము
ఏదో సాధారణ కుటుంబం ఉంటే
తరువాత పట్టించుకోలేదు
అని అందమైన అబద్దం చెప్పింది

అదే ఇప్పుడు ప్రపంచం ముందు
దోషిగా నెలబెడుతోంది
2004లో తీసిన ఉపగ్రహాల చిత్రాలలో
నేల బారుగా ఉన్న ఆ ప్రాంతం పై
ఏమని దాడి చేసారో చెప్పండని
ఎదురుదాడి మొదలయ్యింది

నా కైతే పాపం పండిందేమో అనిపిస్తోంది
అట్టని ఎప్పుడూ అట్టుడుకే దేశంగా దాయాదులను
చూడడం ఊహిచుకోలేక పోతున్నా

రేపటి తరాల తలరాతలు మీ చేతిలో ఉన్నాయని మరవక మనసుతో ఆలోచించి మంచి వాళ్ళను ఎన్నుకోండి

కడప మహానుభావుడే దేవుడైనప్పుడు
కడపకు ఆ దేవుడి పేరే
పెడితే పెట్టుకొనీలే అని
సరి పెట్టుకొన్నారో!

లేదా దేవుడే లేదు
ఉంటే ఆయన కడప పేరును
ఆయనే ఉంచే వాడు కదా
అని దేవుడిని నిందించకుండా

కాటికి కాళ్ళు జాపుకున్న
అన్నా హజారే లాంటి వాళ్ళు
అవినీతి పైన నిరసిస్తుంటే
మాకు నీరసం వస్తోంది అని అనకుండా

సీమ పౌరుషం అనేది ఒకటి
మనకు ఏడ్చింది అని మరువకుండా
దానిని కాపాడడం కోసం

పేరు మార్చిన వాళ్ళను,
అవినీతిలో ఆరి తేరి
దేవుడి కడపకు కళంకం తెచ్చే వాళ్ళను
కనికరించకుండా

ఖర్చులకోసం తీసుకొనే
ఎన్నికల డబ్బుల సాక్షిగా
అది ప్రజల సొమ్మే అని నమ్మి
అది మనందరి సొమ్మే అని
మనస్పూర్తిగా అనుకొని
ఇచ్చిన వాళ్ళ నమ్మకానికి తూట్లు పొడిచి
రేపటి తరాల తలరాతలు
మీ చేతిలో ఉన్నాయని మరవక
మనసుతో ఆలోచించి
మంచి వాళ్ళను ఎన్నుకోండి.

భారత దేశాన్ని చూసి సిగ్గు తెచ్చుకోండి

పాక్ పాలకులు సైన్యం
భారత దేశాన్ని చూసి సిగ్గు తెచ్చుకోండి
అగ్ర రాజ్యాన్నే గడ గడ లాడించిన
ఒసామా ఒక్కడిని రక్షించుకోలేనందుకు
అదీ సైనిక స్థావరాలకు దగ్గరగా ఉన్నా
మీరు దక్కించుకోలేక పోయారు
అదే మా దేశం లో చూడండి
కసాబ్ గారికి కమ్మని భోజనం పెట్టి
కుషీ చేయుస్తూ
కోట్ల ఖర్చుతో
ఎలా రక్షిస్తున్నామో చూసి నేర్చుకోండి

అంత్య ప్రాస తో సరదాగా...................

మీపై నాకు అభిమానం ........................... (మాటల్లో చెప్పలేని )
దానికి లేదు కొలమానం..............................(చెప్పలేనంత పెద్దదో చెప్పకూడనంత చిన్నదో )
అందుకే చేద్దామని సన్మానం...................... ( సుత్తి తో కాదు సుమీ )
ఇద్దామని ఒక బహుమానం....................... (ఇది మాత్రం సీక్రెట్ )
వలదు నాపై అనుమానం.......................... (నమ్మండి నన్ను )
రాకపోతే నాకు అవమానం........................ ( అవునండి )
ఎక్కండి ఇక విమానం............................. ( ఫ్లైట్ టికెట్స్ ఇవ్వబడవు )
అందింది కదా ఆహ్వానం
ఇంకెందుకు మౌనం
మీ రాకే నాకు ప్రధానం

హింసించి ఉంటే సారీ ;)

ఇంటి పేరు కాజ

మారు పేరు నాని

నేనొక పెద్ద మాటకారి

అలాగే కొంచెం చమత్కారి

నా కవిత్వం కావేరి

నా సుత్తి మరి మహమ్మారి
నా ఆలోచనలు భారీ
ప్రస్తుతానికి నేనొక బ్రహ్మచారి

హింసించి ఉంటే సారీ
ఈ పూట కి ఉంటా మరి !
మీరలా మౌనంగా వెళ్ళిపోతే కామెంట్ కొట్టే వారు ఏరి ?

బ్లాగ్ కి వచ్చిన ప్రతి ఒక్కరికీ బ్లాగ్మిత్రులకు నమస్కారం

మీకిదే నా పురస్కారం

మీకు వలదు తిరస్కారం

నాకు కలదు సంస్కారం

మీపై నాకు మమకారం

అందుకే హాస్యం తో ఈ చిన్న ఉపకారం

కారాదు నా సుత్తి మీకు అపకారం

కొంత చమత్కారం

మరి కొంత వెటకారం.......................

ఆ సుత్తి గీతిక విన్నారు గా తాత్పర్యం మీకోసం

న కత్తి న రణం
న ఒత్తి న పదం
న వత్తి న దీపం
న సుత్తి న జీవితం


ఆ సుత్తి గీతిక విన్నారు గా తాత్పర్యం మీకోసం

ఒకటో లైన్ : కత్తి లేనిదే యుద్ధం లేదు
రెండో లైన్ : ఒత్తులు లేనిదే పదానికి అర్ధం లేదు
మూడో లైన్ : వత్తి లేనిదే దీపానికి అర్ధం లేదు
నాలుగో లైన్ : సుత్తి లేనిదే ఈ జీవితం లేదు

కాలం కవిత

కసీ లేదు

కనికరం లేదు

కల్లాకపటం తెలియదు

ఎన్నెన్నో ప్రశ్నలు అన్నిటికీ అదే సమాధానం

కలకలం రేపుతుంది

కన్నీటిని మిగిలిస్తుంది

కవ్విస్తుంది,నవ్విస్తుంది

అందుకే ఒక్కోరోజు అనిపిస్తుంది

కాలం కలమై రాసిన కమ్మని కధే ఈ జీవితం

మరో రోజు అనిపిస్తుంది

కాలం కలమై రాసిన కలతల కధే ఈ జీవితం

ఏదైనా నీ జీవితం కాలం లో కలిసిపోయే కధ -

ఆంధ్రా నాకు తెలంగాణ నీకు!

మాజీ పార్లమెంటు సభ్యుడు వైయస్ జగన్మోహన్ రెడ్డి, తెలంగాణ రాష్ట్ర సమితి అధ్యక్షుడు కె చంద్రశేఖరరావు ప్రభుత్వం కూలిపోయి ఎన్నికలు ఎప్పుడు వస్తాయా అని ఎదురు చూస్తుంటే, మరోవైపు ముఖ్యమంత్రి కిరణ్ కుమార్ రెడ్డి, తెలుగుదేశం పార్టీ అధినేత ఎన్నికలు రావద్దని కోరుకుంటున్నట్టుగా కనిపిస్తోంది. తండ్రి అయిన దివంగత ముఖ్యమంత్రి వైయస్ రాజశేఖరరెడ్డి మరణం, పార్లమెంటు సభ్యుత్వానికి రాజీనామా, పార్టీ నుండి వెళ్లి పోవడం తదితర పరిణామాల దృష్ట్యా ప్రజలలో కలిగిన సానుభూతిని ఓటింగ్‌గా మలుచుకునే ఉద్దేశ్యంతో జగన్ ఇప్పటికిప్పుడు ఎన్నికలు కోరుకుంటున్నారు. అందుకే ఆయన తనకు ప్రభుత్వాన్ని పడగొట్టే శక్తి ఉందనే వ్యాఖ్యలను మరోసారి తెరమీదకు తెస్తున్నారు. అయితే ఇలా ప్రభుత్వాన్ని పడగొడతానని, ఉప ఎన్నికల తర్వాత జగన్ ప్రభుత్వం వస్తుందని కడప జిల్లా వోటర్లను మభ్య పెట్టడానికే అలా వ్యాఖ్యానిస్తున్నారనే వాదనలు కూడా వినిపిస్తున్నాయి. జగన్‌కు అంత సామర్థ్యం ఉంటే ఇన్నాళ్లు ఎందుకు నిరీక్షిస్తాడనే వారూ ఉన్నారు. కేవలం వోటర్లను బెదిరింపులకు గురిచేసి మభ్య పెట్టడానికే అలాంటి వ్యాఖ్యలు చేస్తున్నారని తెలుస్తోంది.


కడప ఉప ఎన్నికలు అయ్యాక ఆరునెలల్లోగా ఎన్నికలు వస్తాయని జగన్ చెప్పడం అంతా వట్టిదేనని పలువురు భావిస్తున్నారు. ఇప్పటికిప్పుడు ఎన్నికలకు వెళ్లడానికి జగన్ సిద్ధంగా ఉన్నప్పటికీ జగన్‌తో ఉన్న ఎమ్మెల్యేలు కూడా చాలా మంది సిద్ధంగా లేనట్టుగా తెలుస్తోంది. తనకు ప్రభుత్వాన్ని కూల్చే శక్తి లేదని జగన్‌కు తెలిసినప్పటికీ రాజీనామా చేసినప్పటి నుండి ప్రభుత్వాన్ని పడగొడతానని బెదిరించడం ప్రజల్లో అస్పష్టత కల్పించడంలో భాగమేననే పలువురు భావిస్తున్నారు. జగన్ వర్గం వారు ఎన్నికలకు సిద్ధంగా లేక పోవడమే కాకుండా ఎంఐఎం, పిఆర్పీ కలిసి కాంగ్రెసుకు చేయూత నిచ్చేందుకు సిద్ధపడటం జగన్ ఎన్నికల అత్యుత్సాహానికి దెబ్బ కొడుతున్నాయి. అయితే తనపై సానుభూతి విరివిగా ఉన్న సమయంలో ఎన్నికలు వస్తే మాత్రం తనకు అందరికంటే ఎక్కువ సీట్లు రావడం ఖాయంగా జగన్ భావిస్తున్నారు.

ఇక జగన్‌తో పాటు తెలంగాణ రాష్ట్ర సమితి అధ్యక్షుడు కెసిఆర్ కూడా ఎన్నికలను వీలైనంత త్వరగా కోరుకుంటున్నారు. గత సంవత్సరంన్నరగా జరుగుతున్న తెలంగాణ ఉద్యమం కారణంగా టిఆర్ఎస్‌కు పదేళ్లలోలేని ప్రాధాన్యత ఏర్పడింది. ఇప్పటికిప్పుడు ఎన్నికలు వస్తే సీమాంధ్రలో జగన్ హవా కొనసాగితే, తెలంగాణలో టిఆర్ఎస్ హవా కొనసాగుతుంది. కాబట్టి జగన్ ప్రభుత్వాన్ని ఎప్పుడు పడదోస్తాడా అని గుంటనక్కలా కాచుకు కూచున్నట్లు కనిపిస్తుంది. జగన్ ప్రభుత్వాన్ని పడదోస్తే టిఆర్ఎస్‌కు 70 సీట్ల వరకు రావచ్చని ఓ అభిప్రాయం. అయితే రెండు మూడు నెలలుగా టిఆర్ఎస్ ప్రభావం 70 నుండి తగ్గుతూ వస్తున్నట్టుగా కనిపిస్తోంది. ఈ దశలో కెసిఆర్ వీలైనంత త్వరగా ఎన్నికల కోసం ఎదురు చూస్తున్నారు.

కెసిఆర్, జగన్ ఎన్నికల కోసం ఎదురు చూస్తుంటే కాంగ్రెసు, టిడిపి పరిస్థితి అందుకు విరుద్ధంగా ఉంది. తెలంగాణ ఉద్యమం, జగన్ ప్రభావం నేపథ్యంలో టిడిపి, కాంగ్రెసు సంఘర్షణలో పడ్డాయి. ఇప్పటికిప్పుడు ఆ రెండు పార్టీలు ఎన్నికలకు ఏమాత్రం సిద్ధంగా లేవు. రెండు కళ్ల సిద్ధాంతం కారణంగా ఇటు తెలంగాణ, అటు సీమాంధ్రలో టిడిపి ప్రభావం కోల్పోగా, కాంగ్రెసుకు సొంత ఇంటిలోనే తెలంగాణ పోరు, జగన్ హోరు కష్టంగా పరిణమించింది. దీంతో ఈ రెండు పార్టీలు ఎన్నికలకు ఏమాత్రం రెడీగా లేవు.

సోవియట్‌పై పోరాటానికి అమెరికానే ఒసామా బిన్ లాడెన్‌ను పెంచి పోషించిందనేవారున్నారు.

బహుశా ప్రపంచవ్యాప్తంగా అమెరికా అధ్యక్షుడి కన్నా ఆల్ ఖైదా వ్యవస్థాపకుడు ఒసామా బిన్ లాడెనే పాపులర్ అయి ఉంటాడు. అమెరికాలో 2001 సెప్టెంబర్ 11వ తేదీన దాడులు నిర్వహించిన తర్వాత ప్రపంపవ్యాప్తంగా అతని పేరు మారు మోగిపోయింది. అమెరికాను గడగడలాడించిన లాడెన్ ఎక్కడి నుంచి ఎక్కడి దాకా సాగాడనేది ఆసక్తికరమైన విషయమే. ఒసామా బిన్ మొహమ్మద్ బిన్ అవాద్ బిన్ లాడెన్ 1957 మార్చి 10వ తేదీన జన్మించాడు. హింసాత్మకమైన జిహాదీ ఉద్యమం చేపట్టడం వల్ల లాడెన్ సౌదీ అరేబియా పౌరసత్వాన్ని కోల్పోయాడు. అతని బిలియనీర్ ఫ్యామిలీ అతన్ని దూరం చేసుకుంది. అతనితో తమకు సంబంధం లేదని ప్రకటించుకుంది.


లాడెన్ తండ్రి మొహమ్మద్ బిన్ అవాద్ లాడెన్ సంపన్నమైన వాణిజ్యవేత్త. సౌదీ రాచకుటుంబంతో అతనికి సన్నిహిత సంబంధాలుండేవి. మొహమ్మద్ బిన్ అవాద్ బిన్ లాడెన్ పదో భార్య హమీదా ఆల్ - అత్తాస్ ఏకైక పుత్రుడు లాడెన్. లాడెన్ పుట్టిన తర్వాత తల్లిదండ్రులు విడాకులు తీసుకున్నారు. ఒసామా తల్లి ముహమ్మద్ ఆల్ - అత్తాస్‌ను పెళ్లి చేసుకుంది. వీరికి ముగ్గురు కుమారులు, ఒక కూతురు. లాడెన్ వారితో కలిసి ఉండేవాడు. లాడెన్ 1968 నుంచి 1976 వరకు వాహబీ ముస్లిం పద్దతుల్లో పెరిగాడు సంపన్నమైన లౌకిక ఆల్ - తాగర్ మోడల్ స్కూల్లో చదివాడు కింగ్ అబ్దుల్ అజీజ్ విశ్వవిద్యాలయంలో ఆర్థిక, వాణిజ్య యాజమాన్య శాస్త్రాలు చదివాడు. 1979లో సివిల్ ఇంజనీరింగ్, 1981లో పబ్లిక్ అడ్మినిస్ట్రేషన్ చదివాడని అంటారు. అయితే, మూడో సంవత్సరంలోనే చదువును ఆపేశాడని చెబుతారు. అయితే, విశ్వవిద్యాలయంలో ఖురాన్, జిహాద్, సేవా కార్యక్రమాలను అన్వయం చేసే కార్యక్రమాల్లో మునిగిపోయినట్లు చెబుతారు. లాడెన్ కవిత్వం కూడా రాశాడు.

లాడెన్ తన 18 ఏళ్ల వయస్సులో లటాకియాలో నజ్వా ఘేనంను వివాహం చేసుకున్నాడు. లాడెన్ 2002లో నలుగురు స్త్రీలను పెళ్లి చేసుకున్నట్లు కూడా వార్తలు వచ్చాయి. లాడెన్‌కు 25 లేదా 28 మంది పిల్లలు ఉంటారని చెబుతారు. లాడెన్ తండ్రి ముహమ్మద్ బిన్ లాడెన్ 1967లో సౌదీ అరేబియాలో విమాన ప్రమాదంలో మరణించాడు. అమెరికా పైలట్ ల్యాండింగ్ విషయంలో తప్పుడు సంకేతాలు ఇవ్వడంతో ఈ విమాన ప్రమాదం చోటు చేసుకుంది. లాడెన్ సవతి సోదరుడు, కుటుంబ పెద్ద సలీం బిన్ లాడెన్ 1988లో అమెరికాలోని టెక్సాస్ సాన్ ఆంటోనియోలో విమాన ప్రమాదంలో మరణించాడు.

షరియా పునరుద్ధరణ వల్ల ముస్లిం ప్రపంచం సరైన మార్గంలో నడుస్తుందని లాడెన్ విశ్వసించేవాడు. పాన్ - అరబిసమ్, సోషలిజం, కమ్యూనిజం, ప్రజాస్వామ్యాలను వ్యతిరేకించాలని ఉపదేశించేవాడు. ఈ విశ్వాసాలతో హింసాత్మక కార్యక్రమాలను విస్తరించిన జిహాదీని తొలుత ఖుట్బిజం అని పిలిచేవారు. ముస్లిం ప్రపంచంలో తాలిబన్ నేత ముల్లా ఒమర్ ప్రభుత్వ హయాంలోని అఫ్షనిస్తాన్‌ను ఏకైక ఇస్లామిక్ దేశమని భావించేవాడు. ఆ ప్రభుత్వ సాయాంతో అమెరికా, ఇతర ముస్లిం వ్యతిరేక దేశాలపై పోరాటం సాగించాలని లాడెన్ ఆల్ ఖైదాను స్థాపించాడు. ఇజ్రాయెల్ ప్రభుత్వాన్ని రద్దు చేయాలని, మధ్య ప్రాచ్య దేశాల నుంచి అమెరికా సైన్యాలను ఉపసంహరించాలని ఆయన డిమాండ్ చేశాడు.

అప్షనిస్తాన్‌పై సోవియట్ దాడిని తిప్పికొట్టడానికి లాడెన్ 1979లో అబ్దుల్లా ఆజ్జంతో చేతులు కలిపాడు. కొంత కాలం పెషావర్‌లో ఉన్నాడు. సోవియట్‌పై పోరాటానికి ఏర్పడిన ముక్తబ్ ఆల్ ఖిదమత్‌ను 1988లో చీల్చి ఆల్ ఖైదాను ఏర్పాటు చేశాడు. ఆ తర్వాత వివిధ దేశాల్లో దాడులకు లాడెన్ కుట్ర చేశాడు. సోవియట్‌పై పోరాటానికి అమెరికానే ఒసామా బిన్ లాడెన్‌ను పెంచి పోషించిందనేవారున్నారు. అతనే చివరికి అమెరికాకు కూడా కొరకరాని కొయ్యగా తయారయ్యాడని చెబుతారు.